ນາຍົກລັດຖະມົນຕີອິນເດຍ ທ່ານ ມັນໂມຫັນ ສິງ ກໍາລັງທໍາການຢ້ຽມຢາມມຽນມາ ຊຶ່ງເປັນຜູ້ນໍາອິນເດຍຄົນທໍາອິດ ທີ່ໄປຢ້ຽມຢາມປະເທດເພື່ອນບ້ານທາງທິດຕາເວັນອອກຂອງຕົນ ໃນຮອບ 25 ປີຜ່ານມາ.
ດັ່ງທີ່ນັກຂ່າວວີໂອເອ Anjana Pasricha ລາຍງານມາຈາກກຸງນີວເດລີນັ້ນກໍແມ່ນວ່າ ອິນເດຍຢາກສ້າງຄວາມເຂັ້ມແຂງຍິ່ງຂຶ້ນໃຫ້ແກ່ສາຍພົວພັນທາງດ້ານເສດຖະກິດແລະການເມືອງກັບມຽນມາ ຂະນະທີ່ມຽນມາ ຊຶ່ງຄັ້ງນຶ່ງເຄີຍຖືກໂດດດ່ຽວນັ້ນ ເຂົ້າມາຮ່ວມໃນເສດຖະກິດໂລກຄືນໃໝ່.
ໃນລະຫວ່າງການຢ້ຽມຢາມມຽນມາເປັນເວລາ 3 ມື້ ເລີ້ມແຕ່ວັນອາ ທິດມື້ນີ້ເປັນຕົ້ນໄປ ນາຍົກລັດຖະມົນຕີສິງ ຈະທໍາການພົບປະກັບປະທານາທິບໍດີ Thein Sein ພ້ອມທັງກັບທ່ານນາງອອງຊານຊູຈີ ຜູ້ນໍາປະຊາທິປະໄຕໃນມຽນມາ ແລະລົງນາມໃນຂໍ້ຕົກລົງກັນຫຼາຍສະບັບ.
ເຖິງແມ່ນ ທ່ານສິງຈະເປັນນາຍົກລັດຖະມົນຕີຄົນທໍາອິດທີ່ໄປຢ້ຽມຢາມມຽນມານັບແຕ່ປີ 1987 ມາກໍຕາມ ແຕ່ກໍບໍ່ແມ່ນເທື່ອທໍາອິດທີ່ອິນເດຍ ເຂົ້າໄປພົວພັນກັບບັນດາຜູ້ນໍາຂອງມຽນມາ.
ກຸງ New Delhi ໄດ້ສ້າງຄວາມສໍາພັນກັບພວກຜູ້ນໍາອໍານາດປົກຄອງ ທະຫານມຽນມາ ໃນກາງຊຸມປີ 1990 ເຖິງແມ່ນມີການຕໍາໜິຕິຕຽນຈາກນາໆຊາດ ແລະກໍໄດ້ມີການແລກປ່ຽນການຢ້ຽມຢາມໃນລະດັບສູງກັນມາ ລະຫວ່າງສອງປະເທດ ໃນຫວ່າງບໍ່ເທົ່າໃດປີຜ່ານມານີ້.
ໃນຂະນະທີ່ມຽນມາໄດ້ກາຍມາເປັນປະເທດທີ່ຢູ້ຢ່າງໂດດດ່ຽວນ້ອຍລົງ ຫຼັງຈາກທໍາຄວາມພະຍາຍາມມາເພື່ອຍຸດຕິການປົກຄອງຂອງທະຫານໃນມຽນມານັ້ນ ລັດຖະມົນຕີຕ່າງປະເທດຂອງອິນເດຍທ່ານ Ranjan Mathai ກ່າວວ່າ ແນວທາງການເຂົ້າໄປພົວພັນກັບມຽນມາຂອງອິນເດຍນັ້ນ ໄດ້ພິສູດໃຫ້ເຫັນວ່າ ເປັນການຖືກຕ້ອງເໝາະສົມແລ້ວ.
ທ່ານ Mathai ກ່າວວ່າ ອິນເດຍຢາກເຮັດໃຫ້ສະພານທີ່ຕົນໄດ້ສ້າງຂຶ້ນມາແລ້ວ ກັບປະເທດເພື່ອນບ້ານທາງກໍ້າຕາເວັນອອກຂອງຕົນນັ້ນ ມີຄວາມແຂງແຮງຍິ່ງຂຶ້ນແລະສ້າງສາຍພົວພັນທີ່ເລິກເຊິ່ງໃນຫຼາຍໆດ້ານ.