ວັນຈັນມື້ນີ້ ເຈົ້າໜ້າທີ່ອິນໂດເນເຊຍ ໄດ້ຍົກລະດັບການ
ເຕືອນ ໃຫ້ລະວັງໄພ ພູເຂົາໄຟທີ່ກໍາລັງມີພະລັງຢູ່ ແລະ
ໄດ້ອອກຄໍາສັ່ງໃຫ້ປະຊາຊົນທີ່ອາໃສຢູ່ໃກ້ພູໄຟດັ່ງກ່າວ
ນັ້ນ ໃຫ້ຍ້າຍອອກໄປຢູ່ບ່ອນທີ່ປອດໄພກວ່າໂດຍທັນທີ.
ພວກເຈົ້າໜ້າທີ່ເວົ້າອີກວ່າ ໄດ້ມີການເຄື່ອນເໜັງຂອງພູເຂົາໄຟ ທີ່ພູ Mount Marapi ຢູ່ເກາະຈາວາ ເພີ້ມຫລາຍຂຶ້ນ ນັບມື້ ຕະຫລອດໄລຍະນຶ່ງອາທິດຜ່ານມານີ້.
ທ່ານ Surono ຫົວໜ້າອົງການສຶກສາກ່ຽວກັບພູເຂົາໄຟ
ຂອງອິນໂດເນເຊຍ ກ່າວໃນວັນຈັນມື້ນີ້ວ່າ ການເຄື່ອນເໜັງ
ຂອງພູເຂົາໄຟດັ່ງກ່າວແມ່ນແຮງກວ່າທີ່ເຄີຍເຫັນ ໃນເວລາ
ກ່ອນພູໄຟໜ່ວຍນີ້ລະເບີດຂຶ້ນເທື່ອຫລັງສຸດ ໃນປີ 2006 ນັ້ນ.
ປະຊາຊົນໄດ້ຖືກສັ່ງໃຫ້ຍ້າຍອອກໄປຢູ່ໄກຈາກເຂດກັນດານ ຊຶ່ງມີວົງລັດສະໝີ 10 ກິໂລແມັດ ນັບຈາກປ່ອງພູໄຟ.
ພູເຂົາໄຟໜ່ວຍນີ້ ລະເບີດຂຶ້ນເທື່ອຫລັງສຸດແມ່ນປີ 2006 ຊຶ່ງໄດ້ເຮັດໃຫ້ 2 ຄົນເສຍຊີ ວິດ. ການລະເບີດທີ່ຄ້າຍຄືກັນນີ້ໃນປີ 1994 ໄດ້ເອົາຊີວິດຄົນໄປຢ່າງໜ້ອຍ 60 ຄົນ ໃນຂະນະທີ່ມີ 1,300 ຄົນເສຍຊີວິດ ໃນການລະເບີດຄັ້ງປີ 1930 ນັ້ນ.
