ທ່ານນາງຮີນລາຣີ ຄລິນຕັນ ລັດຖະມົນຕີການຕ່າງປະເທດສະຫະລັດກ່າວວ່າ ສະຫະລັດແລະອິນເດຍຮ່ວມສາມັກຄີກັນໃນການຕໍ່ສູ້ກັບພວກເຄືອຂ່າຍຫົວຮຸນແຮງຕ່າງໆ ແລະວ່າ ສອງປະເທດກໍາລັງດໍາເນີນງານຮ່ວມກັນຫລາຍຂຶ້ນນັບມື້ກ່ຽວກັບເລື້ອງຄວາມປອດໄພພາຍໃນປະເທດ.
ຖ້ອຍຖະແຫລງຂອງທ່ານນາງຄລິນຕັນມີຂຶ້ນໃນວັນອັງຄານມື້ນີ້ທີ່ກຸງນີວແດນລີ ນະຄອນ
ຫລວງຂອງອິນເດຍ ໃນຂະນະທີ່ທ່ານນາງເລີ້ມທໍາການໂອ້ລົມສົນທະນາກັນເປັນເວລາ 2
ມື້ ກັບບັນດາເຈົ້າໜ້າທີ່ອິນເດຍທີ່ມີວັດຖຸປະສົງເພື່ອສ້າງສາຍພົວພັນທາງດ້ານການເມືອງ
ແລະເສດຖະກິດລະຫວ່າງສອງປະເທດໃຫ້ເຂັ້ມແຂງຂຶ້ນ.
ທ່ານນາງຄລິນຕັນກ່າວຕື່ມວ່າ ຄວາມສໍາຄັນໃນການປະເຊີນໜ້າກັບພວກຫົວຮຸນແຮງຈັດ
ຍິ່ງໄດ້ຮັບຄວາມກະຈ່າງແຈ້ງຫລາຍຂຶ້ນຫລັງຈາກການວາງລະເບີດ 3 ບັ້ນໃນສັບປະດາຜ່ານ
ມາໃນນະຄອນ Mumbai ສູນກາງການເງິນຂອງອິນເດຍ ຊຶ່ງໄດ້ເຮັດໃຫ້ຜູ້ຄົນເສຍຊີວິດໄປ
19 ຄົນແລະໄດ້ຮັບບາດເຈັບຕື່ມອີກຫລາຍກວ່າ 130 ຄົນ.
ນອກນັ້ນທ່ານນາງຄລິນຕັນຍັງໄດ້ກ່າວເນ້ນເຖິງຄວາມຕ້ອງການໃຫ້ມີສາຍພົວພັນດ້ານການ
ເງິນທີ່ເຂັ້ມແຂງຂຶ້ນອີກ ໂດຍຮຽກຮ້ອງໃຫ້ມີການເປີດຕະຫລາດເສລີຫລາຍຂຶ້ນແລະເພີ່ມການ
ຂາຍອາວຸດຂອງສະຫະລັດໃຫ້ແກ່ອິນເດຍຫລາຍຂຶ້ນ.
ທ່ານນາງຄລິນຕັນກ່າວວ່າ ທັງສອງຝ່າຍຕ້ອງການແກ້ໄຂເລື້ອງຕ່າງໆ ທີ່ພົວພັນກັບຂໍ້ຕົກລົງ
ວ່າດ້ວຍການຮ່ວມໄມ້ຮ່ວມມືກັນທາງດ້ານນີວເຄລຍທີ່ໃຊ້ທາງດ້ານພົນລະເຮືອນ ຊຶ່ງສາມາດ
ເປີດໂອກາດທາງດ້ານທຸລະກິດສໍາລັບພວກບໍລິສັດພະລັງນີວເຄລຍຂອງສະຫະລັດທີ່ອິນເດຍ
ນັ້ນ.
ໃນວັນອັງຄານມື້ນີ້ ທ່ານນາງຄລິນຕັນໄດ້ພົບປະກັບທ່ານ Shivshankar Menon ທີ່ປຶກ
ສາດ້ານຄວາມປອດໄພແຫ່ງຊາດຂອງອິນເດຍ ແລະມີໝາຍກໍານົດທີ່ຈະທໍາການພົບປະຫາ
ລືກັບພວກເຈົ້າໜ້າທີ່ຂັ້ນອາວຸໂສຄົນອື່ນໆ ຮວມທັງນາຍົກລັດຖະມົນຕີ Manmohan
Singh ແລະທ່ານນາງ Sonia Ghandi ຫົວໜ້າພັກ Congress ຂອງອິນເດຍນໍາ.
