ຕໍາຫຼວດອິນເດຍ ໄດ້ຈັບກຸມຄູສອນໂຢຄະທີ່ມີຊື່ສຽງໂດ່ງດັງຄົນນຶ່ງ ຫຼັງຈາກລາວໄດ້ພະຍາຍາມທີ່ຈະນໍາພາການເດີນຂະບວນປະທ້ວງຕໍ່ຕ້ານການ ສໍ້ລາດບັງຫຼວງ ໄປຍັງສະພາແຫ່ງຊາດ.
ຕຳຫຼວດໄດ້ຈັບນາຍ Baba Ramdev ດ້ວຍຄວາມສະຫງົບໃນວັນຈັນວານນີ້ ໃນຂະນະທີ່ລາວຮ້ອງຄໍາຂັວນອອກມາ ໃຫ້ຍຸບລັດຖະບານພາຍໃຕ້ການນຳພາ ຂອງພັກ Congress.
ຄູສອນໂຢຄະຄົນນີ້ໄດ້ເລີ່ມທໍາການປະທ້ວງ ໃນວັນພະຫັດແລ້ວນີ້ ໂດຍຮຽກ ຮ້ອງໃຫ້ລັດຖະບານ ດຳເນີນການຫຼາຍໄປກວ່ານີ້ ໃນການຮັບເງິນສິນບົນແລະ ຊອກຫາຊ່ອງທາງນຳເອົາເງິນຜິດກົດໝາຍ ທີ່ຊາວອິນເດຍໄປຝາກເຊື່ອງໄວ້ຢູ່ໃນທະນາຄານຕ່າງປະເທດນັ້ນກັບຄືນ ປະເທດ.
ນາຍ Ramdev ໄດ້ເປັນຜູ້ນໍາພາໃນການປະທ້ວງອົດອາຫານທີ່ຄ້າຍຄືກັນນີ້ໃນ ເດືອນມິຖຸນາ ປີກາຍນີ້ ແຕ່ບໍ່ຄືກັນກັບການປະທ້ວງໃນຄັ້ງນັ້ນ ການປະທ້ວງຂອງທ່ານໃນເທື່ອນີ້ ແມ່ນບໍ່ໄດ້ຮັບການສະໜອງຕອບໃດໆຈາກທາງລັດຖະບານເລີຍ.
