ລິ້ງ ສຳຫລັບເຂົ້າຫາ

ວັນອາທິດ, ໐໓ ມີນາ ໒໐໒໔

ໄອຍະການ ຂໍຮ້ອງໃຫ້ ຈໍາຄຸກຕະຫລອດຊີວິດ ຜູ້ຊ່ວຍຜະລິດລະເບີດ ໂຈມຕີທີ່ເກາະບາຫຼີ


ການດໍາເນີນຄະດີ ນາຍ Umar Patek, ຜູ້ກໍ່ການຮ້າຍ ອິນໂດເນເຊຍ
ວັນທີ 21 ພຶດສະພາ 2012.
ການດໍາເນີນຄະດີ ນາຍ Umar Patek, ຜູ້ກໍ່ການຮ້າຍ ອິນໂດເນເຊຍ ວັນທີ 21 ພຶດສະພາ 2012.






















ບັນດາ​ໄອ​ຍະ​ການ​ອິນ​ໂດ​ເນ​ເຊຍ​ໄດ້​ຂໍ​ຮ້ອງ​ໃຫ້​ລົງ​ໂທດຈໍາ​ຄຸກ​ຕະຫຼອດຊີວິດ ​ແທນ​ການ
ປະຫານ​ຊີວິດ​ ຕໍ່ຈໍາ​ເລີຍ​ຫົວ​ຮຸນ​ແຮງ​ມຸສລິ​ມຄົນ​ນຶ່ງ​ທີ່​ຖືກ​ຕັດສິນ​ວ່າ ມີ​ຄວາມ​ຜິດ​ໃນ​ຂໍ້​ຫາ​
ຊ່ອຍ​ຜະລິດ​ລະເບີດ​ທີ່​ໃຊ້​ໃນ​ການ​ໂຈມ​ຕີ​ສະຖານ​ທີ່​ບັນ​ເທີ​ງ​ແຫ່ງ​ນຶ່ງ​ເທິງ​ເກາະ​ບາ​ຫຼີ ​ໃນປີ 2002 ນັ້ນ.

​ໃນ​ເບື້ອງ​ຕົ້ນ ​ພວກ​ໄອ​ຍະ​ການ​ໄດ້ຂໍ​ຮ້ອງ​ໃຫ້​ລົງ​ໂທດ​ປະຫານ​ຊີວິດ​ນາຍ Umar Patek ​ເວລາ​ການ​ດໍາ​ເນີນ​ຄະດີຜູ້ກ່ຽວ​ເລີ້ມ​ຂຶ້ນ​ໃນ​ເດືອນ​ກຸມພາ​ຜ່ານ​ມາ.

​ແຕ່ໄອ​ຍະ​ການ Bambang Suharyadi ​ ກ່າວ​ຕໍ່​ສານ​ຊັ້ນ​ຕົ້ນປະ​ຈໍາ​ເຂດ​ຕາ​ເວັນ​ຕົກ​ຂອງ Jakarta ​ໃນ​ວັນ​ຈັນ​ມື້​ນີ້​ວ່າ ນາຍ Patek ຄວນ​ຈະ​ໄດ້​ຮັບ​ໂທດ​ຈໍາ​ຄຸກຕະຫຼອດ​ຊີວິດ ເຖິ່ງ​ແມ່ນ​ຜູ່​ກ່ຽວ​ໄດ້​ຖືກ​ຕັດສິນ​ວ່າ​ມີ​ ຄວາມ​ຜິດ​ ​ໃນ​ຂໍ້​ຫາຄາດ​ຕະກໍາ​ແບບ​ທີ່​ມີ​ການ​ວາງ​ແຜນລ່ວງ​ໜ້າ​ກໍ​ຕາມ​ນັ້ນ.

ນາຍ Patek ທີ່​ໄດ້​ຂໍ​ຂະ​ມາ​ໂທດ​ຕໍ່​ພວກ​ທີ່​ໄດ້​ຮັບ​ເຄາະ​ຮ້າຍ​ແລະຄອບ ຄົວ​ຂອງ​ເຂົາ​ເຈົ້າ​ ​ໄດ້​ໃຫ້ການ​ຕໍ່​ສານ​ໃນ​ຕົ້ນ​ເດືອນ​ນີ້ວ່າ ຕົນ​ມີບົດບາດ ​ພຽງ​ເລັກ​ນ້ອຍ​ເທົ່າ​ນັ້ນ​ ໃນ​ການ​ໂຈມ​ຕີ​ທີ່​ໄດ້​ສັງຫານ​ຜູ້​ຄົນ​ໄປ 202 ຄົນ ​ແລະ​ກ່າວ​ວ່າ ຕົນ​ບໍ່ຮູ້ວ່າ ພວກ​ສະຖານ​ທີ່​ບັນ​ເທີ​ງ​ ເປັນ​ເປົ້າ​ໝາຍຂອງ​ການ​ໂຈມ​ຕີ.

ນາຍ Patek ​ໄດ້​ຖືກ​ຈັບ​ກຸມ​ໃນ​ເດືອນ​ມັງກອນ​ປີ​ແລ້ວ​ນີ້ ​ໃນເມືອງຄ້າຍ​ ທະຫານແຫ່ງດຽວ​ກັນ​ກັບ ​ທີ່ກໍ​າລັງ​ຂອງ​ສະຫະລັດລອບເຂົ້າ​ໄປສັງຫານນາຍ​ໂອຊາ​ມາ ບິນ ລາ​ເດັນ ຜູ້​ນໍາ​ກຸ່ມ ອານ ກາ​ອິດາ ນັ້ນ.

XS
SM
MD
LG