ໃນວັນພະຫັດມື້ນີ້ພະນັກງານກູ້ໄພໃນປະເທດ ອິນໂດເນເຊຍ ໄດ້ຊອກຫາປະຊາຊົນຜູ້ທີ່ ອາດຕິດຄ້າງຢູ່ ມື້ໜຶ່ງຫຼັງຈາກເຫດແຜ່ນດິນໄຫວໄດ້ເກີດຂຶ້ນໃນແຂວງ Aceh, ໃນຂະນະ ທີ່ບັນດາເຈົ້າໜ້າທີ່ໄດ້ຮ້ອງຂໍການ ຊ່ວຍເຫລືອດ້ານວັດຖຸການແພດ ແລະ ອຸປະກອນອື່ນໆ ເພື່ອນຳໄປຊ່ວຍຜູ້ທີ່ໄດ້ຮັບບາດເຈັບ ຫຼື ບໍ່ມີທີ່ຢູ່.
ແຜນດິນໄຫວທີ່ມີຄວາມແຮງ 6.5 ໄດ້ເຮັດໃຫ້ປະຊາຊົນຫຼາຍກວ່າ 100 ຄົນເສຍຊີວິດ ແລະ ໄດ້ຮັບບາດເຈັບຫຼາຍກວ່າ 600 ຄົນ. ມັນໄດ້ເກີດຂຶ້ນຢູ່ເຂດເໜືອສຸດຂອງເກາະ ສຸ ມາດຕຣາ ໃນຕອນເຊົ້າຂອງວັນພຸດວານນີ້, ເຮັດໃຫ້ເຮືອນຫຼາຍສິບຫຼັງພັງລົງ, ພ້ອມກັບ ເມືອງ Pidie Jaya ເປັນເມືອງທີ່ໄດ້ຮັບຜົນກະທົບຮຸນແຮງສຸດ.
ປະຊາຊົນຫຼາຍພັນຄົນໄດ້ໄປອາໄສຢູ່ໃນວັດອິສລາມ ແລະ ບ່ອນພັກ ຊົ່ວຄາວແຫ່ງອື່ນໆ, ໃນຂະນະທີ່ຄົນອີກຈຳນວນໜຶ່ງພາກັນນອນຢູ່ພາຍນອກ. ລັດຖະບານໄດ້ປະກາດພາວະ ສຸກເສີນ 2 ສັບປະດາໃນແຂວງ Aceh.
ອົງການກາງແດງ ອິນໂດເນເຊຍ ໄດ້ແຈກຢາຍຜ້າຫົ່ມ, ອຸປະກອນສຸຂະອະນາໄມ ແລະ ຜ້າຢາງໃຫ້ຜູ້ທີ່ໄດ້ຮັບຜົນກະທົບໂດຍເຫດແຜ່ນດິນໄຫວ ແລະ ໄດ້ຮຽກຮ້ອງໃຫ້ປະຊາຊົນ ບໍລິຈາກເລືອດເພື່ອຊ່ວຍເຫຼືອຜູ້ທີ່ໄດ້ຮັບບາດເຈັບ.
ບັນດາອາສາສະໝັກຍັງໄດ້ເດີນທາງໄປເຂດທີ່ໄດ້ຮັບຜົນກະທົບໂດຍແຜ່ນດິນໄຫວ ເພື່ອ ເລັ່ງສົ່ງຄົນໄປໂຮງໝໍ, ເຊິ່ງຕອນນີ້ມີຄົນເຈັບລົ້ນເຫຼືອແລ້ວ.
ທ່ານ Sutopo Nugroho ໂຄສົກຈາກອົງການຄຸ້ມຄອງໄພພິບັດແຫ່ງຊາດຂອງ ອິນໂດເນ ເຊຍ ໄດ້ກ່າວວ່າ “ຕອນນີ້ພວກເຮົາແມ່ນກຳລັງ ເພັ່ງເລັງໃສ່ການຄົ້ນຫາຜູ້ປະສົບເຄາະ ຮ້າຍ ແລະ ຜູ້ທີ່ອາດລອດຊີວິດ.”
ອີງຕາມການກ່າວຂອງທ່ານ Nugroho, ພະນັກງານຢ່າງໜ້ອຍ 1,000 ຄົນ ລວມທັງເຈົ້າ ໜ້າທີ່, ທະຫານ, ແລະ ອາສາສະໝັກ ໄດ້ຖືກສົ່ງໄປສະຖານທີ່ເກີດເຫດເພື່ອຊ່ວຍເຫຼືອຜູ້ທີ່ ໄດ້ຮັບເຄາະຮ້າຍ.
