ຄະນະຄົ້ນຫາ ແລະ ກອບກູ້ ໄດ້ພົບຊາກຂອງເຮືອບິນອິນໂດເນເຊຍ ທີ່ໄດ້ຕົກລົງໃນ
ທະເລ ຈາວາ ພຽງບໍ່ເທົ່າໃດນາທີ ຫຼັງຈາກໄດ້ບິນຂຶ້ນ ຈາກສະໜາມບິນ ຈາກາຕາ ໃນ
ຕອນເຊົ້າວັນຈັນທີ່ຜ່ານມາ.
ຜູ້ບັນຊາການກອງທັບ ທ່ານ ຮາດີ ຈາຈັນໂຕ ໄດ້ກ່າວໃນວັນພຸດມື້ນີ້ວ່າ ບັນດາເຈົ້າໜ້າ
ທີ່ “ເຊື່ອຢ່າງໜັກແໜ້ນ” ວ່າ ເຂົາເຈົ້າໄດ້ພົບຈຸດ ທີ່ຖ້ຽວບິນ JT610 ຂອງສາຍການບິນ
ໄລອອນ ເຊິ່ງໄດ້ຫາຍໄປຈາກຈໍເຣດາ ຫຼັງຈາກໄດ້ບິນຂຶ້ນ ເພື່ອເດີນທາງໄປເກາະ
ບັງກາ-ເບລິຕຸງ ທີ່ຢູ່ໃກ້ຄຽງ. ເຈົ້າໜ້າທີ່ກອງທັບເຮືອ ທ່ານ ແຮຣິສ ໂຈໂກ ນູໂກຣໂຮ
ໄດ້ກ່າວຕໍ່ສະຖານີໂທລະພາບ ອິນໂດເນເຊຍ ວ່າວັດຖຸຍາວ 22 ແມັດ ໄດ້ຖືກພົບເຫັນ
ໄດ້ຕອນເດິກຂອງວັນອັງຄານວານນີ້. ທ່ານ ນູໂກຣໂຮ ໄດ້ກ່າວວ່າ ນັກດຳນ້ຳຈະຖືກສົ່ງ
ໄປສຳຫຼວດວັດຖຸດັ່ງກ່າວ ຫຼັງຈາກເຂົາເຈົ້າໄດ້ທຳການສະແກນໃຕ້ນ້ຳ ເພື່ອຫາຮູບທີ່ມີ
ລາຍລະອຽດກວ່າເກົ່າ.
ການຊອກຫາຈຸດຂອງຊາກເຮືອບິນ ໄດ້ຈະເຮັດໃຫ້ກຸ່ມນັກຊ່ວຍເຫຼືອ ຫຍັບໃກ້ເຂົ້າອີກ
ນຶ່ງບາດກ້າວ ໃນການກອບກູ້ກ່ອງບັນທຶກສຽງ ແລະ ບັນທຶກຂໍ້ມູນການບິນ ທີ່ຮູ້ຈັກກັນ
ວ່າ ກ່ອງດຳນັ້ນ, ເຊິ່ງມັນຈະໃຫ້ຂໍ້ມູນທີ່ສຳຄັນ ກ່ຽວກັບວ່າ ເປັນຫຍັງຄົນຂັບເຮືອບິນ
ຈຶ່ງຂໍບິນກັບຄືນສູ່ສະໜາມບິນ ບໍ່ດົນຫຼັງຈາກໄດ້ບິນຂຶ້ນ.
ຜູ້ໂດຍສານທັງໝົດ 189 ຄົນ ແລະ ກັບພະນັກງານເຮືອບິນໄດ້ເສຍຊີວິດໃນອຸບັດຕິ
ເຫດດັ່ງກ່າວນັ້ນ. ບັນດານັກດຳນ້ຳທີ່ເຂົ້າຮ່ວມໃນການຄົ້ນຫາ ແລະ ກອບກູ້ດັ່ງກ່າວ
ໄດ້ພົບຊາກສົບຂອງມະນຸດຫຼາຍພໍ ທີ່ຈະເອົາໃສ່ຖົງສົບຫຼາຍເຖິງ 48 ຖົງ ຈາກສະຖານ
ທີ່ເກີດອຸບັດຕິເຫດ.
