ຜູ້ພິພາກສາຄົນນຶ່ງຂອງອິນເດຍ ໄດ້ຕັດສິນໂທດປະຫານຊີວິດຜູ້ຊາຍຊາວ
ປາກິດສະຖານ ຍ້ອນບົດບາດຂອງຜູ້ກ່ຽວໃນການໂຈມຕີຂອງພວກກໍ່ການ
ຮ້າຍທີ່ເມືອງມູມໄບໃນເດືອນພະຈິກປີ 2008 ນັ້ນ.
ໃນວັນພະຫັດມື້ນີ້ ຜູ້ພິພາກສາ M.L TAHALIYANI ໄດ້ຕັດສິນໂທດ
ປະຫານຊີວິດ ນາຍ MOHAMMED AJMAL KASAB ມືປືນພຽງຄົນດຽວ
ທີ່ເຈົ້າໜ້າທີ່ຈັບເປັນໄດ້ ໃນລະຫວ່າງການໂຈມຕີ ເປັນເວລາ3 ມື້ ຕໍ່ໂຮງແຮມ
ໃນມູມບາຍທີ່ເຮັດໃຫ້ມີຜູ້ເສຍຊີວິດ 166 ຄົນ.
ການຕັດສິນໂທດທີ່ວ່ານີ້ແມ່ນໃນຄວາມຜິດ 4 ກະທົງຮວມທັງການຄາຕະກຳ
ແລະການເຮັດສົງຄາມຕໍ່ຕ້ານອິນເດຍ. ໃນມື້ວັນຈັນແລ້ວ ນາຍ KASAB
ຖືກພົບເຫັນວ່າມີຄວາມຜິດໃນເກືອບທັງໝົດ 86 ຂໍ້ຫາ ທີ່ລາວໄດ້ຖືກຟ້ອງ.
ໂທດປະຫານຊີວິດດ້ວຍການແຂວນຄໍຢູ່ອິນເດຍຈະຕ້ອງໄດ້ຮັບການເຫັນພ້ອມ
ຈາກສານສູງເສຍກ່ອນ. ພວກນັກຊ່ຽວຊານກ່າວວ່າ ມີທ່າທາງວ່າຂັ້ນຕອນ
ໃນການຂໍອຸທອນທີ່ໃຊ້ເວລາຍືດຍາວນັ້ນຈະມີຂຶ້ນ.
ນາຍ KASAB ອາຍຸ 22 ປີ ແມ່ນນຶ່ງໃນມືປືນຈຳນວນ 10 ຄົນທີ່ເດີນທາງໄປເຖິງ
ນະຄອນມູມໄບໂດຍທາງທະເລແລະໄດ້ທຳການໂຈມຕີສະຖານີລົດໄຟ ໂຮງແຮມ
5 ດາວ 2 ບ່ອນ ຮ້ານອາຫານແຫ່ງນຶ່ງແລະສູນກາງຊາວຢິວ.
