ອິນເດຍແລະປາກິສຖານ ຖິ້ມໂທດໃສ່ກັນ ກ່ຽວກັບຄວາມຮຸນ
ແຮງຮອບໃຫມ່ໃນແຄວ້ນ Kashmir ທີ່ຍັງຜົນໃຫ້ມີຫຼາຍໆຄົນ
ເສຍຊີວິດ ໃນສອງມື້ ທີ່ຜ່ານມານີ້.
ໃນວັນພະຫັດມື້ນີ້ ປາກິສຖານ ໄດ້ຖິ້ມໂທດໃສ່ກອງກຳລັງ
ຂອງອິນເດຍ ທີ່ໄດ້ຍິງສັງຫານ “ແບບບໍ່ມີການເກາະຜິດ”
ຢ່າງນ້ອຍພົນລະເຮືອນ 4 ຄົນ ແລະບາດເຈັບອີກ 4 ຄົນ.
ກະຊວງການຕ່າງປະເທດ ໄດ້ຮຽກເອກອັກຄະລັດຖະທູດ
ອິນເດຍ ໃນນະຄອນ Islamabad ເຂົ້າພົບ ແລະທຳການປະທ້ວງຢ່າງແຮງ ຕໍ່ອັນທີ່ເອີ້ນວ່າ ການລະເມີດຕໍ່ເຂດຊາຍແດນແລະເຂດອາກາດຂອງຕົນນັ້ນ.
ປາກິສຖານ ໄດ້ກ່າວວ່າ ກອງກຳລັງຂອງຕົນ ໄດ້ຍິງເຮືອບິນສອດແນມ ທີ່ບໍ່ມີຄົນຂັບ ຫຼື drone ນັ້ນ ຕົກໃນວັນພຸດວານນີ້ ທີ່ໄດ້ບິນລ່ວງລ້ຳເຂົ້າໄປໃນເຂດອາກາດປາກິສຖານ. ກອງທັບຂອງອິນເດຍ ໄດ້ປະຕິເສດຕໍ່ການກ່າວຫາທີ່ວ່ານີ້.
ອິນເດຍ ຍັງໄດ້ກ່າວອີກວ່າ ກອງກຳລັງປາກິສຖານ ໄດ້ລະດົມຍິງຂ້າມເຂດຊາຍແດນ ໃນເຊົ້າວັນພະຫັດມື້ນີ້ ຍັງຜົນໃຫ້ມີພົນລະເຮືອນບາດເຈັບ 3 ຄົນ ຊຶ່ງນັ້ນແມ່ນມີຂຶ້ນຫຼັງຈາກການຍິງກັນວັນພຸດວານນີ້ ໃນແຄວ້ນ Kashmir ທີ່ທາງອິນເດຍໄດ້ກ່າວວ່າ ມີແມ່ຍິງຄົນນຶ່ງເສຍຊີວິດ ແລະບາດເຈັບອີກ 2 ຄົນ.
ລັດຖະບານອິນເດຍ ໄດ້ທຳການປະທ້ວງຕໍ່ປາກິສຖານ ໃນອັນທີ່ເອີ້ນວ່າ ການລະເມີດຕໍ່ການຢຸດຍິງຊ້ຳແລ້ວຊ້ຳອີກ.
ກະຊວງການຕ່າງປະເທດປາກິສຖານໄດ້ກ່າວໃນວັນພະຫັດມື້ນີ້ວ່າ ຕົນຮຽກຮ້ອງໃຫ້ອິນເດຍ ນັບຖື ຂໍ້ຕົກລົງສະບັບປີ 2003 “ໃນການມີນ້ຳໃຈທີ່ຈະຮັກສາສັນຕິພາບແລະຄວາມສະຫງົບ ສຸກ” ຕາມແນວຊາຍແດນແຄວ້ນ Kashmir.
ແຄວ້ນ Kashmir ແມ່ນຖືກແບ່ງລະຫວ່າງອິນເດຍ ກັບ ປາກິສຖານ ເຖິງແມ່ນວ່າ ທັງສອງປະທເດ ໄດ້ອ້າງເອົາກຳມະສິດຂອງເຂດດັ່ງກ່າວທັງໝົດ ວ່າເປັນຂອງຕົນ.
ປະເທດເພື່ອນບ້ານທີ່ມີອາວຸດນິວເຄລຍ ໄດ້ສູ້ລົບກັນແລ້ວ ໃນ 2 ສົງຄາມ ເພື່ອຍາດແຍ່ງ ເອົາແຄວ້ນດັ່ງກ່າວ ນັບຕັ້ງແຕ່ເປັນເອກກະລາດ ຈາກອັງກິດ ໃນປີ 1947 ນັ້ນ.
