ລິ້ງ ສຳຫລັບເຂົ້າຫາ

ວັນເສົາ, ໒໐ ເມສາ ໒໐໒໔

ອິນໂດເນເຊຍຈະຈັດເອົາ ບັນຫາສິດທິມະນຸດ ເປັນບຸລິມະສິດຂອງອາຊ່ຽນ


ຕໍາຫລວດມຽນມາ ທີ່ປະກອບອາວຸດຄົບຊຸດ ຢືນກຽມຮັບມື ກັບການຈະລາຈົນ ທີ່ອາດເກີດຂຶ້ນໄດ້ ກ່ອນການປ່ອຍໂຕທ່ານນາງ ອອງ ຊານ ຊູ ຈີ, ວັນທີ 13 ພະຈິກ 2010
ຕໍາຫລວດມຽນມາ ທີ່ປະກອບອາວຸດຄົບຊຸດ ຢືນກຽມຮັບມື ກັບການຈະລາຈົນ ທີ່ອາດເກີດຂຶ້ນໄດ້ ກ່ອນການປ່ອຍໂຕທ່ານນາງ ອອງ ຊານ ຊູ ຈີ, ວັນທີ 13 ພະຈິກ 2010

ລັດຖະມົນຕີຕ່າງປະເທດອິນໂດເນເຊຍກ່າວວ່າ ລັດຖະບານຂອງທ່ານຈະຈັດເອົາເລຶ່ອງ ສິດທິມະນຸດ ໃຫ້ເປັນບຸລິມະສິດອັນນຶ່ງສໍາລັບສະມາຄົມກຸ່ມປະຊາຊາດແຫ່ງຂົງເຂດເອເຊຍ ຕາເວັນອອກສຽງໃຕ້ ຫລືສະມາຄົມອາຊ່ຽນ.

ປີນີ້ ອິນໂດເນເຊຍໄດ້ເປັນປະທານໝຸນ​ວຽນ​ຂອງສະມາຄົມ
ອາຊ່ຽນ. ໃນການຖະແຫລງຂ່າວບັ້ນນຶ່ງເມື່ອວັນສຸກຜ່ານມາ
ນີ້ ທ່ານມາຕີ ນາຕາລີກາວາ ລັດຖະມົນຕີຕ່າງປະເທດອິນ
ໂດເນເຊຍກ່າວວ່າ ອິນໂດເນເຊຍວາງແຜນການທີ່ຈະຈັດ
ເອົາເລຶ່ອງສິດທິມະນຸດໃຫ້ເປັນບຸລິມະສິດອັນ​ດັບ​ສູງ​ອັນ​ນຶ່ງ ສໍາລັບກຸ່ມຈັດ​ຕັ້ງປະຈໍາຂົງເຂດດັ່ງກ່າວ.

ທ່ານ ກ່າວວ່າ ອິນໂດເນເຊຍຫວັງວ່າ ໃນປີ 2011 ນີ້
ຄະນະກໍາມາ​ທິການດ້ານສິດທິມະນຸດຂອງສະມາຄົມອາຊ່ຽນ
ຈະມີປະສິດທິຜົນຫລາຍຂື້ນ ໃນການປະຕິບັດງານພາລະ
ໜ້າ​ທີ່ຂອງຕົນ ໃຫ້ເຕັມເມັດເຕັມໜ່ວຍ ເພື່ອສະແດງໃຫ້
ເຫັນເຖິງຄວາມໝັ້ນໝາຍຂອງສະມາຄົມອາຊ່ຽນ ຕໍ່​ການ
ເຄົາລົບນັບຖືສິດທິມະນຸດນັ້ນ. ສະມາຄົມອາຊ່ຽນສັບປ່ຽນ
ຕໍາ​ແໜ່​ງຜູ້ນໍາ ໃນລະຫວ່າງສະມາຊິກຂອງຕົນ ໃນທຸກໆປີ.

ທ່ານ ປະ​ວິນ ຊັດ​ສະ​ວານ​ພົງພັນ ນັກວິເຄາະທີ່ສະຖາບັນ
ສຶກສາກ່ຽວ​ກັບເອເຊຍຕາເວັນອອກສຽງ​ໃຕ້ທີ່ສິງຄະໂປ ກ່າວວ່າ ການເນັ້ນຍໍ້າຄວາມ​ສໍາຄັນ​ ໃສ່​ເລື້ອງສິດທິມະນຸດ ຖືວ່າເປັນການປ່ຽນແປງຄັ້ງໃຫຍ່ ຈາກອະດີດຜ່ານມາ.

ທ່ານ​ປະ​ວິນ​ກ່າວ​ວ່າ ຜ່ານ​ມາ ອົງການປະຈໍາຂົງເຂດທີ່​ວ່າ​ນີ້ ໄດ້ປະສົບຜົນສໍາເລັດໃນບັນຫາ
ຕ່າງໆ ທີ່ໄດ້ຮັບການເຫັນພ້ອມຢ່າງກວ້າງຂວາງ ເປັນຕົ້ນວ່າ ການສົ່ງເສີມການຄ້າເສລີແລະ
ບັນຫາຄວາມໝັ້ນຄົງຕ່າງໆຂອງຂົງເຂດ.

ແຕ່ທ່ານກ່າວຕື່ມວ່າ ການຍົກເອົາບັນຫາຕ່າງໆທີ່ມັກເປັນຂໍ້ໂຕ້ຖຽງກັນ ເຊັ່ນບັນຫາສິດທິ
ມະນຸດນັ້ນ ມາໂອ້ລົມກັນ ອາດຈະຖືກມອງເຫັນໂດຍບາງຄົນວ່າ ເປັນການຝ່າຝືນຫລັກການ
ຂອງສະມາຄົມອາຊ່ຽນ ທີ່ບົ່ງໄວ້ວ່າ ຈະບໍ່ແຊກແຊງ​ເຂົ້າ​ໃນກິດຈະການພາຍໃນຂອງປະເທດ​ ສະມາຊິກຂອງຕົນ. ທ່ານ​ປະ​ວິນ​ເວົ້າ​ວ່າ

"ບັນດາປະເທດສະມາຊິກຍິນດີທີ່ຈະເວົ້າກັນເລຶ່ອງສິດທິມະນຸດ ຕາບໃດທີ່ມັນບໍ່
ກະທົບກະ​ເທືອ​ນຕໍ່ຜົນປະໂຫຍດຢ່າງໃດຢ່າງນຶ່ງ ຂອງປະເທດຂອງພວກເຂົາເຈົ້າ ແຕ່ຖ້າເວົ້າເຖິງບັນຫາທີ່ໜັກໜ່ວງຕ່າງໆ ເຊັ່ນປະຊາທິປະໄຕ ແລະສິດທິມະນຸດ
ນັ້ນ ພວກເຮົາຕ້ອງຍອມຮັບວ່າ ບໍ່​ແມ່ນ​ວ່າ​ໝົດ​ທຸກປະເທດສະມາຊິກຂອງອາຊ່ຽນ
ເປັນປະເທດປະຊາທິປະໄຕ."

ໃນສິບປະເທດສະມາຊິກຂອງສະມາຄົມອາຊ່ຽນນັ້ນ ສປປ ລາວ ແລະຫວຽດນາມ ມີລັດຖະ
ບານທີ່​ມີພັກດຽວ ​ແລະນໍາພາໂດຍພັກຄອມມີວນີສ. ພວກກຸ່ມສິດທິມະນຸດທັງ​ຫລາຍ ຖືວ່າ
ລັດຖະບານທະຫານມຽນມາ ​ແມ່ນ​ນຶ່ງ​ໃນບັນດາລັດຖະບານ ທີ່ກົດ​ຂີ່ປາບປາມປະຊາຊົນ ​ຂອງ​ຕົນທີ່ສຸດ​ໃນໂລກ.

ຊົນເຜົ່າມຽນມາໄປຈົດທະບຽນເພື່ອປະ ກອບສ່ວນໃນການເລືອກຕັ້ງ, ວັນທີ 18 ຕຸລາ 2010. ການເລືອກຕັ້ງສະພາ ຄັ້ງທໍາອິດໃນຮອບ 20 ປີ ຂອງມຽນມາ ໄດ້ຈັດຂຶ້ນເມື່ອວັນທີ 7 ພະຈິກ 2010.
ຊົນເຜົ່າມຽນມາໄປຈົດທະບຽນເພື່ອປະ ກອບສ່ວນໃນການເລືອກຕັ້ງ, ວັນທີ 18 ຕຸລາ 2010. ການເລືອກຕັ້ງສະພາ ຄັ້ງທໍາອິດໃນຮອບ 20 ປີ ຂອງມຽນມາ ໄດ້ຈັດຂຶ້ນເມື່ອວັນທີ 7 ພະຈິກ 2010.

ການເລືອກຕັ້ງໃນພະມ້າ ຫລືທີ່ຮູ້ກັນໃນອີກ
ຊື່ນຶ່ງວ່າ ມຽນມາ ເມື່ອປີຜ່ານມານີ້ ໄດ້ນໍາເອົາ
ບັນຫາສິດທິມະນຸດພາຍໃນສະມາຄົມອາຊ່ຽນ
ຂື້ນມາຢູ່ຖັ້ນແຖວໜ້າ. ພວກທີ່ວິຈານລັດຖະ
ບານມຽນມາກ່າວວ່າ ລັດຖະບານ​ຈັດແຈງການ
ເລືອກຕັ້ງຂຶ້ນ​ມາ ເພື່ອຮັບປະກັນໃຫ້ຝ່າຍທະ
ຫານກໍາອໍານາດຢູ່ຕໍ່ໄປ. ພວກອົງການສິດ
ທິມະນຸດໄດ້ຕໍາໜິຕິຕຽນ ສະມາຄົມອາຊ່ຽນ
ທີ່ບໍ່ຕໍ່ວ່າມຽນມາ ກ່ຽວກັບການຝ່າຝືນສິດທິ ມະນຸດຢູ່ທີ່ນັ້ນ.

ທ່ານ ປະວິນ ຊັດສະວານພົງພັນ ກ່າວວ່າ
ຖ້າຫາກວ່າ ອິນໂດເນເຊຍຢາກ​ໃຫ້ສະມາຄົມ
ອາຊ່ຽນ ເອົາຈິງເອົາຈັງກ່ຽວກັບເລື້ອງສິດທິ
ມະນຸດນັ້ນແລ້ວ ອາ​ຊ່ຽນ​ກໍຕ້ອງ​ໄດ້ລົບລ້າງ
ຫລັກການບໍ່​ເຂົ້າແຊກແຊງຂອງຕົນນັ້ນເສຍ ກ່ອນ ຊຶ່ງທ່ານປະວິນ ກ່າວຕື່ມວ່າ:

"ນອກນີ້ ຂ້າພະເຈົ້າຍັງຄິດວ່າ ມັນເຖິງເວລາແລ້ວທີ່ສະມາຄົມອາຊ່ຽນຈະເລີ່ມ
ເວົ້າກັນ ເລຶ່ອງການລົງໂທດ​ແບບ​ໃດ​ແບບ​ນຶ່ງ ອາດຈະ​ບໍ່ຕ້ອງເຖິງຂັ້ນຂັບໄລ່
ສະມາຊິກອອກກໍ​ໄດ້ ​ແຕ່ມັນຕ້ອງ ມີການປະຕິບັດຕາມກົດ​ຂອງ​ສະມາຄົມ​ໃນ​
ລະດັບ​ໃດ​ລະດັບ​ນຶ່ງ ແລະການລົງໂທດໂດຍວິທີໃດນຶ່ງ ສໍາລັບນໍາໃຊ້ຕໍ່ສະມາ
ຊິກ ໃນກໍລະນີທີ່​ແລະ​ເຫັນ​ໄດ້​ວ່າສະມາຊິກປະ​ເທດນັ້ນ ບໍ່ປະຕິບັດຕາມກົດ."

ລັດຖະມົນຕີຕ່າງປະເທດອິນໂດເນເຊຍ ທ່ານ Marty Natalegawa (File)
ລັດຖະມົນຕີຕ່າງປະເທດອິນໂດເນເຊຍ ທ່ານ Marty Natalegawa (File)

ລັດຖະມົນຕີຕ່າງປະເທດອິນໂດ
ເນເຊຍ ທ່ານ ນາຕາລີກາວາ
ກ່າວວ່າ ສະຖານະການໃນມຽນ
ມາເມື່ອປີຜ່ານມານີ້ ໄດ້ມີສ່ວນ
ເຮັດ​ໃຫ້​ປະ​ເທດ​ຂອງ​ທ່ານ​ມີ
ຄວາມໝັ້ນໝາຍ ທີ່ຈະເນັ້ນຍໍ້າ
ໃສ່ບັນຫາສິດທິມະນຸດໃນສະມາ
ຄົມອາຊ່ຽນນັ້ນ. ແຕ່ທ່ານບໍ່ໄດ້
ແນະນໍາວ່າ ຄວນ​ມີການປະຕິ
ບັດການສະເພາະ​ແບບ​ໃດ ແລະ
ກ່າວວ່າ ສະຖານະການໃນມຽນ
ມາ​ໄດ້ດີຂື້ນແດ່ແລ້ວ ນັບຕັ້ງແຕ່
ການເລືອກຕັ້ງເປັນຕົ້ນມາ ຊຶ່ງ
ທ່ານໃຫ້ຂໍ້ສັງເກດໃນຕົວຢ່າງນຶ່ງ
ວ່າ ຜູ້ນໍາພັກຝ່າຍຄ້ານທ່ານນາງ
ອອງ ຊານ ຊູຈີ ກໍໄດ້ຖືກປ່ອຍ
ໃຫ້ເປັນອິດສະຫລະ ຈາກການຖືກກັກບໍລິເວນ​ແລ້ວ ຫລັງຈາກເລືອກຕັ້ງ.

ທ່ານ ນາຕາລີກາວາ ກ່າວໃນທີ່ສຸດວ່າ ແທນທີ່ຈະລົງໂທດຜູ້ຝ່າຝືນນັ້ນ ອິນໂດເນເຊຍມີ
ຄວາມຕັ້ງໃຈຈະໃຊ້ວິທີທາງການທູດແບບງຽບໆແລະສ້າງຄວາມເຫັນພ້ອງຕ້ອງກັນ ເພື່ອ​
ເກ້​ຍກ່ອມໃຫ້ບັນດາສະມາຊິກຂອງສະມາຄົມອາຊ່ຽນ ເຄົາລົບນັບຖືສິດທິມະນຸດ.

XS
SM
MD
LG