ຝົນຕົກໜັກໃນວັນຈັນມື້ນີ້ ໄດ້ກີດກັນການຊອກຄົ້ນຫາພວກລອດຊີວິດຈາກໄພແຜ່ນດິນ
ໄຫວ ໃນຄວາມແຮງ 6.9 ຣິກເຕີ ທີ່ເກີດຂຶ້ນໃນວັນອາທິດວານນີ້ ທີ່ໄດ້ເອົາຊີວິດຜູ້ຄົນ
ໄປແລ້ວ ຢ່າງໜ້ອຍ 53 ຄົນໃນເຂດພູເຂົາຫິມະໄລທີ່ໂດດດ່ຽວແລະກ້ວາງໃຫຍ່ ກວມເອົາ
ທັງອິນເດຍ ເນປານ ແລະຈີນນັ້ນ. ຈຸດສູນກາງຂອງແຜ່ນດິນໄຫວ ແມ່ນຢູ່ໃນລັດສິກຂິມ
ຂອງອິນເດຍ ຊຶ່ງຕັ້ງຢູ່ຫ່າງຈາກເມືອງຫລວງ Gangtok ຂອງລັດດັ່ງກ່າວ ປະມານ 60
ຫລັກກິໂລແມັດໄປທາງທິດຕາເວັນຕົກສຽງເໜືອ. ບັນດາເຈົ້າໜ້າທີ່ລັດສິກຂິມກ່າວວ່າ
ຂີ້ຕົມເຈື່ອນ ຕຶກອາຄານທີ່ພັງທະລາຍລົງ ແລະສິ່ງຫັກພັງຕ່າງໆທີ່ຕົກລົງມາໄດ້ເອົາຊີວິດ
ຜູ້ຄົນໄປ ຢ່າງໜ້ອຍ 31 ຄົນໃນລັດດັ່ງກ່າວ ແລະຫລາຍກວ່າ 50 ຄົນໄດ້ຮັບບາດເຈັບ.
ທາງການອິນເດຍໄດ້ແຈ້ງໃຫ້ຊາບເຊ່ນກັນວ່າ ມີຄົນເສຍຊີວິດຫລາຍຄົນຍ້ອນແຜ່ນດິນ
ໄຫວຄັ້ງນີ້ ໃນລັດ Bihar ແລະໃນລັດ Bengal ຕາເວັນຕົກ. ແຮງສັ່ນສະເທືອນຂອງ
ແຜ່ນດິນໄຫວ ແມ່ນຮູ້ສຶກໄປຮອດນະຄອນຫລວງນິວ ແດລລີ ຊຶ່ງຕັ້ງຢູ່ຫ່າງຈາກຈຸດ
ສູນກາງຂອງແຜ່ນດິນໄຫວ ປະມານ 1000 ກິໂລແມັດ ແລະໃນປະເທດເພື່ອນບ້ານ
Bangladesh ແລະ Bhutan ນໍາ.
ອົງການຂ່າວຊິນຫົວຂອງທາງການຈີນກໍລາຍງານວ່າ ມີປະຊາຊົນຢ່າງໜ້ອຍ 7 ຄົນ
ເສຍຊີວິດໃນພາກໃຕ້ຂອງທິເບດ ໃກ້ໆກັບຊາຍແດນລັດສິກຂິມນັ້ນ.
ທີ່ເນປານ ທາງການແຈ້ງໃຫ້ຊາບວ່າ ມີຄົນເສຍຊີວິດຢ່າງໜ້ອຍ 7 ຄົນທີ່ພົວພັນກັບ
ໄພແຜ່ນດິນໄຫວ. 3 ຄົນເສຍຊີວິດໃນນະຄອນຫລວງ ກັດມັນດຸ ເວລາກໍາແພງດິນຈີ່
ພັງລົງ ຢູ່ນອກສະຖານທູດອັງກິດ.
ການອະພິປາຍກັນເລື້ອງງົບປະມານໃນສະພາຂອງເນປານໄດ້ຢຸດສະງັກໄປເປັນເວລາ
15 ນາທີ ໃນຂະນະທີ່ພວກຜູ້ແທນພາກັບຫລົບໜີອອກຈາກຕຶກສະພາໄປ ເວລາຕຶກ
ສະພາກໍາລັງໄຫວຢູ່ນັ້ນ.
ນັກຂ່າວວີໂອເອພະແນກພາສາ Bangla ກ່າວວ່າ ແຜ່ນດິນໄຫວດັ່ງກ່າວຍັງໄດ້ເຮັດໃຫ້
ເກີດຮອຍແຕກແຫງຢູ່ຕາມຕຶກອາຄານບາງຫລັງ ໃນນະຄອນຫລວງດາກາ ຂອງ
Bangladesh.
ໄດ້ເກີດແຜ່ນດິນໄຫວຕິດຕາມຕື່ມອີກ 2 ຄັ້ງ ຊຶ່ງມີຄວາມແຮງ 6.1 ແລະ 5.3 ຣິກເຕີ
ຫລັງຈາກເກີດແຜ່ນດິນໄຫວຄັ້ງທໍາອິດແລ້ວ. ທາງການອິນເດຍເຕືອນວ່າ ອາດຈະມີ
ການສັ່ນສະເທືອນຕື່ມອີກຫລາຍຄັ້ງ ກໍເປັນໄດ້.
ນາຍົກລັດຖະມົນຕີອິນເດຍ ທ່ານ Manmohan Singh ໄດ້ຮຽກກອງປະຊຸມສຸກເສິນ
ຂອງອົງການຮັບມືກັບໄພຫາຍະນະແຫ່ງຊາດ ເພື່ອປະສານງານວຽກງານໃນການຮັບ
ມືກັບໄພແຜ່ນດິນໄຫວດັ່ງກ່າວ. ກອງທັບອາກາດອິນເດຍກໍໄດ້ສົ່ງເຮືອບິນໄປ 5 ລໍາ
ເພື່ອຊ່ອຍເຫລືອໃນຄວາມພະຍາຍາມຊ່ອຍກູ້ຊີວິດແລະບັນເທົາທຸກນັ້ນ.
