ທາງການອິນໂດເນເຊຍກ່າວໃນວັນອາທິດມື້ນີ້ວ່າ ເຂົາເຈົ້າໄດ້ຈັບກຸມນັກຕໍ່ສູ້ມຸສລິມຫົວຮຸນແຮງຄົນນຶ່ງ ທີ່ປະເທດຕ້ອງການໂຕທີ່ສຸດເພື່ອມາດໍາເນີນຄະດີ ທີ່ຖືກກ່າວຫາວ່າ ວາງແຜນທໍາການໂຈມຕີສະລະຊີບຫລາຍບັ້ນນັ້ນ.
ຕໍາຫລວດກ່າວວ່າ ນາຍ Beni Asri ໄດ້ຖືກຈັບກຸມໃນສັບປະດາແລ້ວນີ້ທີ່ເມືອງ Solok ໃນແຂວງຊູມາຕຣາຕາເວັນຕົກ.
ນາຍ Asri ຖືກສົງໄສວ່າເປັນຜູ້ຊ່ອຍເຫລືອໃນການວາງແຜນວາງລະເບີດສະລະຊີບໃນໂບດແຫ່ງນຶ່ງໃນເມືອງ Solo ແຂວງ Java ພາກກາງຂອງປະເທດໃນວັນທີ 25 ກັນຍາຜ່ານມານີ້ ທີ່ສົ່ງຜົນໃຫ້ພວກໄປໂບດໄດ້ຮັບບາດເຈັບ 22 ຄົນນັ້ນ.
ນອກນີ້ ຜູ້ກ່ຽວຍັງຖືກກ່າວຫາວ່າ ເປັນຜູ້ວາງແຜນທໍາການໂຈມຕີທໍານອງດຽວກັນນີ້ ທີ່ໂບດແຫ່ງນຶ່ງຂອງຕໍາຫລວດ ເມື່ອ 5 ເດືອນກ່ອນໃນເມືອງ Cirebon ທີ່ໄດ້ເຮັດໃຫ້ເຈົ້າໜ້າທີ່ຕໍາຫລວດ 30 ຄົນໄດ້ຮັບບາດເຈັບນັ້ນ.
