ອິນເດຍໄດ້ເລີ້ມປະຕິບັດການຊອກຫາພວກຫົວຮຸນແຮງ
ທີ່ໄດ້ສັງຫານ ທະຫານ 20 ຄົນ ແລະ ເຮັດໃຫ້ອີກຫຼາຍ
ສິບຄົນບາດເຈັບ ຢູ່ທາງພາກຕາເວັນຕົກສຽງເໜືອຂອງ
ປະເທດ.
ເຈົ້າໜ້າທີ່ໄດ້ກ່າວວ່າ ພວກກະບົດໃນລັດ Manipur
ໄດ້ດັກໂຈມຕີຂະບວນລົດທະຫານ ໃນວັນພະຫັດວານນີ້
ດ້ວຍການຍິງຈະຫຼວດໝາກປີ ແລະ ວາງລະເບີດໃສ່ຫຼາຍບັ້ນ.
ເຈົ້າໜ້າທີ່ກ່າວວ່າ ທະຫານໄດ້ຮັບຄຳສັ່ງ ໃຫ້ “ຍິງສັງຫານ”
ເພື່ອໂຕ້ຕອບພວກຫົວຮຸນແຮງ ຢູ່ໃນເຂດດັ່ງກ່າວ.
ມີຫຼາຍກຸ່ມກະບົດ ໄດ້ອອກມາອ້າງຄວາມຮັບຜິດຊອບ ຕໍ່ການໂຈມຕີຄັ້ງນີ້.
ລັດ Manipur ໄດ້ສູ້ຊົນມາເປັນເວລາຫຼາຍປີແລ້ວ ກັບພວກກະບົດ ປະກອບອາວຸດ.
ນາຍົກລັດຖະມົນຕີ Narendra Modi ໄດ້ປະນາມການໂຈມຕີຄັ້ງນີ້ວ່າ “ບໍ່ມີເຫດຜົນ”
ແລະ “ເປັນທີ່ໜ້າເສຍໃຈຫຼາຍ.”
ທ່ານ Ajit Doval ທີ່ປຶກສາດ້ານຄວາມໝັ້ນຄົງແຫ່ງຊາດ ຂອງອິນເດຍ ເວົ້າວ່າ “ມັນເປັນ
ສິ່ງທີ່ໂສກເສົ້າເສຍໃຈຫຼາຍ ແລະ ພວກເຮົາກໍ່ເຫັນອົກເຫັນໃຈນຳພວກເຂົາ ແລະ
ປະຊາຊົນທົ່ວປະເທດແມ່ນຈະຢູ່ຄຽງຂ້າງພວກເຂົາ. ແຕ່ພວກເຂົາເປັນຄົນ ທີ່ມີ
ຄວາມກ້າຫານ ທີ່ໄດ້ ເສຍສະຫຼະຊີວິດຂອງຕົນເອງ ເພື່ອປະເທດຊາດ.”
