ລິ້ງ ສຳຫລັບເຂົ້າຫາ

ວັນພະຫັດ, ໑໓ ມິຖຸນາ ໒໐໒໔

ອິນເດຍແລະຈີນຕັ້ງເປົ້າໝາຍ ທີ່ຈະເພິ່ມມູນຄ່າ ການຄ້າລະຫວ່າງກັນຂຶ້ນ ເປັນ 2 ເທົ່າໃນ 5 ປີ.


ນາຍົກລັດຖະມົນຕີຈີນ ທ່ານ Wen Jiabao ຢ້ຽມຢາມໂຮງຮຽນແຫ່ງນື່ງ ທີ່ນະຄອນຫລວງ New Delhi, ວັນທີ 15 ທັນວາ 2010, ໃນລະຫວ່າງການຢ້ຽມຢາມອິນເດຍ. (AP Photo)
ນາຍົກລັດຖະມົນຕີຈີນ ທ່ານ Wen Jiabao ຢ້ຽມຢາມໂຮງຮຽນແຫ່ງນື່ງ ທີ່ນະຄອນຫລວງ New Delhi, ວັນທີ 15 ທັນວາ 2010, ໃນລະຫວ່າງການຢ້ຽມຢາມອິນເດຍ. (AP Photo)

ອິນເດຍຢາກໃຫ້ຈີນລົດຜ່ອນສິ່ງກີດຂວາງຕ່າງໆຕໍ່ການຄ້ານັ້ນລົງ ເພື່ອຮັບປະກັນ​ໃຫ້​ມີຄວາມ ສໍາພັນດ້ານການຄ້າ ທີ່ສົມດຸນຂື້ນກວ່າເກົ່າ ລະຫວ່າງທັງສອງປະເທດ. ນັກ​ຂ່າວ​ວີ​ໂອເອ ນາງ Anjana Pasricha ລາຍງານມາຈາກນະຄອນຫລວງນີວ​ເເດລລີ ວ່າການສົ່ງ​ເສີມ ການຄ້າສອງຝ່າຍ ​ແມ່ນ​ນຶ່ງ​ໃນບັນຫາອັນດັບສູງສຸດ ທີ່ໄດ້ຍົກ​ຂຶ້ນ​ມາປຶກສາຫາລືກັນລະຫວ່າງ ສອງເສດຖະກິດຍັກ​ໃຫຍ່​ຂອງ​ເອ​ເຊຍ ໃນລະຫວ່າງການຢ້ຽມຢາມ ເປັນເວລາສາມວັນ ຂອງ ນາຍົກລັດຖະມົນຕີຈີນ ທ່ານເຫວິນ ເຈຍບາວ ເມື່ອໝໍ່ໆມານີ້ ທອງປາ ມີລາຍ​ລະອຽດ ມາສະເໜີທ່ານ.

ກ່ອນສິ້ນສຸດການເດີນທາງຢ້ຽມຢາມອິນເດຍເປັນເວລາ 3
ວັນ ​ໃນວັນສຸກຜ່ານມານີ້ ນາຍົກລັດຖະມົນຕີຈີນ ທ່ານ
ເຫວິນ ເຈຍບາວ ແລະ ພວກເຈົ້າໜ້າທີ່ລັດຖະບານອິນເດຍ
ໄດ້ຕັ້ງເປົ້າໝາຍອັນ​ໃຫຍ່​ໂຕ​ທະ​ເຍີ​ທະຍານ ທີ່ຈະເພີ່ມການ
ຄ້າລະຫວ່າງ​ກັນຂຶ້ນເປັນສອງເທົ່າຕົວ ຄືໃນມູນຄ່າ 100
ພັນລ້ານໂດລາ ໃຫ້ໄດ້ ພາຍໃນປີ 2015.

ພວກນັກວິເຄາະກ່າວວ່າ ເປົ້າໝາຍດັ່ງກ່າວນີ້​ແມ່ນ​ສາມາດ
ທີ່ຈະບັນລຸ​ໄດ້ ​ເພາະວ່າເວລານີ້ ຈີນເປັນພາຄີການຄ້າລາຍ
ໃຫຍ່ທີ່ສຸດຂອງອິນເດຍຢູ່​ແລ້ວ ແຕ່ກໍຍັງຄົງມີຫລາຍໆບັນ
ຫາທີ່ສ້າງຄວາມເດືອດຮ້ອນໃຫ້ແກ່ຄວາມສໍາພັນລະຫວ່າງ
ສອງເສດຖະກິດ ທີ່ມີການເຕີບໂຕຢ່າງວ່ອງໄວທີ່ສຸດຂອງ ຂົງເຂດເອເຊຍນັ້ນ.

ບັນຫາອັນດັບສູງສຸດບັນຫານຶ່ງນັ້ນ ກໍຄືການຂາດດຸນການຄ້າຂອງອິນເດຍ ໃນມູນຄ່າມະຫາ
ສານກັບຈີນຊຶ່ງຄາດກັນວ່າຈະສູງເຖິງ 20 ພັນລ້ານໂດລາໃນປີນີ້. ທາງລັດຖະບານນີວ​ເເດລ
ລີກ່າວວ່າ ສິ່ງກີດຂວາງຕ່າງໆຕໍ່ຕະຫລາດຈີນນັ້ນ ໝາຍເຖິງ​ວ່າສິນຄ້າແລະການບໍລິການ
ລາຄາສູງຕ່າງໆ ເຊັ່ນດ້ານເພສັດຊະກໍາແລະເທັກໂນໂລຈີ່ດ້ານຂໍ້ມູນຂ່າວສານນັ້ນ ແມ່ນບໍ່ສາ
ມາດເຂົ້າ​ເຖິງ​ຕະຫລາດ​ຂອງ​ຈີນ​ໄດ້. ດ້ວຍ​ເຫດ​ນີ້ ສິນຄ້າສົ່ງອອກຂອງອິນເດຍ​ໄປ​ຍັງຈີນສ່ວນ
ໃຫຍ່ຈຶ່ງ​ມີ​ແຕ່ຈໍາພວກວັດຖຸດິບ ລາຄາ​ຖືກຕ່າງໆ ເຊັ່ນທາດເຫລັກເປັນຕົ້ນ ໃນຂະນະທີ່ຈີນສົ່ງ
ພວກສິນຄ້າສໍາເລັດຮູບຫລາກຫລາຍ​ປະເພດ ​ໄປຂາຍໃຫ້ອິນເດຍ.

ໃນຖະແຫລງການຮ່ວມສະບັບນຶ່ງເມື່ອວັນພະຫັດຜ່ານມານີ້ ຈີນໃຫ້ຄໍາໝັ້ນສັນຍາວ່າຈະແກ້
ໄຂບັນຫາຄວາມເປັນຫ່ວງຂອງອິນເດຍ ແລະ​ເອົາມາດຕະການທີ່ຊຸກຍູ້ສົ່ງເສີມສິນຄ້າສົ່ງ
ອອກຂອງ ອິນເດຍ.

ນອກນີ້ແລ້ວ ລັດຖະບານທັງສອງໄດ້ຊອກຫາ​ທາງເພີ່ມທະວີຂະໜາດ ຂອງການລົງທຶນໂດຍ
ກົງໃນເສດຖະກິດຂອງກັນ​ແລະ​ກັນ ຊຶ່ງມີຂະໜາດນ້ອຍຫລາຍ ໃນປັດຈຸບັນນີ້.

ທ່ານ Vishnu Prakash ​ໂຄສົກກະຊວງຕ່າງປະເທດອິນເດຍ ກ່າວວ່າ ຈີນອາດສາມາດ
ທໍາການລົງທຶນທີ່ໃຫຍ່ກວ່າໄດ້ ໃນພາກສ່ວນການກໍ່ສ້າງໂຄງລ່າງພື້ນຖານຂອງອິນເດຍ ຊຶ່ງ
ທ່ານ Prakash ກ່າວຕໍ່ໄປວ່າ:

ເວລາ​ນີ້ ລັດຖະບານກໍາລັງວາງ ແຜນຈະລົງທຶນ ນຶ່ງພັນ ພັນລ້ານໂດລາ ຫລື​ນຶ່ງ​
ພັນ​ຕື້ໂດ​ລາ ເຂົ້າໃສ່ໃນການພັດທະນາໂຄງລ່າງພື້ນຖານ ຈາກປີ 2012 ຫາ ປີ
2017 ແລະ ອິນເດຍກໍຈະຍິນດີ ຕ້ອນຮັບການມີບົດບາດທີ່ໃຫຍ່ກວ່າ​ເກົ່າ ໂດຍ
ພວກບໍລິສັດຂອງຈີນ ໃນການພັດທະນາໂຄງລ່າງພື້ນຖານຕ່າງໆ ໂດຍສະເພາະ
ໃນພາກສ່ວນຖະໜົນໃຫຍ່ ພາກສ່ວນ​ໄຟຟ້າ ການຂົນສົ່ງມວນ​ຊົນ ແລະອີກ ຫລາຍໆຢ່າງ.”

ນອກນີ້ແລ້ວ ອິນເດຍແລະຈີນຍັງໄດ້ຕົກລົງກັນ ທີ່ຈະປັບປຸງການເຂົ້າຫາເຂົ້າເຖິງເສດຖະກິດ
ຂອງກັນແລະກັນ ​ໂດຍພວກທະນາຄານຂອງເຂົາເຈົ້ານັ້ນ. ​ແລະພວກຜູ້ນໍາດ້ານທຸລະກິດ
ຈາກສອງປະເທດ ຍັງໄດ້ເຊັນຂໍ້ຕົກລົງກັນເຖິງ 50 ສະບັບທີ່ມີມູນຄ່າປະມານ 16 ພັນລ້ານ
ໂດລາ​ໃນ​ຫລາຍໆພາກສ່ວນ ເຊັ່ນໄຟຟ້າ ໂທລະຄົມມະນາຄົມ ເຫລັກແລະພະລັງລົມເປັນຕົ້ນ.

ໃນຂໍ້ສະເໜີອັນນຶ່ງເພື່ອສົ່ງ​ເສີມການຄ້ານັ້ນ ນາຍົກລັດຖະມົນຕີຈີນ ທ່ານ ເຫວິນ ເຈຍບາວ
ກ່າວວ່າ ທັງສອງປະເທດຄວນຈະເລີ່ມຕົ້ນເຈລະຈາກັນ ເລຶ່ອງການ​ເຮັດສົນທິສັນຍາການຄ້າ
ເສລີກັນ. ແຕ່ພວກນັກວິເຄາະດ້ານການຄ້າກ່າວວ່າ ລັດຖະບານນະຄອນນີວເດລລີ ບໍ່ຊົງທີ່
ຈະເຫັນດີນໍາເລຶ່ອງນີ້ ຍ້ອນມີຄວາມເປັນຫ່ວງວ່າ ມັນຈະພາໃຫ້ພາກສ່ວນການຜະລິດຂອງ
ອິນເດຍ ຕົກ​ຢູ່​ໃຕ້ການແຂ່ງຂັນທີ່​ສູ້​ບໍ່​ໄດ້ ກັບພວກຜູ້ຜະລິດທັງຫລາຍຂອງຈີນ ເພາະຈີນ
ເປັນຜູ້ນໍາໃນດ້ານນີ້ຂອງໂລກຢູ່ແລ້ວ.

ນາຍົກລັດຖະມົນຕີຈີນ​ໄປຢ້ຽມຢາມອິນເດຍຄັ້ງນີ້ ​ໂດຍ​ມີຜູ້ຕາງໜ້າດ້ານທຸລະກິດຕິດຕາມ​ໄປ​
ນໍາ ເກືອບຮອດ 400 ຄົນ. ທ່ານເຫວິນ ເຈຍບາວ ນັບວ່າເປັນຜູ້ນໍາຄົນຫລ້າສຸດໃນຫລາຍໆ
ຜູ້ນໍາທີ່​ໄດ້​ໄປຢ້ຽມຢາມອິນເດຍ ຢ່າງ​ຕໍ່​ເນື່ອງ​ກັນ ເພື່ອສະແຫວງຫາ​ໂອກາດ​ຫລາຍ​ຂຶ້ນ ໃນ
ການເຂົ້າຫາ ເຂົ້າເຖິງເສດຖະກິດຂອງອິນ​ເດຍ ຊຶ່ງກໍາລັງເຕີບໂຕຂື້ນ ໃນອັດຕາປະມານເກົ້າ ເປີເຊັນ ໃນເວລານີ້.

XS
SM
MD
LG