ສານຍຸດຕິທໍາສາກົນ the International Court of Justice ຫລື ICJ ທີ່ກຸງເຮກ
ປະເທດເນເທີແລນສ໌ ໄດ້ປະກາດໃຫ້ບໍລິເວນຊາຍແດນແຫ່ງນຶ່ງ ທີ່ເປັນຫົວຂໍ້ຜິດຖຽງກັນ
ລະຫວ່າງປະເທດໄທແລະກໍເປູເຈຍນັ້ນ ເປັນເຂດປອດທະຫານຊົ່ວຄາວ ໃນວັນຈັນວານນີ້.
ສານ ICJ ຕັດສິນວ່າ ທັງສອງຝ່າຍຄວນຖອນທະຫານ ອອກໄປຈາກບໍລິເວນອ້ອມແອ້ມວັດເກົ່າແກ່ໃນເຂດຊາຍແດນດັ່ງກ່າວນັ້ນ ແລະປ່ອຍໃຫ້ນັກສັງເກດການຈາກສະມາຄົມອາຊ່ຽນ ຫລືກຸ່ມຈັດຕັ້ງຂອງບັນດາປະຊາຊາດແຫ່ງເອເຊຍຕາເວັນອອກສຽງໃຕ້ ເຂົ້າໄປສັງເກດການຢູ່ທີ່ນັ້ນ ເພື່ອຊ່ວຍປ້ອງກັນບໍ່ໃຫ້ເກີດການປະທະກັນອີກເທື່ອໃໝ່.
ນອກນັ້ນ ສານຍັງມີຄໍາສັ່ງອີກວ່າ ໃຫ້ທັງສອງຝ່າຍແຈ້ງໃຫ້ສານຊາບກ່ຽວກັບ ທຸກໆເລື່ອງທີ່ພົວພັນກັບຄະດີນີ້ ຈົນກ່ວາວ່າຈະມີການຕັດສິນຂັ້ນສຸດທ້າຍ.
ທັງລັດຖະມົນຕີການຕ່າງປະເທດໄທແລະກໍາປູເຈຍ ທີ່ໄປມີໜ້າຢູ່ສານ ເພື່ອລໍຟັງຄໍາຕັດສິນນັ້ນ ຕ່າງກໍສະແດງຮ່ອງຮອຍວ່າ ພວກຕົນພໍໃຈນໍາຄໍາຕັດສິນດັ່ງກ່າວ ແລະ
ກໍຈະປະຕິບັດຕາມ.
ສານຍຸດຕິທໍາສາກົນກ່າວວ່າ ການເອົາມາດ
ຕາການເຫລົ່ານີ້ ແມ່ນມີຄວາມຈໍາເປັນຢ່າງ
ຮີບດ່ວນ ເພື່ອປ້ອງກັນບໍ່ໃຫ້ເກີດອັນທີ່ສານ
ເອີ້ນວ່າ “ຄວາມເສຍຫາຍຢ່າງທີ່ປົວແປງບໍ່ໄດ້”
ໃນລະຫວ່າງທີ່ສານພິຈາລະນາວ່າ ປະເທດໃດ ມີກໍາມະສິດໃນດິນແດນແຫ່ງນັ້ນ.
ຜູ້ພິພາກສາ Hisashi Owada ປະທານສານ ICJ ເປັນຜູ້ອ່ານຄໍາຕັດສິນຂອງສານ:
// ສຽງ //
“ດ້ວຍຄະແນນສຽງເຫັນດີ 11 ຕໍ່ 5 ສຽງ ທັງສອງຝ່າຍ ຕ້ອງຖອນພະນັກງານທະຫານຂອງຕົນ ໂດຍທັນທີ ອອກໄປຈາກບ່ອນປະຈໍາການຢູ່ໃນອັດຈຸບັນນີ້ ຢູ່ໃນເຂດທີ່ຫາກໍຖືກປະກາດໃຫ້ເປັນເຂດທະຫານຊົ່ວຄາວຕາມທີ່ກໍານົດໄວ້ໃນວັກທີ 62 ຂອງຄໍາສັ່ງສະບັບນີ້. ແລະໃຫ້ຍັບຍັ້ງຈາກການສົ່ງທະຫານໄປປະຈໍາຢູ່ພາຍໃນເຂດດັ່ງກ່າວນັ້ນ ແລະຍັບຍັ້ງຈາກການເຄື່ອນໄຫວທາງທະຫານທຸກຢ່າງ ທີ່ແນໃສ່ເຂດນັ້ນ.”
ນອກນີ້ ສານຍຸດຕິທໍາສາກົນຍັງໄດ້ປະຕິເສດ ບໍ່ພິຈາລະນາຄໍາຮ້ອງຂໍຂອງຝ່າຍໄທ ທີ່ຂໍໃຫ້ສານຍົກເລີກຄໍາຮ້ອງຂໍຂອງກໍາປູເຈຍ ທີ່ຢາກໃຫ້ມີການຕີຄວາມໝາຍຂອງຄໍາວ່າ ສິດທິທາງກົດໝາຍຕໍ່ບໍລິເວນດິນແດນຢູ່ອ້ອມແອ້ມວັດຮິນດູ ເກົ່າ 900 ປີນັ້ນ.
ກໍາປູເຈຍເອີ້ນວັດດັ່ງກ່າວວ່າ ເປຣ ວີເຮຍ ຂະນະທີ່ໄທເອີ້ນວ່າ ພະວິຫານ.
ສານຍຸດຕິທໍາສາກົນໄດ້ຕັດສິນໃຫ້ວັດນີ້ ເປັນກໍາມະສິດຂອງກໍາປູເຈຍ ໃນປີ 1962 ແຕ່ທັງພະນົມເປັນກັບໄທມີຄວາມເຫັນຂັດແຍ້ງກັນ ກ່ຽວກັບວ່າຝ່າຍໃດເປັນເຈົ້າຂອງດິນແດນ ຢູ່ອ້ອມແອ້ມວັດນັ້ນ. ການຜິດຖຽງກັນກ່ຽວກັບເລື່ອງນີ້ໄດ້ລະເບີດຂຶ້ນມາໃໝ່ ໃນປີ 2008 ເວລາອົງການສະຫະປະຊາຊາດປະກາດໃຫ້ ວັດເຂົາພະວິຫານເປັນມໍລະໂດກຂອງໂລກ ຊຶ່ງໄດ້ກໍ່ໃຫ້ເກີດປະຕິກິລິຕອບ ດ້ວຍຄວາມຮູ້ສຶກຊາດນິຍົມຢ່າງຮຸນແຮງຢູ່ໃນທັງສອງປະເທດ. ຕໍ່ມາໃນຕົ້ນປີນີ້ ກໍາປູເຈຍກໍໄດ້ຮ້ອງຂໍໃຫ້ສານແປຄວາມໝາຍຂອງຄໍາຕັດສິນເທື່ອກ່ອນນັ້ນໃໝ່.
ທ່ານໄມເກິລ ມອນເຕຊາໂນ ຊຶ່ງເປັນນັກຄົ້ນຄ້ວາຮັບເຊີນທີ່ສະຖາບັນສຶກສາເອເຊຍຕາເວັນອອກສຽງໃຕ້ທີ່ສິງກະໂປ ມີຄວາມເຫັນວ່າ ຄໍາຕັດສິນດັ່ງກ່າວຂອງສານ ICJ ສາມາດຕີຄວາມໝາຍໄດ້ວ່າ ເປັນໄຊຊະນະສໍາລັບຊາວ ໄທຫົວຊາດນິຍົມທັງຫລາຍ ທີ່ໄດ້ທໍາການ ປຸກລະດົມຕໍ່ຕ້ານການກ່າວອ້າງເອົາດິນແດນດັ່ງກ່າວຂອງກໍາປູເຈຍ ແລະໄດ້ຊ່ວຍຮື້ຟື້ນຄວາມເຄ່ງຕຶງກັບຄືນມາ ໂດຍການເຄື່ອນໄຫວຂອງພວກເຂົາເຈົ້ານັ້ນ. ທ່ານມອນເຕຊາໂນເວົ້າວ່າ
// ສຽງ //
“ຢ່າງໃດກໍດີ ພວກເຮົາສາມາດເຂົ້າໃຈໄດ້
ວ່າ ເປັນຫຍັງຝ່າຍກໍາປູເຈຍຈຶ່ງອາດຈະຮູ້
ສຶກຂົມຂຶ່ນແດ່ໜ້ອຍນຶ່ງ ກ່ຽວກັບຄໍາຕັດສິນດັ່ງກ່າວ. ກໍຄືວ່າ ຄວາມເຄ່ງຕຶງທັງຫລາຍ
ນັ້ນແມ່ນອອກມາຈາກການເມືອງພາຍໃນປະເທດໄທ ຊຶ່ງສໍາລັບພວກຊາວໄທແລ້ວ
ມັນແມ່ນການແກະບາດເກົ່າ ເພື່ອເປົ້າໝາຍທາງການເມືອງຢູ່ພາຍໃນປະເທດ. ແລະ
ມາບັດນີ້ ຊາວກໍາປູເຈຍກໍພົບວ່າ ເຂົາເຈົ້າໄດ້ຮັບການປະຕິບັດຕໍ່ ແບບບໍ່ແຕກຕ່າງ
ຫຍັງເລີຍກັບຊາວໄທ ໂດຍສານຍຸດຕິທໍາສາກົນນັ້ນ.”
ທີ່ບາງກອກ ນາຍົກລັດຖະມົນຕີອະພິສິດ ເວດຊາຊີວະ ໄດ້ສະແດງຄວາມເຫັນຕໍ່ນັກຂ່າວວ່າ:
// ສຽງ //
“ຄໍາຕັດສິນຂອງສານ ແມ່ນມີເປົ້າໝາຍເພື່ອຫລຸດຜ່ອນຄວາມເຄ່ງຕຶງ ແລະແນ່ນອນວ່າ ພ້ອມກັບການແກ້ໄຂດ້ວຍການປະກາດເຂດປອດທະຫານນັ້ນ ມັນແມ່ນສິ່ງນຶ່ງທີ່ຂ້າພະເຈົ້າຄິດວ່າ ໄທແລະກໍາປູເຈຍຄວນຈະທໍາງານຮ່ວມກັນ ເພື່ອເບິ່ງວ່າພວກເຮົາຈະເຮັດໄດ້ຫລືບໍ່? ຂ້າພະເຈົ້າຄິດວ່າ ມັນຖືກຕ້ອງແລະສົມເຫດສົມຜົນແລ້ວທີ່ໄທແລະກໍາປູເຈຍຈະຕ້ອງລົມກັນ ເພາະວ່າສານໄດ້ສ້າງພັນທະ ໃຫ້ທັງສອງປະເທດ ແລະເພື່ອບັນລຸຜົນໃນລັກສະນະທີ່ເປັນລະບຽບຮຽບຮ້ອຍ ໂດຍບໍ່ໃຫ້ມີການເຂົ້າໃຈຜິດໃດໆ ຫລືເຮັດໃຫ້ເກີດອຸບັດເຫດຂຶ້ນໄດ້ນັ້ນ ການໂອ້ລົມກັນກໍແມ່ນດີທີ່ສຸດ ແລະກໍ
ມາເບິ່ງກັນວ່າ ເຮັດແນວໃດພວກເຮົາຈຶ່ງຈະເຮັດໄດ້?”
ມີທະຫານແລະພົນລະເຮືອນ ຢ່າງນ້ອຍ 20 ຄົນເສຍຊີວິດໄປ ນັບແຕ່ປີ 2008 ມາ ໃນການສູ້ລົບກັນເປັນຄັ້ງເປັນຄາວລະຫວ່າງ ກອງກໍາລັງຂອງທັງສອງ ຝ່າຍນັ້ນ.
ນອກນີ້ແລ້ວ ສານຍຸດຕິທໍາສາກົນຍັງສັ່ງໃຫ້ຝ່າຍໄທ ປ່ອຍໃຫ້ຊາວກໍາປູເຈຍໄດ້ເຂົ້າໄປຍັງວັດດັ່ງກ່າວໄດ້ຢ່າງເສລີອີກ. ເຖິງແມ່ນວ່າກໍາປູເຈຍຈະເປັນຝ່າຍຄຸ້ມຄອງວັດເຂົາພະວິຫານນັ້ນກໍຕາມ ແຕ່ໄທຊໍ້າພັດເປັນຜູ້ຄວບຄຸມຫົນທາງໃຫຍ່ໄປສູ່ວັດແຫ່ງນັ້ນ.
