ສະຫະລັດ ແລະອິນເດຍ ໄດ້ລົງນາມໃນຂໍ້ຕົກລົງທີ່ສຳຄັນທາງດ້ານພະລາທິການ ທີ່ຈະສາ ມາດຊ່ອຍໃຫ້ກຳລັງສະຫະລັດ ແລະອິນເດຍ ນຳໃຊ້ຖານທັບຂອງກັນແລະກັນ ເພື່ອສ້ອມແປງ ພ້ອມທັງຮັບສຳພາລະແລະອຸບປະກອນຕ່າງໆເພີີ່ມເຕີມໄດ້.
ລັດຖະມົນຕີປ້ອງກັນປະເທດສະຫະລັດ ທ່ານ Ash Carter ໄດ້ບອກກັບພວກນັກຂ່າວໃນວັນຈັນທີ່ທຳນຽນຫ້າແຈວ່າ ທ່ານແລະລັດຖະມົນຕີປ້ອງກັນປະເທດອິນເດຍທ່ານ Mano- har Parrikar ໄດ້ລົງນາມຢ່າງເປັນທາງການໃນບົດບັນທຶກຄວາມເຂົ້າໃຈເພື່ອແລກ ປ່ຽນດ້ານພະລາທິການຫຼື LEMOA ໃນເຊົ້າຂອງມື້ວານນີ້. ລັດຖະມົນຕີປ້ອງກັນປະເທດທັງສອງໄດ້ ເຫັນພ້ອມນຳກັນກ່ຽວກັບບັນທຶກຄວາມເຂົ້າໃຈນີ້ “ໂດຍທາງຫຼັກການ” ໃນເວລາທີ່ພວກທ່ານໄດ້ພົບປະກັນຄັ້ງຫຼ້າສຸດ ທີ່ປະເທດອິນເດຍ ໃນເດືອນເມສາ ຜ່ານມານີ້.
ທ່ານ Carter ໄດ້ກ່າວວ່າ ຂໍ້ຕົກລົງທີ່ວ່ານີ້ ແມ່ນ “ເປັນຄວາມຍິນຍອມສອງກ້ຳສອງຝ່າຍຢ່າງເຕັມທີ່” ແລະເຮັດໃຫ້ການປະຕິບັດການຮ່ວມນີ້ ງ່າຍແລະມີປະສິດທິຜົນຫຼາຍຂຶ້ນ.
ເຊີນຊົມ: ທ່ານ Carter ທີ່ອະທິບາຍເຖິງຂໍ້ຕົກລົງ
ລັດຖະມົນຕີປ້ອງກັນປະເທດທັງສອງຍັງໄດ້ກ່າວເນັ້ນເຖິງ ຂໍ້ຕົກລົງທີ່ວ່ານີ້ ບໍ່ໄດ້ອະນຸຍາດໃຫ້ປະເທດໃດປະເທດນຶ່ງ ຕັ້ງຄ້າຍຫຼືຖານທັບຂອງຕົນຂຶ້ນຢູ່ໃນອີກປະເທດນຶ່ງ, ແຕ່ວ່າອະນຸ ຍາດໃຫ້ໃຊ້ຖານທັບແລະອຸບປະກອນຕ່າງໆເທົ່ານັ້ນ “ເພື່ອປະຕິບັດງານຮ່ວມກັນ ເວລາໃດທີ່ພວກເຮົາເຫັນວ່າຈຳເປັນ.”
ທ່ານ Parrikar ໄດ້ກ່າວເພີ່ມຕື່ມວ່າ “ບໍ່ໄດ້ກ່ຽວຂ້ອງໃນການຕັ້ງຄ້າຍໃດໆເລີຍ ໂດຍພື້ນຖານແລ້ວ ມັນເປັນການສະໜັບສະໜຸນດ້ານພາລາທິການເທົ່ານັ້ນ.”
ໃນຂະນະທີ່ທ່ານ Parrikar ຢ້ຽມຢາມທຳນຽນຫ້າແຈ ລັດຖະມົນຕີປ້ອງກັນປະເທດທັງສອງໄດ້ໂອລົມສົນທະນາກັນ ກ່ຽວກັບການທີ່ປະເທດອິນເດຍຖືກລະບຸວ່າ ເປັນຄູ່ພາຄີທີ່ສຳຄັນໃນດ້ານປ້ອງກັນປະເທດຂອງສະຫະລັດ ຫວ່າງມໍ່ໆມານີ້.
ການລະບຸຊື່ດັ່ງກ່າວຫວ່າງມໍ່ໆມານີ້ ໄດ້ປະກາດໃນລະຫວ່າງທີ່ນາຍົກລັດຖະມົນຕີອິນເດຍ ທ່ານ Narendra Modi ຢ້ຽມຢາມນະຄອນຫຼວງວໍຊິງຕັນ ໃນເດືອນມິຖຸນາທີ່ຜ່ານມານີ້ ແລະທ່ານ Carter ໄດ້ກ່າວວ່າ ມັນໄດ້ອະນຸຍາດໃຫ້ທະຫານຂອງສະຫະລັດ ຮ່ວມມືກັບ ກອງກຳລັງທາງທະຫານຂອງອິນເດຍ ໃນ “ແນວທາງ ທີ່ພວກເຮົາໄດ້ປະຕິບັດ ກັບປະເທດພັນທະມິດ ທີ່ໃກ້ຊິດທີ່ສຸດ ແລະມີຄວາມສຳພັນຍາວນານທີ່ສຸດເທົ່ານັ້ນ.”
ການໂອ້ລົມສົນທະນາໃນວັນຈັນວານນີ້ ທີ່ທຳນຽນຫ້າແຈ ຊຶ່ງເປັນການພົບປະກັນຄັ້ງທີ 6 ລະຫວ່າງລັດຖະມົນຕີປ້ອງກັນປະເທດທັງສອງ ໄດ້ມີຂຶ້ນກ່ອນການຊ້ອມລົບທີ່ສຳຄັນປະຈຳປີ ຢູ່ທີ່ອິນເດຍ ລະຫວ່າງກອງກຳລັງຂອງສະຫະລັດ ແລະກອງທະຫານອິນເດຍ.
ອ່ານຂ່າວນີ້ເພີ້ມຕື່ມເປັນພາສາອັງກິດ
ເຊີນຊົມ : ລມຕ ປ້ອງກັນປະເທດສະຫະລັດ ກັບອິນເດຍ ກ່າວເຖິງ ຄວາມສຳຄັນ ຂອງຂໍ້ຕົກລົງລະຫວ່າງກັນ
