ໜ່ວຍຮັກສາຄວາມປອດໄພທາງທະເລຂອງ ອິນໂດເນເຊຍ ກ່າວໃນວັນພະຫັດ ມື້ນີ້ວ່າ ກໍາປັ່ນຍາມຝັ່ງຂອງຈີນ ຖືກຂັບໄລ່ອອກຈາກຂົງເຂດຫນ່ານນ້ຳຂອງ ອິນໂດເນເຊຍ ເປັນຄັ້ງທີ 2 ໃນອາທິດນີ້ ລຸນຫຼັງຂະບວບກໍາປັ່ນດັ່ງກ່າວໄດ້ລົບ ກວນການສຳຫຼວດຂອງບໍລິສັດພະລັງງານລັດ ເປີຕາມິນາ (Pertamina) ໃນຂົງເຂດທະເລຈີນໃຕ້.
ເຖິງແມ່ນກຳປັ່ນຍາມຝັ່ງຂອງຈີນຈະຖືກພົບເຫັນເປັນຈຳນວນຫຼວງຫຼາຍຢູ່ເຂດເສດຖະກິດຈຳເພາະ ຫຼຶ EEZ ຂອງ ອິນໂດເນເຊຍ ກໍຕາມ, ແຕ່ເຫດການຄັ້ງຫຼ້າສຸດໄດ້ເກີດຂຶ້ນພຽງບໍ່ເທົ່າໃດມື້ລຸນຫຼັງ ທ່ານ ປຣາໂບໂວ ຊູບຽນໂຕ (Prabowo Subianto) ເຂົ້າຮັບຕຳແໜ່ງປະທານາທິບໍດີຂອງ ອິນໂດເນເຊຍ.
ຈີນ, ໄດ້ອ້າງເອົາອະທິປະໄຕເກືອບທັງໝົດໃນຂົງເຂດທະເລຈີນໃຕ້ ໂດຍຜ່ານ “ເສັ້ນຂີດຕໍ່ເກົ້າເສັ້ນ” ໃນແຜນທີ່ ທີ່ຕັດເຂົ້າໄປໃນເຂດເສດຖະກິດຈຳເພາະ ຫຼື EEZ 200 ກິໂລແມັດຂອງທະເລ ມາເລເຊຍ, ບຣູໄນ, ຟີລິບປິນ, ອິນໂດເນເຊຍ ແລະ ຫວຽດນາມ.
ສານຕັດສິນຊີ້ຂາດຖາວອນຢູ່ນະຄອນ ເຮັກ (Hague) ກ່າວໃນປີ 2016 ວ່າ ການກ່າວອ້າງຂອງ ຈີນ ບໍ່ໄດ້ຢູ່ໃນພື້ນຖານພາຍໃຕ້ກົດໝາຍສາກົນ, ເຊິ່ງເປັນ ການຕັດສິນທີ່ ປັກກິ່ງ ບໍ່ຮັບຮູ້.
ເຫດການຕ່າງໆດັ່ງກ່າວ ເກີດຂຶ້ນຢູ່ນອກໝູ່ເກາະ ນາທູນາ (Natuna) ຂອງ ອິນໂດເນເຊຍ, ໂດຍມີໄລຍະຫ່າງຈາກເກາະ ໄຫໜານ (Hainan) ຂອງ ຈີນປະມານ 1,500 ກິໂລແມັດ, ເຊິ່ງຍັງບໍ່ມີການລະບຸຂົງເຂດຢ່າງຈະແຈ້ງ ໃນທັນທີ.
ໃນຖະແຫຼງການສະບັບນຶ່ງເປີດເຜີຍວ່າ ເມື່ອວັນຈັນທີ່ຜ່ານມາ ກຳປັ່ນຂອງ ຈີນ ໄດ້ອອກມາຢືນຢັນວ່າ ຂົງເຂດດັ່ງກ່າວເປັນພື້ນທີ່ຖືກຕ້ອງຕາມກົດໝາຍຂອງຈີນ, ອີງຕາມອົງການຮັກສາຄວາມປອດໄພທາງທະເລຂອງ ອິນໂດເນເຊຍ ທີ່ຮູ້ຈັກກັນໃນນາມ ບາຄໍາລາ (Bakamla).
ທາງອົງການກ່າວໃນວັນຈັນແລ້ວນີ້ວ່າ “ອົງການ Bakamla ຈະສືບຕໍ່ລາດຕະເວນ ແລະຕິດຕາມກວດກາຫນ່ານນໍ້າທາງພາກເໜືອຂອງໝູ່ເກາະ Natuna ເພື່ອໃຫ້ໝັ້ນໃຈວ່າ ການເກັບກໍາຂໍ້ມູນກ່ຽວກັບແຜ່ນດິນໄຫວ ສາມາດດໍາເນີນໄປໄດ້ໂດຍບໍ່ມີການລົບກວນອະທິປະໄຕຂອງ ອິນໂດເນເຊຍ.”
ພວກເຂົາກ່າວໃນວັນພະຫັດມື້ນີ້ວ່າ ກຳປັ່ນຂອງຈີນໄດ້ກັບຄືນມາໃນຂົງເຂດດັ່ງ ກ່າວ ແຕ່ໄດ້ຖືກສະກັດກັ້ນ ແລະຖືກຂັບໄລ່ອອກໄປອີກ, ເຊິ່ງທາງອົງການບໍ່ໄດ້ໃຫ້ລາຍລະອຽດໃດໆກ່ຽວກັບສິ່ງທີ່ການດໍາເນີນງານຂອງກໍາປັ່ນດັ່ງກ່າວ.
ໂຄສົກກະຊວງການຕ່າງປະເທດຈີນ ທ່ານ ຫຼິນ ຈຽນ ກ່າວໃນວັນພະຫັດມື້ນີ້ວ່າ ໜ່ວຍຍາມຝັ່ງຂອງຕົນດຳເນີນ “ການລ່ອງເຮືອໃນເສັ້ນທາງນ້ຳຕາມປົກກະຕິ ທີ່ຖືກຕ້ອງຕາມກົດໝາຍຈີນ ພາຍໃຕ້ກົດໝາຍສາກົນ ແລະກົດໝາຍພາຍ ໃນປະເທດ.”
ທ່ານກ່າວຕື່ມວ່າ ຈີນ ຍິນດີເພີ້ມທະວີການຫາລືກັບ ອິນໂດເນເຊຍ ເພື່ອ “ຈັດການບັນຫາທະເລລະຫວ່າງສອງປະເທດຢ່າງເໝາະສົມ.”
ຟໍຣັມສະແດງຄວາມຄິດເຫັນ