ຕໍາຫລວດອິນໂດເນເຊຍຈັບກຸມ ນັກບວດຫົວຮຸນແຮງ

ຕໍາຫລວດ​ອິນ​ໂດ​ເນ​ເຊຍ ກ່າວ​ວ່າ ​ເຂົາ​ເຈົ້າ​ໄດ້​ຈັບ​ກຸມ ນາຍ Abu BakarBashir ນັກ
ບວດ​ມຸສລິ​ມຫົວ​ຮຸນ​ແຮງ ​ໃນ​ຂໍ້​ຫາມີ​ສ່ວນພົວພັນ ​ກັບ​ເຄືອ​ຂ່າຍ​ກໍ່​ການ​ຮ້າຍ ​ຫົວ​ຮຸນ​ແຮງ
ກຸ່ມ​ໃໝ່. ໂຄສົກ​ກົມ​ຕໍາຫລວດ​ແຫ່ງ​ຊາດ​ ທ່ານ Edward Aritonangກ່າວ​ວ່າ ນາຍ
Bashir ​ໄດ້​ພົວພັນ​ນໍາ​ການ​ເຝິກອົບຮົມ ຄັດ​ເລືອກ​ເອົາ​ຜູ້​ນໍາວາງ​ແຜນ​ກໍ່​ການ​ຮ້າຍແລະ
ຫາ​ທຶນຮອນ​ໃຫ້​ກຸ່ມal-Qaida ​ໃນ​ແຂວງ ອາ​ເຈ ຊຶ່ງ​ເປັນ​ກຸ່ມກໍ່​ການ​ຮ້າຍ​ທີ່​ຫາ​ກໍ​ຈັດຕັ້ງ​ຂຶ້ນ​
ມາ​ໃໝ່ໆ ​ໂດຍ​ພວກ​ສະມາຊິກທີ່​ບໍ່ພໍ​ໃຈ​ຂອງ​ກຸ່ມ Jemaah Islamiyah ທີ່​ເປັນ​ຜູ້​ຮັບຜິດ
ຊອບການວາງ​ລະ​ເບີດ​ໂຈມ​ຕີ​ໃນ​ປີ 2002 ທີ່​ເກາະ​ຕາກ​ອາກາດ​ບາ​ຫລີ​ຂອງ​ອິນ​ໂດ​ເນ​ເຊຍ
ທີ່ໄດ້​ເຮັດ​ໃຫ້​ປະຊາຊົນ​ເສຍ​ຊີວິດ​ໄປ 202 ຄົນ​ນັ້ນ.

ເຈົ້າ​ໜ້າ​ທີ່​ກ່າວ​ວ່າ​ ນາຍ Bashir ​ໄດ້​ຖືກ​ຈັບ​ກຸມ​ໃນເຊົ້າ​ວັນ​ຈັນມື້​ນີ້​ ທີ່ເມືອງ Ciamis
ໃນ​ແຂວງ Java ຕາ​ເວັນ​ຕົກ ​ແລະ​ຜູ້ກ່ຽວ​ໄດ້​ຖືກ​ນໍາ​ໄປ​ຍັງ​ນະຄອນຫລວງ Jakarta
ເພື່ອ​ສອບ​ປາກ​ຄໍາ. ນາຍ Bashir ເຄີຍໄດ້​ຖືກ​ຈັບມາ​ແລ້ວ 2 ຄັ້ງ​ໃນ​ຂໍ້​ຫາ​ມີ​ສ່ວນພົວພັນ
ກັບກຸ່ມກໍ່​ການ​ຮ້າຍ.