ລັດຖະມົນຕີີການຕ່າງປະເທດອິນເດຍ ກ່າວວ່າ ອິນເດຍແລະ
ຈີນ ໄດ້ແກ້ໄຂບັນຫາຄວາມເຄັ່ງຕຶງ ກ່ຽວກັບການປະເຊີນໜ້າ
ທາງທະຫານ ເປັນເວລາສອງອາທິດ ໃນເຂດຊາຍແດນ ທາງ ພາກເໜືອຂອງພູຫິມະໄລແລ້ວ.
ທ່ານນາງ Sushma Swaraj ກ່າວໃນວັນສຸກມື້ນີ້ ຫລັງຈາກ
ໄດ້ພົບປະກັບຄູ່ຕຳແໜ່ງຝ່າຍຈີນທ່ານ Wang Yi ທີ່ນະຄອນ
ນິວຢອກວ່າ ທະຫານຈີນຈະເລີ້ມຖອນກຳລັງອອກໄປ ໃນວັນ
ສຸກມື້ນີ້ແລະຈະແລ້ວສຳເລັດພາຍໃນວັນອັງຄານຈະມາ. ທ່ານ ນາງໄດ້ກ່າວເຖິງການແກ້ໄຂບັນຫານີ້ວ່າ ເປັນຜົນສຳເລັດອັນ
ໃຫຍ່ຫຼວງ.
ທະຫານຈີນຫຼາຍຮ້ອຍຄົນໄດ້ເຂົ້າໄປໃນເຂດດັ່ງກ່າວຊຶ່ງອ້າງກຳມະສິດໂດຍຝ່າຍອິນເດຍ ແລະໄດ້ກໍ່ໃຫ້ເກີດ ການປະເຊີນໜ້າກັນ ຢູ່ໃນເຂດ Ladakh ຊຶ່ງເປັນບໍລິເວນຊາຍແດນທີ່ ເປັນພູຜາສອກຫຼີກຫ່າງໄກ.
ອິນເດຍກ່າວວ່າ ທະຫານຈີນ ທີ່ພວມສ້າງຫົນທາງຢູ່ໃນເຂດຊາຍແດນຂອງຕົນນັ້ນ ຢາກ ສ້າງທາງຕໍ່ເຂົ້າໄປໃນເຂດດັ່ງກ່າວ ທີ່ອ້າງກຳມະສິດໂດຍອິນເດຍ.
ເຈົ້າໜ້າທີ່ເວົ້າວ່າ ຈີນໄດ້ຕົກລົງທີ່ຈະຢຸດບໍ່ສ້າງທາງຕໍ່ເຂົ້າໄປໃນເຂດແດນທີ່ຍັງມີການຂັດ ແຍ້ງກັນ. ເພື່ອເປັນການຕອບແທນ ຝ່າຍອິນເດຍ ໄດ້ຕົກລົງ ທີ່ຈະມ້າງ ຕູບສັງເກດການ ແຫ່ງນຶ່ງ ທີ່ຫາກໍສ້າງຂຶ້ນເມື່ອໄວໆມານີ້.
ປະເທດທັງສອງໄດ້ເກີດບັນຫາຂັດແຍ້ງຢ່າງຮຸນແຮງ ກ່ຽວກັບຊາຍແດນມາເປັນເວລາດົນ ນານ ແລະການບຸກລຸກຂະໜາດນ້ອຍໆຂ້າມຊາຍແດນຢູ່ເລື້ອຍໆທີ່ຍາວ 4000 ຫຼັກກິໂລ ແມັດຂ້າມພູຫິມະໄລນັ້ນ.
