ເຖິງແມ່ນວ່າ ຈະມີການເຕີບໂຕຢ່າງຝືດເຄືອງຢູ່ໃນສະຫະລັດ ແລະປະເທດທີ່ຮັ່ງມີໃນຢູໂຣບ ກໍຕາມ ກອງທຶນສາກົນ ຫລື IMF ກໍທໍານາຍວ່າ ເສດຖະກິດໂລກຈະເຕິບໂຕຂຶ້ນໃນອັດຕາ 4.8 ເປີເຊັນໃນປີນີ້, ໂດຍຄາດວ່າຕົວເລກດັ່ງກ່າວຈະຫລຸດຕໍ່າລົງ ໃນປີ 2011.
ທ່ານ Olivier Blanchard ທີ່ປຶກສາດ້ານເສດຖະກິດຂອງ IMF ກ່າວວ່າ ການເຕີບໂຕ ສ່ວນໃຫຍ່ແມ່ນຈະມາຈາກບັນດາ ເສດຖະກິດທີ່ຫາກໍ່ໂຜ່ຕົວຂຶ້ນໃໝ່ໂດຍສະເພາະໃນພາກ ພື້ນ ເອເຊຍ ຊຶ່ງທ່ານກ່າວວ່າ:
"ການຄາດຄະເນຂອງພວກເຮົາ ສໍາລັບພວກປະເທດທີ່ກໍາລັງໂຜ່ໂຕຂື້ນມາດ້ານ
ເສດຖະກິດ ແລະທີ່ກໍາລັງພັດທະນາທັງຫລາຍ ໂດຍລວມແລ້ວ ແມ່ນ 7.1 ເປີ
ເຊັນ ສໍາລັບປີ 2010 ແລະ 6.4 ເປີເຊັນ ສໍາລັບປີ 2011. ສ່ວນສໍາລັບຂົງເຂດ
ເອເຊຍທີ່ກໍາລັງໂຜ່ໂຕຂຶ້ນມາ ພວກເຮົາທໍານາຍວ່າ ການເຕີບໂຕໃນຂົງເຂດ
ເອເຊຍ ທີ່ກໍາລັງໂຜ່ໂຕນັ້ນ ຈະສູງຮອດ 9.4 ເປີເຊັນໃນປີນີ້ແລະ 8.4 ເປີເຊັນ ໃນປີໜ້າ."
ເພື່ອຈະເຮັດໃຫ້ສິ່ງທີ່ທ່ານເອີ້ນວ່າ ການຟື້ນຕົວຄືນທີ່ບໍ່ທົ່ວ
ເຖິງກັນແລະບອບບາງນັ້ນ ຍັ້ງຍືນຢູ່ໄດ້ ທ່ານ Blanchard
ແນະນໍາວ່າ ເສດຖະກິດໂລກຕ້ອງການສ້າງ ໃຫ້ມີຄວາມດຸ່ນ ດ່ຽງ ຫລື ກໍ້າເກິ່ງກັນຄືນອີກ. ທ່ານຊີ້ແຈງວ່າ:
"ຄໍາຖາມມີຢູ່ວ່າ ພວກເຮົາຈະສາມາດບັນລຸການຟື້ນໂຕຄືນຂອງເສດຖະກິດ ແບບມີຄວາມກໍ້າເກິ່ງກັນຫລາຍຂຶ້ນກ່ວາເກົ່າໄດ້ຫລືບໍ່? ຄໍາຕອບກໍແມ່ນວ່າ ໄດ້. ແຕ່ມັນຕ້ອງມີການເຄື່ອນໄຫວສ້າງຄວາມກໍ້າເກິ່ງກັນຄືນໃໝ່ທີ່ສະລັບຊັບຊ້ອນ ໃນລະດັບໂລກ ສອງຢ່າງດ້ວຍກັນ. ຄວາມຈິງແລ້ວ ການສ້າງຄວາມສົມດູນຄືນໃໝ່ ແມ່ນນຶ່ງໃນຫົວຂໍ້ທີ່ສໍາຄັນຕ່າງໆຂອງລາຍງານ ຂອງພວກເຮົາ ແລະແນວຄິດຂອງພວກເຮົາກ່ຽວກັບໂລກ ໃນເວລານີ້."
ທ່ານ Blanchard ກ່າວຕໍ່ໄປວ່າ ເພື່ອໃຫ້ບັນລຸເປົ້າໝາຍນັ້ນໄດ້ ພວກປະເທດທີ່ຮັ່ງມີ ເຊັ່ນ ສະຫະລັດ ຈະຕ້ອງເພີ່ມທະວີການສົ່ງອອກ ໃນຂະນະທີ່ບັນດາເສດຖະກິດທີ່ເຕີບໂຕໄວກວ່າ ຕ້ອງຫລຸດຜ່ອນການກາງຕໍ່ອາໃສຕະຫຼາດຕ່າງປະເທດສໍາລັບການສົ່ງອອກຂອງຕົນ ພ້ອມໆ ກັບກະຕຸ້ນໃຫ້ມີຄວາມຕ້ອງການສິນຄ້າຢູ່ ພາຍໃນປະເທດຫລາຍຂຶ້ນ.
ການຊອກຫາຄວາມດຸ່ນດ່ຽງ ຫລື
ກໍ້າເກິ່ງກັນ ກໍຢູ່ໃນຄວາມຄິດ
ຂອງ ທ່ານ Timothy Geith-
ner ລັດຖະມົນຕີການຄັງຂອງ
ສະຫະລັດ ທີ່ກ່າວຢູ່ສະຖາບັນ
Brooking ໃນນະຄອນຫລວງ
Washington ນັ້ນເຊັ່ນກັນ.
ໂດຍບໍ່ໄດ້ເອີ່ຍຊື່ປະເທດຈີນ,
ທ່ານ Geithner ຊຸກຍູ້ໃຫ້ຈີນ
ເຄື່ອນໄຫວໃຫ້ໄວຂຶ້ນໃນການ
ຂຶ້ນຄ່າເງິນຕາຂອງຕົນນັ້ນ.
ທ່ານກ່າວດັ່ງນີ້:
"ພວກເຮົາເຊື່ອວ່າ ມັນເປັນ ການສໍາຄັນຫລາຍທີ່ຈະຕ້ອງ ມີການທໍາຄວາມກ້າວໜ້າເພີ່ມ ຂື້ນອີກ ໂດຍພວກເສດຖະ ກິດໃຫຍ່ໆ ທີ່ກໍາລັງໂຜ່ໂຕຂຶ້ນມາທັງຫລາຍ ໄປສູ່ລະບົບແລກປ່ຽນເງິນຕາ ທີ່ອີງ ໃສ່ຕະຫລາດແລະປັບປ່ຽນໄດ້. ນີ້ແມ່ນສໍາຄັນຫລາຍເປັນພິເສດ ສໍາລັບພວກປະ ເທດ ທີ່ມີຄ່າເງິນຕາຂອງພວກຕົນຕໍ່າກ່ວາ ຕະຫລາດຫລາຍນັ້ນ."
ລັດຖະບານສະຫະລັດເຊື່ອວ່າ ລັດຖະບານຈີນກົດຄ່າເງິນຢວນຂອງຕົນ ໃຫ້ຕໍ່າກ່ວາສະ ພາບໂຕຈິງ ເພື່ອເຮັດໃຫ້ສິນຄ້າສົ່ງອອກ ຂອງຈີນມີລາຄາຖືກ ແລະສາມາດແຂ່ງຂັນໃນຕະຫລາດໂລກໄດ້ ໃນຂະນະທີ່ສິນຄ້າຂາເຂົ້າຈາກຕ່າງປະເທດໄປຍັງຈີນນັ້ນກັບ ມີລາຄາແພງກວ່າ.
ອົງການ IMF ກ່າວວ່າ ບັນຫາອັດຕາແລກປ່ຽນເງິນຕາ ແລະການເຮັດໃຫ້ເສດຖະກິດໂລກ ມີການດຸ່ນດ່ຽງຄືນອີກ ຈະເປັນຫົວຂໍ້ສູງສຸດ ຂອງວາລະການປະຊຸມ ເວລາ 20 ປະເທດທີ່ມີເສດຖະກິດທີ່ໃຫຍ່ທີ່ສຸດຂອງໂລກ ໄປປະຊຸມກັນ ທີ່ເກົາຫຼີໃຕ້ ໃນທ້າຍປີນີ້.