ພັນທະມິດທີ່ນຳພາໂດຍນາຍົກລັດຖະມົນຕີອິນເດຍ ທ່ານ ນາເຣນດຣາ ໂມດີ (Narendra Modi) ໄດ້ຊະນະສຽງສ່ວນຫຼາຍ ພຽງເລັກນ້ອຍໃນສະພາແຫ່ງຊາດ, ແຕ່ການທ້າທາຍຢ່າງໜັກໜ່ວງຈາກຝ່າຍຄ້ານ ໄດ້ເຮັດໃຫ້ຈຳນວນພັກ ຂອງທ່ານຫຼຸດລົງຢ່າງຫຼວງຫຼາຍ, ເຊິ່ງສະທ້ອນໃຫ້ເຫັນເຖິງຄວາມນິຍົມທີ່ຫຼຸດ ລົງ ຫຼັງຈາກໄດ້ດຳລົງຕຳແໜ່ງມາເປັນເວລາໜຶ່ງທົດສະວັດ.
ພັກຊາດນິຍົມ ຮິນດູ ບາຣາຕີຢາ ຈານາຕາ (Bharatiya Janata) ຫຼື BJP ຂອງທ່ານ ໂມດີ ພ້ອມດ້ວຍບັນດາພັນທະມິດ, ໄດ້ຮັບ 294 ບ່ອນນັ່ງຈາກ ທັງໝົດ 543 ບ່ອນນັ່ງທີ່ໄດ້ຖືກເລືອກຕັ້ງໃນສະພາຕ່ຳ.
ໃນການປະກາດຢູ່ສື່ສັງຄົມ X, ທ່ານ ໂມດີ ກ່າວວ່າ "ປະຊາຊົນ ເຊື່ອໝັ້ນໃນ NDA, ເປັນຄັ້ງທີສາມຕິດຕໍ່ກັນ! ນີ້ແມ່ນຄວາມສຳເລັດຄັ້ງປະຫວັດສາດໃນປະຫວັດສາດຂອງອິນເດຍ.” ທ່ານໄດ້ໃຫ້ຄວາມໝັ້ນໃຈກັບປະຊາຊົນວ່າ “ພວກເຮົາຈະສືບຕໍ່ເຮັດວຽກງານທີ່ດີ ທີ່ໄດ້ເຮັດໃນທົດສະວັດທີ່ຜ່ານມາ ເພື່ອເຮັດໃຫ້ຄວາມປາຖະໜາຂອງປະຊາຊົນ ບັນລຸໄດ້.” ທ່ານໄດ້ສະແດງສັນຍາລັກແຫ່ງ ໄຊຊະນະ ຢູ່ທີ່ສໍານັກງານໃຫຍ່ຂອງພັກ BJP ໃນຕອນແລງວັນອັງຄານວານນີ້. NDA ແມ່ນພັນທະມິດປະຊາທິປະໄຕແຫ່ງຊາດທີ່ນໍາພາໂດຍພັກ BJP.
ເຖິງຢ່າງໃດກໍ່ຕາມ, ໃນຄວາມຫຼົ້ມແຫຼວອັນໃຫຍ່ຫຼວງສຳລັບຜູ້ນໍາອິນເດຍ, ຜູ້ທີ່ ໄດ້ປົກຄອງປະເທດດ້ວຍອຳນາດທີ່ເດັດຂາດ ໃນຊ່ວງທົດສະວັດທີ່ຜ່ານມາ, ພັກ BJP ບໍ່ມີແນວໂນ້ມທີ່ຈະໄດ້ຮັບສຽງສ່ວນຫຼາຍທີ່ຈະແຈ້ງໂດຍຕົນເອງ. ພັກດັ່ງກ່າວໄດ້ຊະນະ 240 ບ່ອນນັ່ງ ຊຶ່ງຍັງບໍ່ພຽງພໍ ຈາກ 272 ບ່ອນນັ່ງທີ່ຈຳເປັນສຳລັບສຽງສ່ວນຫລາຍ ໃນການນັບຄະແນນສຽງຈົນມາຮອດຕອນແລງວັນອັງຄານວານນີ້. ນັ້ນແມ່ນຕໍ່າກວ່າ 303 ຄະແນນທີ່ພັກດັ່ງກ່າວ ໄດ້ຊະນະໃນປີ 2019.
ນັກວິເຄາະກ່າວວ່າຜົນງານທີ່ອ່ອນແອກວ່າທີ່ຄາດໄວ້ຂອງພັກ BJP ສະແດງ ໃຫ້ເຫັນວ່າ ຄວາມສາມາດພິເສດຂອງທ່ານ ໂມດີ ໄດ້ຫຼຸດລົງ. ຜູ້ນໍາ ອິນເດຍ ທ່ານນີ້, ຊຶ່ງນັກວິຈານເອີ້ນວ່າ ແບ່ງແຍ້ງຝ່າຍ ແລະ ແຕກແຍກ, ໄດ້ດໍາເນີນ ການໂຄສະນາຫາສຽງປະທານາທິບໍດີ ໂດຍທີ່ພັກເອື່ອຍອິງໃສ່ທ່ານຢ່າງຫຼວງ ຫຼາຍໃນການຫາສຽງ. ແຕ່ໃນເວລານີ້ ທ່ານຈະຕ້ອງເພິ່ງພາພັນທະມິດຂອງທ່ານ ເພື່ອສ້າງຕັ້ງລັດຖະບານຊຸດຕໍ່ໄປ.
ຟໍຣັມສະແດງຄວາມຄິດເຫັນ