ໃນພາກກາງຂອງອິນເດຍພວກຄົນງານລົດໄຟຍັງພາກັນ
ພະຍາຍາມດຶງເອົາພວກຜູ້ໂດຍສານ ອອກມາຈາກຊາກຫັກ
ເພພັງຂອງລົດໄຟຫລັງຈາກເກີດອຸບັດຕິເຫດລົດໄຟຂົນສົ່ງ
ແລ່ນເຂົ້າຕຳລົດໄຟໂດຍສານທີ່ຈອດຢູ່ໃນວັນຈັນມື້ນີ້ທີ່ພາ
ໃຫ້ມີຜູ້ເສຍຊີວິດຢ່າງຕໍ່າ 21 ຄົນ ແລະທາງການກ່າວວ່າ
ຢ່າງນ້ອຍ 50 ຄົນ ໄດ້ຮັບການບາດເຈັບ.
ອຸບັດຕິເຫດເກີດຂຶ້ນໃນຕອນເຊົ້າມືດມື້ນີ້ ທີ່ສະຖານນີ
Badarwasໃນລັດ Madhya Pradesh ທ່າມກາງຝົນ
ຕົກໜັກແລະອາກາດມືດມົວມອງບໍ່ເຫັນໄກ. ທາງການ
ກຳລັງສືບສວນຫາສາເຫດທີ່ແທ້ຈິງຂອງອຸບັດຕິເຫດຢູ່.
ຕາໜ່າງລົດໄຟທີ່ໃຊ້ຫລາຍຂອງອິນເດຍນັ້ນ ແມ່ນເປັນນຶ່ງໃນຕາໜ່າງທີ່ໃຫຍ່ທີ່ສຸດໃນໂລກ ຊຶ່ງມີລົດໄຟໂດຍສານ ປະມານ 9,000 ສາຍທີ່ໃຊ້ບໍລິການຜູ້ໂດຍສານ ເຖິງ 18 ລ້ານຄົນ ໃນແຕ່ລະມື້. ແລະກໍໄດ້ມີອຸບັດຕິເຫດທາງລົດໄຟ ເກີດຂຶ້ນປະມານ 300 ລາຍໃນແຕ່ລະປີ.
