ບັນດາສະມາຊິກລັດຖະສະພາຂອງອິນເດຍ ພາກັນລົງຄະແນນສຽງໃນວັນພະຫັດມື້ນີ້ ເລືອກ
ເອົາປະທານາທິບໍດີຄົນໃໝ່ ຊຶ່ງອະດີດລັດຖະມົນຕີການເງິນ ທ່ານ Pranab Mukherjee
ປະກົດວ່າ ຈະໄດ້ເຂົ້າກໍາຕຳແໜ່ງດັ່ງກ່າວ ຊຶ່ງເປັນຕຳແໜ່ງທາງພິທິການເທົ່ານັ້ນ.
ສະມາຊິກສະພາແຫ່ງຊາດ ແລະສະພາປະຈຳລັດຂອງອິນເດຍເກືອບ 5000 ຄົນ ໄດ້ພາກັນ
ປ່ອນບັດລົງຄະແນນທີ່ນະຄອນຫຼວງຂອງປະເທດ ແລະເມືອງເອກຂອງລັດຕ່າງໆ ເພື່ອເລືອກ
ເອົາປະທານາທິບໍດີ ຄົນທີ 13 ຂອງອີນເດຍ.
ທ່ານ Mukherjee ສະມາຊິກພັກ ສະຫະພັນທະມິດເພື່ອຄວາມກ້າວໜ້າ ຫຼື United
Progressive Alliance ຊຶ່ງເປັນພັກລັດຖະບານ ໄດ້ຮັບສຽງສະໜັບສະໜຸນຫລາຍກວ່າ
ທ່ານ Purno Sangma ຄູ່ແຂ່ງຂອງທ່ານທີ່ໄດ້ຮັບການໜຸນຫລັງຈາກພັກຝ່າຍຄ້ານ.
ຜົນການແຂ່ງຂັນດັ່ງກ່າວ ຈະມີການປະກາດໃຫ້ຊາບໃນວັນອາທິດຈະມານີ້ ສາມມື້ກ່ອນສະ
ໄໝການດຳລົງຕຳແໜ່ງເປັນເວລາຫ້າປີຂອງປະທານາທິບໍດີ Pratibha Patil ຈະສິ້ນສຸດລົງ .
ທ່ານນາງ Patil ເປັນຜູ້ຍິງຄົນທໍາອິດທີ່ກໍາຕໍາແໜ່ງປະທານາທິບໍດີຂອງອິນເດຍ.