ໂຄສົກປະຈຳນາຍົກລັດຖະມົນຕີ Angela Merkel ແຫ່ງ
ເຢຍຣະມັນກ່າວວ່າ ອິຣ່ານໄດ້ກີດກັນຖ້ຽວບິນຂອງທ່ານ
ນາງ Merkel ໄວ້ຊົ່ວຄາວທີ່ບິນຂ້າມນ່ານຟ້າຂອງອິຣ່ານ
ໃນຂະນະທີ່ທ່ານນາງເດີນທາງໄປຍັງກຸງນີວເດລີ ເພື່ອທໍາ
ການໂອ້ລົມສົນທະນາກັບຄະນະນໍາພາຂອງອິນເດຍນັ້ນ.
ໂຄສົກທ່ານນີ້ກ່າວວ່າ ຖ້ຽວບິນຂອງທ່ານນາງ Merkel
ໄດ້ບິນເວີ່ນ ອ້ອມໄປອ້ອມມາເໜືອນ່ານຟ້າຂອງເຕີກກີ
ເປັນເວລາ 2 ຊົ່ວໂມງກ່ອນອິຣ່ານອະນຸຍາດໃຫ້ເຮືອບິນ ຂອງທ່ານນາງບິນຂ້າມນ່ານຟ້າຂອງອິຣ່ານນັ້ນ. ແຕ່ເຮືອບິນຖ້ຽວທີສອງທີ່ບັນທຸກພວກເຈົ້າໜ້າທີ່ເຢຍຣະມັນໄປຍັງອິນເດຍ ບໍ່ໄດ້ປະເຊີນກັບບັນຫາໃດໆ.
ທ່ານນາງ Merkel ກໍານົດຈະພົບປະໃນວັນອັງຄານມື້ນີ້ ກັບທ່ານມັນໂມຫັນສິງ ນາຍົກລັດ ຖະມົນຕີ ແລະເຈົ້າໜ້າທີ່ຄົນອື່ນໆຂອງອິນເດຍເພື່ອທໍາການໂອ້ລົມສົນທະນາກັນເລື້ອງການຄ້າແລະຄວາມປອດໄພ.
ເປັນທີ່ຄາດເຊ່ນກັນວ່າ ຄະນະຜູ້ແທນເຢຍຣະມັນຈະກົດດັນໃນຄວາມພະຍາຍາມໃຫ້ບັນລຸຂໍ້ຕົກລົງການຄ້າມູນຄ່າຫລາຍພັນລ້ານໂດລາເພື່ອຂາຍເຮືອບິນລົບໄອພົ່ນໃຫ້ອິນເດຍນັ້ນ.
