ອິນເດຍ ໄດ້ກ່າວໃນວັນພະຫັດວານນີ້ວ່າ ການາດາ ບໍ່ໄດ້ແບ່ງປັນຫລັກຖານເພື່ອໜູນຫຼັງການກ່າວຫາທີ່ວ່າ ລັດຖະບານ ອິນເດຍ ມີສ່ວນຮ່ວມໃນການສັງຫານຜູ້ນຳແບ່ງແຍກດິນແດນຊາວ ຊິກ ຢູ່ໃນການາດາ ເມື່ອປີແລ້ວນີ້, ເຖິງແມ່ນໄດ້ທໍາການຈັບກຸມຜູ້ຊາຍ ອິນເດຍ ສາມຄົນເມື່ອບໍ່ດົນມານີ້ ໃນການກໍ່ອາຊະຍາກຳດັ່ງກ່າວກໍຕາມ.
ໂຄສົກກະຊວງການຕ່າງປະເທດຂອງອິນເດຍ ທ່ານ ແຣນເດຍ ເຈສວາລ ກໍໄດ້ຢ້ຳການກ່າວຫາມາດົນນານຂອງ ອິນເດຍ ວ່າ ການານາ ໃຫ້ທີ່ພັກສຳລັບພວກຫົວຮຸນແຮງ ອິນເດຍ.
ຄົນສັນຊາດ ອິນເດຍ ສາມຄົນຜູ້ທີ່ໄດ້ອາໄສຢູ່ໃນ ການາດາ ຊົ່ວຄາວ ໄດ້ຖືກຈັບໃນວັນອັງຄານທີ່ຜ່ານມາ ກ່ຽວກັບ ການສັງຫານ ທ່ານ ຮາດີບ ຊິງ ນິຈຈາ ໃນເມືອງ ບຣິທິສ ໂຄລຳເບຍ ເມື່ອເດືອນກໍລະກົດທີ່ຜ່ານມາ. ນາຍົກລັດຖະມົນຕີ ການາດາ ທ່ານ ຈັສຕິນ ທຣູໂດ ໄດ້ເລີ່ມການຜິດຖຽງທາງການທູດກັບ ອິນເດຍ ໃນເດືອນກັນຍາທີ່ຜ່ານມາ ເວລາທີ່ທ່ານໄດ້ອ້າງ “ການກ່າວຫາທີ່ໜ້າເຊື່ອຖື” ກ່ຽວກັບ ການມີສ່ວນຮ່ວມຂອງ ອິນເດຍ ໃນການສັງຫານນັກແບ່ງແຍກດິນແດນຊາວ ຊິກ ຄົນນັ້ນ, ເຊິ່ງ ອິນເດຍ ໄດ້ປະຕິເສດການກ່າວຫາຕ່າງໆ.
ຜູ້ອໍານວຍການຕຳຫຼວດມ້າ ການາດາ ທ່ານ ແມນດີບ ມູເກີ ໄດ້ກ່າວຫຼັງຈາກທີ່ຜູ້ຊາຍສາມຄົນຖືກຈັບວ່າ ການສືບສວນສອບສວນກ່ຽວກັບວ່າ ພວກເຂົາມີສາຍພົວພັນຕໍ່ລັດຖະບານຂອງ ອິນເດຍ ຫຼື ບໍ່ ແມ່ນກຳລັງດຳເນີນວານຢູ່.
ທ່ານ ເຈສວາລ ກ່າວວ່າ ທັງສອງລັດຖະບານ ແມ່ນກຳລັງຫາລືກັນກ່ຽວກັບ ຄະດີດັ່ງກ່າວ ທີ່ການາດາບໍ່ໄດ້ສົ່ງຫຼັກຖານທີ່ສະເພາະເຈາະຈົງ ກ່ຽວກັບ ການມີສ່ວນຮ່ວມຂອງລັດຖະບານ ອິນເດຍ ມາໃຫ້.
ໃນຂະນະດຽວກັນ, ທ່ານ ເຈສວາລ ກ່າວວ່າ ລັດຖະບານ ນິວ ເດລີ ໄດ້ຕິຕຽນບັນດາເຈົ້າໜ້າທີ່ ການາດາ ວ່າພວກແບ່ງແຍກດິນແດນ, ພວກຫົວຮຸນແຮງ ແລະ ຜູ້ທີ່ສະໜັບສະໜູນການກໍ່ຄວາມຮຸນແຮງຕໍ່ ອິນເດຍ ແມ່ນໄດ້ຮັບອະນຸຍາດໃຫ້ເຂົ້າ ແລະ ອາໄສຢູ່ໃນ ການາດາ. ທ່ານກ່າວວ່າ “ການຂໍຮ້ອງສຳລັບການສົ່ງຕົວກັບປະເທດຄືນຂອງພວກເຮົາ ແມ່ນກຳລັງຢູ່ໃນການລໍຖ້າ.”
ຟໍຣັມສະແດງຄວາມຄິດເຫັນ