ໄດ້ມີການຮຽກຮ້ອງໃຫ້ພວກປະເທດໃນເອເຊຍ ດໍາເນີນການຫລາຍຂຶ້ນແລະໃຫ້ໃຊ້ຈ່າຍເງິນຫລາຍຂຶ້ນ ເພື່ອຊ່ອຍລົບລ້າງຄວາມທຸກຈົນຢ່າງຮ້າຍແຮງທີ່ສຸດໃນໂລກ.
ຄໍາຮຽກຮ້ອງດັ່ງກ່າວໄດ້ອອກມາຈາກການໂອ້ລົມສົນທະນາກັນຂອງຄະນະກໍາມະ ການນຶ່ງໃນວັນຈັນມື້ນີ້ ໃນຕອນອັດກອງປະຊຸມກ່ຽວກັບເອເຊຍຕາເວັນອອກ ຂອງ ສະພາເສດຖະກິດໂລກ ຊຶ່ງມີພວກຜູ້ນໍາລັດຖະບານ ຕະຫລອດທັງວົງການທຸລະກິດແລະສັງຄົມພົນລະເມືອງ ຫລາຍກວ່າ 500 ທ່ານ ເຂົ້າຮ່ວມກອງປະຊຸມເປັນເວລາ 2 ມື້ດ່ັງກ່າວ ທີ່ຈັດຂຶ້ນເປັນເທື່ອທໍາອິດໃນນະຄອນຫລວງຈາກາຕາ ຂອງ ອິນໂດເນເຊຍ.
ທ່ານ Rajat Nag ຜູ້ອໍານວຍການທົ່ວໄປຂອງທະນາຄານພັດທະນາເອເຊຍໃຫ້ຂໍ້ສັງເກດວ່າ
ການເຕີບໂຕທາງດ້ານເສດຖະກິດຢ່າງໄວຂອງເອເຊຍ ໄດ້ຍົກສູງມາດ ຕະຖານການຄອງຊີບ
ຂອງປະຊາຊົນຫລາຍລ້ານຄົນ ແຕ່ທ່ານໄດ້ຮຽກຮ້ອງໃຫ້ພວກລັດຖະບານປະເທດຕ່າງໆໃນ
ເອເຊຍ ຂຶ້ນຄ່າພາສີ ແລະໃຫ້ຈັດສັນຊັບພະຍາກອນຂອງຫລວງໄປຊ່ອຍເຫລືອພວກປະຊາ
ຊົນຈໍານວນເກືອບ 1 ພັນລ້ານຄົນ ທີ່ຍັງດໍາລົງຊີວິດຢູ່ໃນຄວາມທຸກຈົນທີ່ສຸດໃນໂລກນັ້ນ.
ທ່ານ Jeffrey Sachs ນັກເສດຖະສາດອາເມຣິກັນເຫັນພ້ອມນໍາທີ່ວ່າເອເຊຍຈະຕ້ອງຮັບ
ພາລະຫລາຍຂຶ້ນໃນການຊ່ອຍບັນເທົາຄວາມທຸກຈົນໃນໂລກນັ້ນ ແລະ ທ່ານກ່າວວ່າ
ການຟື້ນໂຕຄືນຢ່າງຊ້າໆຂອງເສດຖະກິດໃນພວກປະເທດທີ່ພັດທະນາແລ້ວນັ້ນ ໄດ້ເຮັດ
ໃຫ້ສະຫະລັດແລະຢູໂຣບບໍ່ມີຄວາມເຕັມໃຈ ຫລືບໍ່ສາມາດທີ່ຈະຮັບພາລະໄດ້.
ປະທານາທິບໍດີໂຊຊີໂລບໍາບັງ ຢຸດໂທໂຢໂນະ ໄດ້ໄຂກອງປະຊຸມດັ່ງກ່າວໃນວັນອາທິດ
ວານນີ້ ດ້ວຍການເຕືອນວ່າ ການເຕີບໂຕຂຶ້ນຢ່າງໄວທາງດ້ານເສດຖະກິດຂອງເອເຊຍ
ຈະໝາຍຄວາມວ່າ ຈະມີການແຂ່ງຂັນກັນຫລາຍຂຶ້ນ ສໍາລັບແຫລ່ງ ຊັບພະຍາກອນທໍາ
ມະຊາດທີ່ມີຢ່າງຈໍາກັດນັ້ນ ແລະທ່ານໄດ້ຮຽກຮ້ອງໃຫ້ພວກຜູ້ນໍາດ້ານການເມືອງແລະ
ດ້ານເສດຖະກິດໃຫ້ແກ້ໄຂຄວາມກົດດັນຕ່າງໆທີ່ມາຈາກຄວາມບໍ່ໜັ້ນຄົງ ດ້ານເຂົ້າປາ
ອາຫານ ພະລັງງານແລະນໍ້າ ນັ້ນ.
ຄັ້ງນີ້ນັບວ່າເປັນປີທີ 20 ທີ່ສະພາວ່າດ້ວຍເສດຖະກິດໂລກ ໄດ້ຈັດກອງປະຊຸມຂຶ້ນກ່ຽວ
ກັບເອເຊຍຕາເວັນອອກ. ສະພາທີວ່ານີ້ເປັນທີ່ຮູ້ຈັກກັນດີ ຍ້ອນກອງປະຊຸມປະຈໍາປີທີ່
ຈັດຂຶ້ນໃນເມືອງຕາກອາກາດ Davos ຂອງປະເທດ Switzerland.
