ເຈົ້າໜ້າທີ່ອິນເດຍກ່າວວ່າ ຍັງເປັນການໄວເກີນໄປທີ່ຈະກ່າວຫາຕໍ່ກຸ່ມໃດກຸ່ມນຶ່ງໂດຍສະເພາະ ໃນການໂຈມຕີດ້ວຍລະເບີດ 3 ຄັ້ງຕິດຕໍ່ກັນທີ່ນະຄອນມູມໄບ ສູນກາງການເງິນຂອງອິນເດຍ
ໃນມື້ວັນພຸດວານນີ້ ທີ່ເຮັດໃຫ້ມີຜູ້ເສຍຊີວິດຢ່າງນ້ອຍ 17 ຄົນແລະໄດ້ຮັບບາດເຈັບອີກ 133
ຄົນ.
ລັດຖະມົນຕີກະຊວງພາຍໃນຂອງອິນເດຍທ່ານ P. Chindambaram ກ່າວໃນວັນພະຫັດ
ມື້ນີ້ວ່າ ຕຳຫຼວດພວມທຳການສືບສວນກ່ຽວກັບທຸກຊ່ອງທາງທີ່ເປັນໄປໄດ້ກ່ຽວກັບກຸ່ມທີ່ເປັນ
ປໍລະປັກແລະໜ່ວຍສືບລັບຂອງອິນເດຍບໍ່ໄດ້ມີການເຕືອນລ່ວງໜ້າກ່ຽວກັບການໂຈມຕີເຫຼົ່ານີ້
ຍັງບໍ່ທັນມີກຸ່ມໃດອ້າງເອົາຄວາມຮັບຜິດຊອບ ເທື່ອ.
ເຫດລະເບີດ 2 ຄັ້ງ ໃນເຂດກໍ້າໃຕ້ຂອງນະຄອນມູມໄບແລະອີກຄັ້ງນຶ່ງໃນເຂດໃຈກາງເມືອງ
ໄດ້ເກີດຂຶ້ນຫ່າງກັນ 20 ນາທີ ໃນຊົ່ວໂມງເລີກການຕອນແລງຂອງມື້ວານນີ້.
ລາຍງານໃນຂັ້ນຕົ້ນແຈ້ງວ່າ ມີຜູ້ເສຍຊີວິດ 21 ຄົນ ຈາກເຫດລະເບີດທັງ 3 ແຕ່ຕໍ່ມາກະ
ຊວງພາຍໃນຂອງອິນເດຍ ໄດ້ຫຼຸດໂຕເລກພວກທີ່ເສຍຊີວິດລົງ ແລະເວົ້າວ່າຈຳນວນຜູ້ເສຍ
ອາດຍັງຈະມີການປ່ຽນແປງໄດ້.
ທ່ານ Chindambaram ກ່າວວ່າລັດຖະບານອິນເດຍເຊື່ອວ່າເຫດລະເບີດທັງ 3 ແມ່ນເປັນ
ການໂຈມຕີຕໍ່ການຮ້າຍທີ່ມີການປະສານງານກັນຍ້ອນໄລຍະເວລາທີ່ແຕກຂຶ້ນແມ່ນໃກ້ຄຽງກັນ.
ທ່ານໄດ້ໄປເບິ່ງບ່ອນທີ່ເກີດເຫດລະເບີດທັງ 3 ໃນວັນພະຫັດມື້ນີ້ຕະຫຼອດທັງໄປຢ້ຽມໂຮງໝໍ
ແຫ່ງນຶ່ງ ເພື່ອພົບພໍ້ກັບພວກທີ່ໄດ້ຮັບບາດເຈັບຈາກການໂຈມຕີ.
ກະຊວງພາຍໃນຂອງອິນເດຍໄດ້ມີຄຳສັ່ງໃຫ້ເພີ່ມການຮັກສາຄວາມປອດໄພຢູ່ໃນທົ່ວປະເທດ.
