ປະທານາທິບໍດີ ສະຫະລັດ ທ່ານ ດໍໂນລ ທຣຳ ໄດ້ກ່າວໃນວັນຈັນມື້ນີ້ວ່າ “ອິນເດຍ ຈະມີຄວາມສຳຄັນເປັນຢ່າງຍິ່ງຕໍ່ພວກເຮົາຕະຫຼອດໄປ” ໃນຂະນະທີ່ທ່ານ ແລະ ນາຍົກລັດຖະມົນຕີ ອິນເດຍ ທ່ານ ນາເຣັນດຣາ ໂມດີ ໄດ້ຍົກຍ້ອງກັນແລະກັນ ໃນການກ່າວຄຳປາໄສຕໍ່ໜ້າປະຊາຊົນຫຼາຍກວ່າ 100,000 ຄົນ ຜູ້ທີ່ໄດ້ເຕົ້າໂຮມກັນເພື່ອການຊຸມນຸມ “ຕ້ອນຮັບ ທ່ານ ທຣຳ” ໃນເມືອງ ອາເມດາບັດ.
ງານດັ່ງກ່າວແມ່ນສ່ວນນຶ່ງຂອງການຢ້ຽມຢາມປະເທດ 36 ຊົ່ງໂມງຂອງທ່ານ ທຣຳ, ເຊິ່ງຄຳເວົ້ານຶ່ງທີ່ທ່ານໄດ້ກ່າວໃນຄຳປາໄສຂອງທ່ານ ແມ່ນລວມມີການເດີນທາງໄກເກືອບ 13,000 ກິໂລແມັດນັ້ນ.
ທ່ານປະທານາທິບໍດີ ໄດ້ເລີ່ມດ້ວຍການທັກທາຍເປັນພາສາ ອິນເດຍ ວ່າ “ນາມາສເຕ.”
ທ່ານ ທຣຳ ໄດ້ກ່າວວ່າ” ອາເມຣິກາ ຮັກ ອິນເດຍ. ອາເມຣິກາ ເຄົາລົບນັບຖື ອິນເດຍ. ແລະ ອາເມຣິກາ ຈະເປັນເພື່ອນທີ່ຊື່ສັດ ແລະ ຈົງຮັກພັກດີຕໍ່ປະຊາຊົນ ອິນເດຍ ຕະຫຼອດໄປ.”
ທ່ານໄດ້ຍົກຍ້ອງ ອິນເດຍ ດັ່ງກັບປະເທດປະຊາທິປະໄຕທີ່ປະສົບຄວາມສຳເລັດ, ແລະ ໄດ້ເອີ້ນປະເທດນັ້ນວ່າ ເປັນເພື່ອນທີ່ແທ້ຈິງຂອງ ສະຫະລັດ.
ການຢ້ຽມຢາມຂອງທ່ານ ທຣຳ ໄດ້ເລີ່ມຂຶ້ນດ້ວຍການຕ້ອນຮັບດ້ວຍຜ້າພົມແດງທີ່ສະໜາມບິນໃນເມືອງ ອາເມດາບັດ, ໃນລັດ ກູຈາຣັດ ທີ່ເປັນລັດບ່ອນທີ່ທ່ານ ທ່ານ ໂມດີ ອາໄສຢູ່. ປະຊາຊົນຫຼາຍພັນຄົນໄດ້ຮ້ອງເຊຍຕາມເສັ້ນທາງຂະບວນລົດ ໃນຂະນະທີ່ທ່ານ ທຣຳ ແລະ ທ່ານ ໂມດີ ໄດ້ເດີນທາງໃນໄລຍະສັ້ນເພື່ອຢຸດແວ່ທີ່ສະຖານທີ່ສອນສາສະໜາ ຮິນດູ ຂອງທ່ານ ມາຮັດມາ ການດີ.
ກອງທັບກຳມະກອນຂະໜາດນ້ອຍໄດ້ຖືກສົ່ງໄປທີ່ນັ້ນ ກ່ອນການຢ້ຽມຢາມເມືອງ ອາເມດາບັດ ຂອງທ່ານ ທຣຳ ເພື່ອສ້າງກຳແພງຍາວ 400 ແມັດຢູ່ຕາມເສັ້ນທາງຂະບວນລົດ ເພື່ອປ້ອງກັນທີວທັດບ່ອນຢູ່ອາໄສຂອງຄົນທຸກຍາກ. ໂຄງການທີ່ເລັ່ງກໍ່ສ້າງດັ່ງກ່າວຍັງລວມມີ ການຕິດຕັ້ງໂຖດອກໄມ້ປະມານ 150,000 ໂຖ.
ລັດຖະມົນຕີການຕ່າງປະເທດຂອງ ອິນເດຍ ທ່ານ ຮາຊ ວາດານ ຊຣິງລາ (Harsh Vardhan Shringla), ໄດ້ກ່າວຕໍ່ບັນດານັກຂ່າວໃນນະຄອນຫຼວງ ນິວເດລີ ວ່າ “ມັນຈະຄ້າຍຄືກັບງານ “ຮາວດີ, ໂມດີ” ທີ່ຖືກຈັດຂຶ້ນໂດຍຊຸມຊົນ ອາເມຣິກັນ ເຊື້ອສາຍ ອິນເດຍ ເພື່ອເປັນກຽດໃຫ້ແກ່ນາຍົກລັດຖະມົນຕີ ໂມດີ ໃນລະຫວ່າງການຢ້ຽມຢາມນະຄອນ ຮູສຕັນ ຂອງທ່ານໃນເດືອນກັນຍາປີ 2019, ເຊິ່ງປະທານາທິບໍດີ ທຣຳ ກໍໄດ້ເຂົ້າຮ່ວມ.”
ທ່ານ ອາປານາ ປານເດ, ຜູ້ອຳນວຍການໂຄງການລິເລີ່ມ ກ່ຽວກັບ ອະນາຄົນຂອງ ອິນເດຍ ແລະ ເອເຊຍໃຕ້ ທີ່ສະຖາບັນ ຮັດສັນ ໄດ້ກ່າວວ່າ “ການຢ້ຽມຢາມດັ່ງກ່າວສຳຄັນກວ່າໝູ່ຈະເປັນການສະແດງຄວາມຫຼູຫຼາ, ການໂອ້ອວດ ແລະ ສັນຍາລັກ. ມັນເປັນສິ່ງສຳຄັນຕໍ່ຜູ້ນຳປະຊານິຍົມຊາດນິຍົມນັ້ນ ທີ່ວ່າພວກເພິ່ນສາມາດສະແດງໃຫ້ຜູ້ຊົມພາຍໃນປະເທດຂອງພວກເພິ່ນເຫັນ ແລະ ຕໍ່ໂລກວ່າ ພວກເພິ່ນມີຄູ່ຮ່ວມທີ່ສາມາດໄວ້ເນື້ອເຊື່ອໃຈໄດ້ ແລະ ເປັນພັນທະມິດກັນ.”
