ຊາວມຸສລິມຫົວຮຸນແຮງຄົນນຶ່ງທີ່ຖືກກ່າວຫາວ່າ ຜະລິດລະເບີດທີ່ໃຊ້ໃນການໂຈມຕີສະຖານທີ່ບັນເທີງຫຼື nightclub ແຫ່ງນຶ່ງເທິງເກາະບາຫຼີຂອງອິນໂດເນເຊຍໃນປີ 2002 ນັ້ນໄດ້ຂໍຂະມາໂທດຕໍ່ພວກທີ່ໄດ້ຮັບເຄາະຮ້າຍແລະພວກຄອບຄົວຂອງເຂົາເຈົ້າ.
ໃນລະຫວ່າງການໃຫ້ການທີ່ມີອາລົມໂສກເສົ້າຕໍ່ສານໃນການດໍາເນີນຄະດີຜູ້ກ່ຽວໃນວັນຈັນມື້ນີ້ ນາຍ Umar Patek ກ່າວວ່າ ລາວມີບົດບາດພຽງເລັກນ້ອຍເທົ່ານັ້ນໃນການໂຈມຕີທີ່ໄດ້ສັງຫານຜູ້ຄົນ 202ຄົນນັ້ນ ແລະບໍ່ຮູ້ຈັກວ່າ ພວກສະຖານທີ່ບັນເທີງເຫຼົ່ານີ້ຕົກເປັນເປົ້າໝາຍຂອງການໂຈມຕີ.
ນາຍ Patek ປະເຊີນກັບໂທດປະຫານຊີວິດສູງສຸດ ຖ້າສານຕັດສິນວ່າຜູ້ກ່ຽວມີຄວາມຜິດໃນຂໍ້ກ່າວຫາຕ່າງໆທີ່ຮວມທັງການຄາດຕະກໍາທີ່ມີການໄຕ່ຕອງລ່ວງໜ້າ ການຜະລິດລະເບີດ ແລະການມີອາວຸດທີ່ຜິດກົດໝາຍຢູ່ໃນຄວາມຄອບຄອງ. ລາວປະເຊີນການກ່າວຫາໃນທໍານອງຄ້າຍຄືກັນນີ້ ທີ່ວ່າລາວມີບົດບາດໃນການໂຈມຕີຫຼາຍບັ້ນທີ່ເຮັດໃຫ້ມີຜູ້ຄົນເສຍຊີວິດຕໍ່ພວກໂບດຄຣິນຕຽນແຫ່ງຕ່າງໆໃນກຸງ Jakarta ກ່ອນວັນເທດສະການບຸນຄຣີສມາສໃນປີ 2000 ນັ້ນ.
ນາຍ Pakek ຖືກຈັບກຸມໃນເດືອນມັງກອນປີແລ້ວນີ້ ໃນເມືອງດຽວກັນທີ່ປາກິສຖານ ບ່ອນທ່ີກໍາລັງຂອງສະຫະລັດໄດ້ສັງຫານນາຍໂອຊາມາ ບິນ ລາເດັນ ຜູ້ນໍາເຄືອຂ່າຍ ອານ ກາອິດາ ນັ້ນ.
ການໂຈມຕີທີ່ເກາະບາຫຼີ ແລະໃນແຫ່ງອື່ນໆອີກຫຼາຍແຫ່ງແມ່ນແນເປົ້າໝາຍໃສ່ພວກຊາວຕ່າງປະເທດໃນອິນໂດເນເຊຍໃນຮອບນຶ່ງທົດສະວັດຜ່ານມາ ໄດ້ຖິ້ມໂທດໃສ່ພວກສະມາຊິກຂອງກຸ່ມJemaah Islamiyah ຊຶ່ງເປັນກຸ່ມມຸສລິມຫົວແຂງກະດ້າງ ທີ່ໄດ້ສະໜັບສະໜຸນໃຫ້ຕັ້ງລັດອີສລາມຂຶ້ນທີ່ຄວບຄຸມສ່ວນຫຼາຍໃນເອເຊຍຕາເວັນອອກສຽງໃຕ້ນັ້ນ.