ປະທານາທິບໍດີ ຊູຊີໂລບໍາບັງ ຢຸດໂທໂຢໂນະ ໄດ້ສັ່ງໃຫ້ຕໍາຫລວດຕາມລ່າແລະຈັບກຸມພວກຄົນຮ້າຍ ທີ່ທໍາການໂຈມຕີຊາວຄຣິສຕ໌ 2 ຄົນ ທີ່ກໍາລັງມຸ້ງໜ້າໄປຮ່ວມໃນພິທີທາງ ສາສະໜາ ໂດຍເອົາມີດແທງຄົນນຶ່ງແລະທຸບຕີອີກຄົນນຶ່ງນັ້ນ.
ພວກຄົນຮ້າຍທີ່ບໍ່ຮູ້ວ່າແມ່ນໃຜ ໄດ້ເອົາມີດແທງຜູ້ເຊື່ອຖືສາສະໜາຄຣິສຄົນນຶ່ງ ແລະຕີຫົວຜູ້ສອນສາສະໜາດ້ວຍໄມ້ແປ້ນແຜ່ນນຶ່ງ ໃນຂະນະ
ທ່ີບຸກຄົນທັງສອງກໍາລັງມຸ້ງໜ້າໄປຮ່ວມພິທີທາງສາສະໜາໃນວັນອາທິດວານນີ້ ແຕ່ປາກົດວ່າບາດແຜທີ່ເຂົາເຈົ້າໄດ້ຮັບນັ້ນ ບໍ່ເປັນອັນຕະລາຍເຖິງຕາຍ.
ຄວາມສໍາພັນລະຫວ່າງພວກສະມາຊິກຂອງສາສະໜາຄຣິສ ນິກາຍ protestant ແລະພວກກຸ່ມມຸສລິມໃນຄຸ້ມ Bekasi ໃນເຂດຊານເມືອງຂອງກຸງ Jakarta ໄດ້ຕົກຢູ່ໃນສະພາບເຄັ່ງຕຶງມາໄດ້ຫລາຍ ເດືອນແລ້ວ.
ນັບແຕ່ລັດຖະບານທ້ອງຖິ່ນປະຕິເສດບໍ່ອະນຸຍາດໃຫ້ຊາວຄຣິສຕ໌ກໍ່ສ້າງໂບດແຫ່ງນຶ່ງຂຶ້ນໃນທີ່ ດິນຕອນນຶ່ງທີ່ເປົ່າຫວ່າງຂອງເຂົາເຈົ້ານັ້ນ ພວກຜູ້ນໍາໂບດກໍໄດ້ພາກັນທໍາພິທີທາງສາສະໜາ ຢູ່ກາງແຈ້ງໃນບໍລິເວນທີ່ດິນຂອງເຂົາເຈົ້າ ແລະພວກກຸ່ມມຸສລິມກໍໄດ້ທໍາການປະທ້ວງທຸກໆອາທິດມາເປັນປະຈໍາ ເພື່ອລົບກວນການປະກອບສາສະໜາກິດຂອງຊາວຄຣິສຕ໌ນັ້ນ.
