ກຳປູເຈຍແລະໄທໄດ້ຕົກລົງ ທີ່ຈະເປີດການເຈລະຈາຢູ່ອິນ
ໂດເນເຊຍໃນເດືອນນີ້ ໂດຍແນໃສ່ຫາທາງຫຼຸດຜ່ອນຄວາມ
ເຄັ່ງຕຶງຢູ່ຕາມບໍລິເວນຊາຍແດນທີ່ໄດ້ເພີ່ມທະວີຄວາມຮ້າຍ
ແຮງຂຶ້ນຍ້ອນການຍິງປືນໃຫຍ່ໂຈມຕີກັນຢ່າງຮ້າຍແຮງໃກ້
ບໍລິເວນວັດຂະເໝນບູຮານ ທີ່ເຂົາພະວິຫານຊຶ່ງສ້າງໃນສັດ
ຕະວັດທີ 11 ນັ້ນ.
ການເຈລະຈາເປັນເວລາ 2 ມື້ທີ່ໄດ້ຮັບການສະໜັບສະໜຸນ
ໂດຍສະມາຄົມບັນດາປະຊາຊາຊາດໃນເຂດເອເຊຍຕາເວັນ
ອອກສຽງໃຕ້ຫຼືອາຊ່ຽນນັ້ນມີກຳນົດຈະເລີ້ມຂຶ້ນໃນວັນທີ 24
ມີນານີ້ ທີ່ເມືອງ Bogor ປະເທດອິນໂດເນເຊຍ.
ບັນຫາຂັດແຍ້ງກ່ຽວກັບດິນທີ່ຢູ່ຕິດກັບວັດເຂົາພະວິຫານນັ້ນ
ໄດ້ພາໃຫ້ມີການຍິງປືນໃຫຍ່ໂຈມຕີກັນເປັນເວລາ 4 ມື້ໃນ
ເດືອນແລ້ວ ທີ່ເປັນເຫດໃຫ້ມີຜູ້ເສຍຊີວິດຢ່າງນ້ອຍ 10 ຄົນ
ແລະໄດ້ຮັບບາດເຈັບອີກຫຼາຍສິບຄົນ.
ທັງໄທແລະກຳປູເຈຍຕ່າງກໍກ່າວຫາອີກຝ່າຍນຶ່ງວ່າ ເປັນຜູ້ເລີ່ມຍິງກ່ອນແລະນັບແຕ່ນັ້ນມາ
ກໍໄດ້ຕົກລົງໃຫ້ມີການຈັດສົ່ງຄະນະສັງເກດການທະຫານຂອງອິນໂດເນເຊຍ 30 ຄົນໄປຍັງ
ບໍລິເວນຊາຍແດນທີ່ມີການຂັດແຍ້ງ.
ສານໂລກໄດ້ຕັດສິນໃນປີ 1962 ມອບວັດດັ່ງກ່າວໃຫ້ກຳປູເຈຍແຕ່ປະເທດທັງສອງຍັງບໍ່ສາ
ມາດຕົກລົງກັນໄດ້ກ່ຽວກັບກຳມະສິດຂອງດິນຕອນນ້ອຍໆໃນບໍລິເວນອ້ອມແອ້ມວັດດັ່ງກ່າວ.
ຄວາມເຄັ່ງຕຶງລະຫວ່າງໄທ ແລະກຳປູເຈຍ ໄດ້ລະເບີດຂຶ້ນ ໃນປີ 2008 ຫຼັງຈາກອົງການ
UNESCO ໄດ້ຈັດເອົາວັດເຂົາພະວິຫານ ເຂົ້າໄວ້ໃນບັນຊີສະຖານທີ່ມໍລະດົກໂລກ.
