ພວກພະນັກງານຊ່ອຍກູ້ໄພອິນເດຍໄດ້ພົບເຫັນສົບພວກທ່ີເສັຍຊີວິດຫລາຍຂຶ້ນໃນວັນອາທິດມື້ນີ້ ຈາກຊາກຫັກພັງຂອງລົດໄຟບັນທຸກຄົນໂດຍສານ ຂະບວນນຶ່ງທ່ີແລ່ນຕົກລາງແລະຕຳກັນກັບລົດໄຟບັນທຸກສິນຄ້າຂະບວນນຶ່ງນັ້ນ. ຈຳນວນຜູ້ເສຍຊີວິດມາຮອດປັດຈຸບັນແມ່ນຫລາຍກວ່າ 140 ຄົນ.
ປະຊາຊົນຈຳນວນຫລາຍຮ້ອຍຄົນໄດ້ຮັບບາດເຈັບ ເວລາລົດໄຟດ່ວນຂະບວນນີ້ແລ່ນມາຈາກເມືອງ Kolkata ໃນພາກຕາເວັນອອກສຽງເໜືອໄປຍັງເມືອງມອມໄບ ໃນຝັ່ງຕາເວັນຕົກແລ່ນຕົກລາງແລະຕຳກັນກັບລົດໄຟບັນທຸກສິນຄ້າຂະບວນນຶ່ງ ໃນເຂດສອກຫລີກຫ່າງໄກໃນແຄວ້ນ Bengal ຕາເວັນຕົກ ໃນຕອນເຊົ້າວັນສຸກຜ່ານມານີ້.
ບັນດາເຈົ້າໜ້າທ່ີອິນເດຍຖິ້ມໂທດ ໂສກນາດຕະກຳຄັ້ງນີ້ ໃສ່ພວກກະບົດນິຍົມລັດທິເໝົາ. ຂົງເຂດດັ່ງກ່າວເປັນທ່ີໝັ້ນແຫ່ງນຶ່ງຂອງພວກກະບົດທ່ີເອີ້ນກັນວ່າ Naxalites ທ່ີເວົ້າວ່າ ພວກຕົນພາກັນຕໍ່ສູ້ເພື່ອສິດທິຂອງພວກຄົນທຸກຍາກແລະໄຮ້ທ່ີດິນນັ້ນ. ບັນດາເຈົ້າໜ້າທ່ີລົດໄຟ ໄດ້ລົບລ້າງການບໍລິການລົດໄຟທ່ີແລ່ນຍາມກາງຄືນທັງໝົດ ໄປຍັງຫລາຍຂົງເຂດ ບ່ອນພວກກະບົດນິຍົມລັດທິເໝົາທຳການເຄື່ອນຢ່າງແຂງແຮງຢູ່ນັ້ນ.
