ອິນເດຍ ໄດ້ສະແດງປະຕິກິລິຍາຕອບໂຕ້ຢ່າງແຮງຕໍ່ການຕິຕຽນຂອງປາກິສຖານ ທີ່ວ່າ ຕົນໄດ້ປາບປາມພວກປະທ້ວງໃນແຄວ້ນ Kashmir ໂດຍຮ້ອງປະເທດຄູ່ ປໍລະປັກວ່າ “ເປັນປະເທດກໍ່ການຮ້າຍ.”
ນາຍົກລັດຖະມົນຕີປາກິສຖານ ທ່ານ Nawaz Sharif ໃນຂະນະທີ່ກ່າວຄຳປາໄສ ໃນວັນ
ພຸດທີ່ຜ່ານມາ ຢູ່ກອງປະຊຸມປະຈຳປີ ຂອງສະມັດຊາໃຫຍ່ສະຫະປະຊາຊາດ ໄດ້ຮຽກຮ້ອງ
ໃຫ້ມີການສືບສວນຢ່າງເປັນອິດສະຫລະ ກ່ຽວກັບຍອັນທີ່ທ່ານຮ້ອງວ່າ “ການສັງຫານແບບຮວບຮັດຕັດຕອນ" ແລະ “ການກໍ່ໂທດກຳ” ຢູ່ໃນແຄວ້ນ Kashmir ເພື່ອລົງໂທດ ພວກທີ່ຮັບຜິດຊອບ.
ນັກການທູດອິນເດຍປະຈຳສະຫະປະຊາຊາດ ທ່ານນາງ Eenam Gambhir ໄດ້ໃຊ້ສິດປະເທດຂອງທ່ານນາງ ກ່າວຕອບໂຕ້ ໂດຍບໍ່ໃຫ້ຄວາມສຳຄັນຕໍ່ຄຳປາໄສຂອງທ່ານ Sharif ວ່າ “ເປັນການເທດສະໜາທີ່ໜ້າໄຫວ້ຫລັງຫລອກ.”
ທ່ານນາງກ່າວວ່າ “ອັນທີ່ອິນເດຍເຫັນຢູ່ໃນປາກິສຖານກໍຄື ເປັນປະເທດກໍ່ການຮ້າຍ ຊຶ່ງນຳເງິນເຂົ້າຫລາຍພັນລ້ານໂດລາ ສ່ວນໃຫຍ່ໄດ້ມາຈາກການຊ່ວຍເຫລືອຈາກນາໆຊາດ ເພື່ອເຝິກແອບ, ຊ່ວຍດ້ານການເງິນ ແລະສະໜັບສະໜູນບັນດາກຸ່ມກໍ່ການຮ້າຍ ທີ່ເປັນພວກຫົວຮຸນແຮງຕ້ານບັນດາເພື່ອນບ້ານຂອງຕົນ.”
ທ່ານນາງ Gambhir ໄດ້ຕິຕຽນປາກິສຖານ ໃນການວາງແຜນໃນວັນອາທິດທີ່ຜ່ານມາ ທີ່ພວກກະບົດໄດ້ໂຈມຕີຄ້າຍະະຫານອິນເດຍຢູ່ໃນແຄວ້ນ Kashmir ຊຶ່ງໄດ້ສັງຫານທະຫານ 18 ຄົນ.
