ກົມສໍາຫຼວດທໍລະນີວິທະຍາສະຫະລັດກ່າວວ່າ ໄດ້ເກີດແຜ່ນດິນໄຫວທີ່ມີຄວາມແຮງ 8.6 ຣິກເຕີຢູ່ນອກຝັ່ງທະເລທາງກໍ້າຕາເວັນຕົກສຽງເໜືອຂອງອິນໂດເນເຊຍ ຊຶ່ງພາໃຫ້ມີຄວາມຢ້ານກົວກັນວ່າ ຈະເກີດຄື້ນຟອງຍັກສຸນະມິໃນທົ່ວພາກພື້ນມະຫາສະມຸດອິນເດຍນັ້ນ.
ແຜ່ນດິນໄຫວໄດ້ເກີດຂຶ້ນຢູ່ນອກຝັ່ງທະເລອອກໄປປະມານ 430 ຫຼັກ ກິໂລແມັດທາງທິດຕາເວັນຕົກສຽງໃຕ້ຂອງເມືອງ Banda Aceh ຊຶ່ງ ເປັນເມືອງຫຼວງ ແລະເມືອງໃຫຍ່ທີ່ສຸດຂອງແຂວງ Aceh ແລະຢູ່ເລິກລົງໄປຈາກໜ້ານໍ້າປະມານ 22 ຫຼັກ.
ໃນປີ 2004 ແຜ່ນດິນໄຫວຄັ້ງໃຫຍ່ທີ່ສຸດ ທີ່ມີຄວາມແຮງ 9.1 ຣິກເຕີໄດ້ ເກີດຂຶ້ນຢູ່ນອກຝັ່ງທະເລເກາະຊູມາຕຣາ ຂອງອິນໂດເນເຊຍ ເຮັດໃຫ້ເກີດຄື້ນຟອງສຸນະມິໃນມະຫາສະມຸດອິນເດຍຊຶ່ງໄດ້ເອົາຊີວິດຜູ້ຄົນໄປ 230 ພັນ ຄົນ ປະມານເຄິ່ງນຶ່ງຂອງພວກທີ່ເສຍຊີວິດໄປນັ້ນແມ່ນຢູ່ໃນແຂວງ Aceh.
ແຜ່ນດິນໄຫວໃນວັນພຸດມື້ນີ້ ແມ່ນຢູ່ເລິກລົງໄປໃນລະດັບດຽວກັນກັບປີ 2004 ໃນມະຫາ
ສະມຸດອິນເດຍ ຊຶ່ງລາຍງານເວົ້າວ່າ ໄດ້ສັ່ນສະເທືອນພວກຕຶກອາຄານຫຼາຍຫຼັງໃນໄລຍະ
ໄກໄປຮອດສິງກະໂປ ໄທແລະອິນເດຍ.
ສູນເຕືອນໄພສຸນະມິໃນມະຫາສະມຸດປາຊີຟິກ ໄດ້ອອກຄໍາເຕືອນໃຫ້ລະວັງໄພຄື້ນຟອງສຸ
ນະມິດໄປຍັງ 28 ປະເທດແລະດິນແດນແຄມມະຫາສະມຸດອິນເດຍ ແລະເຕືອນວ່າ ແຜ່ນ
ດິນໄຫວທີ່ມີຄວາມແຮງຂະໜາດນີ້ມີຄວາມສາມາດບົ່ມຊ້ອນພາໃຫ້ເກີດຄື້ນຟອງສຸນະມິທີ່
ສາມາດທໍາລາຍຢ່າງກວ້າງຂວາງໄດ້ ແຕ່ສູນການເຕືອນໄພດັ່ງກ່າວ ເວົ້າເຊ່ນກັນວ່າ ຕົນຍັງບໍ່ທັນໄດ້ຮັບການຢືນຢັນໃດໆກ່ຽວກັບການເກີດຄື້ນຟອງສຸນະມິນັ້ນ.
ທີ່ໄທ ທາງການກໍາລັງພາກັນຂຸ້ນຂ້ຽວອົບພະຍົບພວກຜູ້ຄົນທີ່ໄປທ່ອງທ່ຽວອອກຈາກຊາຍ
ຫາດຕ່າງໆ. ໄດ້ມີການອອກຄໍາເຕືອນໄພກ່ຽວກັບຄື້ນຟອງສຸນະມິຕາມຫົວເມືອງຕ່າງໆ
ແຄມເກາະຊູມາຕຣາຂອງອິນໂດເນເຊຍນັ້ນ.