ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ອິນໂດເນເຊຍ ຕັດສິນລົງໂທດຂັງຄຸກອະດີດລັດຖະມົນ ຕີກະຊວງກະສິກໍາ ເປັນຫຼາຍກວ່າເວລາ 10 ປີ ໃນຂໍ້ຫາຂໍ້ລາດບັງຫຼວງ


ອະດິີດລັດຖະມົນຕີກະຊວງກະສິກໍາຂອງອິນໂດເນເຊຍ ທ່ານ ຊາຣູລ ຢາຊິນ ລິມໂປ, ກາງ, ຖືກຄວບຄຸມໂຕໂດຍເຈົ້າໜ້າທີ່ຕໍາຫຼວດ ໃນລະຫວ່າງເດີນທາງມາຮັບຟັງການພິຈາລະນາຄະດີຂອງທ່ານ ກ່ຽວກັບກໍລະນີສໍ້ລາດບັງຫຼວງ ຢູ່ທີ່ສານສໍ້ລາດບັງຫຼວງໃນນະຄອນຫຼວງຈາກາຕ້າ, ວັນທີ 11 ກໍລະກົດ 2024.
ອະດິີດລັດຖະມົນຕີກະຊວງກະສິກໍາຂອງອິນໂດເນເຊຍ ທ່ານ ຊາຣູລ ຢາຊິນ ລິມໂປ, ກາງ, ຖືກຄວບຄຸມໂຕໂດຍເຈົ້າໜ້າທີ່ຕໍາຫຼວດ ໃນລະຫວ່າງເດີນທາງມາຮັບຟັງການພິຈາລະນາຄະດີຂອງທ່ານ ກ່ຽວກັບກໍລະນີສໍ້ລາດບັງຫຼວງ ຢູ່ທີ່ສານສໍ້ລາດບັງຫຼວງໃນນະຄອນຫຼວງຈາກາຕ້າ, ວັນທີ 11 ກໍລະກົດ 2024.

ສານຕໍ່​ຕ້ານ​ການ​ສໍ້​ລາດ​ບັງ​ຫຼວງ​ຂອງ​ອິນ​ໂດ​ເນ​ເຊຍ​ ໄດ້​ຕັດສິນ​ລົງ​ໂທດ​ອະດີດ​ລັດຖະມົນຕີ​ກະຊວງກະສິກໍາ​ຄົນ​ນຶ່ງໃນ​ວັນ​ພະຫັດ​ມື້​ນີ້ ​ໃຫ້ຂັງ​ຄຸກເປັນເວລາ 10 ປີ ​ລຸນຫຼັງພົບ​ເຫັນວ່າ ທ່ານ​ມີ​ຄວາມ​ຜິດ​ໃນ​ຂໍ້​ຫາທີ່ພົວພັນກັບການ​ສໍ້​ໂກງ​ຊັບ​ສິນ, ໃຊ້​ອຳນາດໄປໃນທາງທີ່ຜິດ ​ແລະ ການ​ຮັບສິນ​ບົນ​ທີ່​ກ່ຽວຂ້ອງ​ກັບ​ສັນຍາ​ຂອງ​ກະຊວງ​ ແລະພໍ່ຄ້າ​ເອກະ​ຊົນ.

ຄະດີດັ່ງກ່າວ ໄດ້ທຳລາຍຄວາມໜ້າເຊື່ອຖືຂອງປະທານາທິບໍດີ ໂຈໂກ ວິໂດໂດ ໃນການຕ້ານການສໍ້ລາດບັງຫຼວງ. ສະມາຊິກອີກ 5 ຄົນຂອງຄະນະລັດຖະບານ ທ່ານ ວິໂດໂດ ກໍໄດ້ຖືກຕັດສິນໂທດຂັງຄຸກໃນຂໍ້ຫາສໍ້ລາດບັງຫຼວງເຊັ່ນດຽວກັນ, ສົ່ງຜົນເຮັດໃຫ້ເປັນເງົາບົດບັງຕໍ່ຄວາມພະຍາຍາມຂອງທ່ານ ທີ່ຈະຈັດຄວາມ ເປັນລະບຽບຮຽບຮ້ອຍໃນຄະນະລັດຖະບານ, ໃນລະຫວ່າງທີ່ອາຍຸການດໍາລົງ ຕໍາແໜ່ງຂອງທ່ານ ຈະສິ້ນສຸດລົງໃນເດືອນຕຸລາທີ່ຈະມາເຖິງນີ້.

ສານໃນນະຄອນຫຼວງຈາກາຕາ ໄດ້ຕັດສິນອອກມາວ່າ ອະດີດຄະນະລັດ ຖະມົນຕີຂອງກະຊວງກະສິກໍາ ທ່ານ ຊາຣູລ ຢາຊິນ ລິມໂປ (Syahrul Yasin Limpo) ມີຄວາມຜິດໃນຂໍ້ຫານໍາໃຊ້ອໍານາດຂອງທ່ານໄປໃນທາງທີ່ຜິດ ໂດຍການເຮັດໃຫ້ຕົນເອງ ແລະເຈົ້າໜ້າທີ່ຄົນອື່ນໆ ມີຄວາມຮັ່ງມີ. ນອກນັ້ນ, ຍັງໄດ້ສັ່ງໃຫ້ທ່ານຈ່າຍຄ່າປັບໄໝເປັນຈໍານວນເງິນ 300 ລ້ານຣູເປຍ ຫຼື 18,500 ໂດລາ, ແລະໄດກ່າວວ່າ ທ່ານຈະຖືກຂັງຄຸກເພີ້ມອີກ 4 ເດືອນ ຖ້າທ່ານບໍ່ຈ່າຍຄ່າປັບໄໝດັ່ງກ່າວນັ້ນ.

ປະທານຜູ້ພິພາກສາ ທ່ານ ຣີອັນໂຕ ອາດາມ ປັອນໂຕ (Rianto Adam Pontoh) ກ່າວວ່າ “ຈໍາເລີຍໄດ້ຖືກພິສູດຢ່າງຖືກຕ້ອງຕາມກົດໝາຍ ແລະ ເຊື່ອຖືໄດ້ວ່າ ມີຄວາມຜິດກ່ຽວກັບການສໍ້ລາດບັງຫຼວງ, ລາວບໍ່ແມ່ນຕົວຢ່າງ ທີ່ດີໃນຖານະເປັນເຈົ້າຫນ້າທີ່ຂອງສັງຄົມ, ສິ່ງທີ່ລາວໄດ້ກະທໍາ ແມ່ນຕ້ານກັບ ຄວາມພະຍາຍາມຂອງລັດຖະບານເພື່ອຕ້ານການສໍ້ລາດບັງຫຼວງ ເຊິ່ງລາວ ໄດ້ເສີມສ້າງຄວາມຮັ່ງມີໃຫ້ແກ່ຕົນເອງ ໂດຍການສໍ້ລາດບັງຫຼວງ.”

ທ່ານ ລິມໂປ ຖືກຈັບກຸມໃນເດືອນຕຸລາທີ່ຜ່ານມາໂດຍຄະນະກໍາມະການ ລົບລ້າງການສໍ້ລາດບັງຫຼວງ ທີ່ຮູ້ໃນອີກຊື່ນຶ່ງວ່າ KPK, ເຊິ່ງທ່ານໄດ້ປະຕິເສດ ຕໍ່ການກະທໍາຜິດດັ່ງກ່າວນັ້ນ.

ບັນດາໄອຍະການ, ຜູ້ທີ່ພະຍາຍາມສົ່ງ ທ່ານ ລິມໂປ ເຂົ້າຄຸກເປັນເວລາ 12 ນັ້ນ ກ່າວວ່າ ນັກການເມືອງຜູ້ນີ້ ໄດ້ຮັບເອົາເງິນຈໍານວນທັງຫມົດ 44.7 ຕື້ຣູເປຍ ຫຼື 2.7 ລ້ານໂດລາ ໃນລະຫວ່າງເດືອນ ມັງກອນ ປີ 2020 ຫາເດືອນ ຕຸລາ ປີ 2023.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG