ຄະນະປະຕິບັດງານຊອກຄົ້ນຫາແລະກູ້ໄພຂອງອິນໂດເນເຊຍ
ກ່າວວ່າ ພວກເຂົາເຈົ້າໄດ້ພົບເຫັນ ຊິ້ນສ່ວນ-ຕອນທ້າຍຂອງ
ຖ້ຽວບິນ 8501 ເຮືອບິນສາຍການບິນ AirAsia ແລ້ວ ທີ່ໄດ້ຕົກ
ໃນທະເລຈາວາ ເມື່ອວັນທີ 28 ທັນວາຜ່ານມານີ້.
ຫົວໜ້າຂອງອົງການຊອກຄົ້ນຫາແລະກູ້ໄພແຫ່ງຊາດຂອງ
ອິນໂດເນເຊຍ ໄດ້ບອກກັບພວກນັກຂ່າວ ໃນວັນພຸດມື້ນີ້ວ່າ
ຫາງຂອງເຮືອບິນ ທີ່ບັນຈຸໃນອັນທີ່ເອີ້ນວ່າ ຫີບດຳຫຼື blackbox
ທີ່ບັນທຶກສຽງແລະຂໍ້ມູນຕ່າງໆຂອງສາຍການບິນນັ້ນ ໄດ້ຄົ້ນພົບ
ແລ້ວ ຫຼັງຈາກທີ່ທາງການໄດ້ປະກາດຂະຫຍາຍວົງກວ້າງອອກ
ໃນການຊອກຄົ້ນຫາຫີບດຳ ເມື່ອວັນອັງຄານວານນີ້. ເຄື່ອງບັນທຶກສຽງແລະຂໍ້ມູນຕ່າງໆ ຄາດວ່າຈະຊ່ອຍໃຫ້ເຈົ້າໜ້າທີ່ ພິສູດເຖິງສາເຫດຂອງການຕົກເຮືອບິນລຳດັ່ງກ່າວນີ້ໄດ້.
ຖ້ຽວບິນທີ່ວ່ານີ້ ບັນຈຸຜູ້ໂດຍສານແລະພະນັກງານທັງໝົດ 162 ຄົນ ຕອນທີ່ຕົກລົງໃສ່
ທະເລຈາວາ ນອກຝັ່ງທະເລຂອງ ເກາະ Borneo. ບໍ່ມີຜູ້ລອດຊີວິດມາໄດ້ ແລະໄດ້ພົບເຫັນຊາກສົບ ໜ້ອຍກວ່າ 40 ຄົນຂອງຜູ້ເຄາະຮ້າຍເທົ່ານັ້ນ.
ເຮືອບິນເຄື່ອງຈັກຄູ່ Airbus A 320 ໄດ້ຫາຍໄປຈາກຈໍເຣດາ ໂດຍບໍ່ມີຮ່ອງຮອຍ ເກືອບ
ວ່າເຄິ່ງທາງຂອງການເດີນທາງ 2 ຊົ່ວໂມງ ຈາກອິນໂດເນເຊຍ ສູ່ ສິງກະໂປ.
ພວກນັກຊ່ຽວຊານດ້ານສັນນະສູດສົບຈາກອອສເຕຣບເລຍ ແມ່ນໄດ້ໃຫ້ການຊ່ອຍເຫຼືອແກ່ອິນໂດເນເຊຍ ໃນການລະບຸສົບ ທັງຫຼາຍນັ້ນ.
ທີ່ຈາກາຕາ ໃນວັນຈັນຜ່ານມານີ້ ລັດຖະບານອິນໂດເນເຊຍໄດ້ສັ່ງໃຫ້ເຈົ້າໜ້າທີ່ການບິນ
ຫຼາຍຄົນພັກການເປັນການຊົ່ວຄາວ ຫຼັງຈາກທີ່ໄດ້ໃຫ້ເຮືອບິນສາຍການບິນ AirAsia ຖ້ຽວ
ບິນ 8501 ບິນໂດຍທີ່ບໍ່ມີໃບອະນຸຍາດບິນ ຢ່າງຄົບຖ້ວນ ຂອງມື້ ທີ່ຖ້ຽວບິນດັ່ງກ່າວຕົກນັ້ນ.
ກະຊວງຄົມມະນາຄົມແລະຂົນສົ່ງ ໄດ້ກ່າວວ່າ ເຮືອບິນລຳທີ່ວ່ານີ້ ແມ່ນໄດ້ຮັບອະນຸຍາດໃຫ້ບິນໃນເສັ້ນທາງ ຈາກເມືອງ Surabaya ສູ່ສິງກະໂປ ໃນວັນຈັນ ວັນອັງຄານ ວັນພຸດ ແລະວັນເສົາ, ແຕ່ວ່າ ເຮືອບິນທີ່ວ່ານີ້ ກໍໄດ້ບິນອອກ ໃນວັນອາທິດ. ກະຊວງຄົມມະນາຄົມແລະຂົນສົ່ງ ຍັງໄດ້ໂຈະຖ້ຽວບິນຂອງ AirAsia ທັງຫຼາຍ ໃນເສັ້ນທາງບິນທີ່ວ່ານີ້ ແລະຈະທຳການສືບສວນຢ່າງລະອຽດ ແຍກອອກໄປຈາກການສືບສວນກ່ຽວກັບອຸປະຕິເຫດນັ້ນ.
ກ່ອນທີ່ຈະບິນອອກແລະໃນນາທີສຸດທ້າຍຂອງຖ້ຽວບິນ, ນັກບິນໄດ້ຂໍອະນຸຍາດບິນຂຶ້ນສູງກວ່າປົກກະຕິ ເພື່ອລົບຫລີກພາຍຸ ແຕ່ການຂໍອະນຸຍາດນັ້ນໄດ້ຖືກປະຕິເສດ ເພາະວ່າ ມີ
ຍົນອີກລຳອື່ນ ບິນຢູ່ໃນລະດັບນັ້ນແລ້ວ.
ການຄົ້ນພົບ ສ່ວນຫາງ ຂອງເຮືອບິນ AirAsia
