ເຮີຣິເຄນ Matthew ໄດ້ອ່ອນກຳລັງລົງໜ້ອຍນຶ່ງ ຈາກລົມພາຍຸທີ່ມີຄວາມແຮງ ປະເພດ ຫ້າລົງມາສູ່ປະເພດສີ່ໃນຂະນະທີ່ພວມພັດຜ່ານມະຫາສະມຸດ Atlantic. ເປັນທີ່ຄາດກັນວ່າ ຈະພາໃຫ້ມີຝົນຕົກໜັກ ຫລາຍສົມຄວນ ແລະເຮັດໃຫ້ເກີດຄວາມວຸ້ນວາຍຢູ່ໃນຫລາຍໆພາກສ່ວນຂອງທະເລ Caribbean ໃນລະຫວ່າງສອງສາມມື້ຂ້າງໜ້ານີ້.ບັນດານັກພະຍາກອນອາກາດສະຫະລັດ ກ່າວວ່າ Matthew ເປັນເຮີຣິເຄນທີ່ມີຄວາມ ແຮງສຸດຢູ່ໃນມະຫາສະມຸດ Atlantic ນັບແຕ່ລົມເຮີຣິເຄນ Felix ທີ່ພັດ ເຂົ້າຖະຫຼົ່ມໃນປີ 2007. ດ້ວຍລົມທີ່ມີຄວາມແຮງສຸດເຖິງ 250 ກິໂລແມັດຕໍ່ຊົ່ວໂມງນີ້ ຈຶ່ງຄາດກັນວ່າ ເຮີຣິເຄນ Matthew ຍັງຈະເປັນລົມພາຍຸທີ່ແຮງ ໄປຈົນຮອດວັນອາທິດມື້ອື່ນ.
ເຮີຣິເຄນ Matthew ຈະມີຜົນກະທົບຕໍ່ພາກພື້ນທະເລ Caribbean ໃນສອງສາມມື້ຂ້າງໜ້ານີ້ ຮວມທັງ Jamaica, Haiti ແລະ Cuba.
ບັນດານັກພະຍາກອນອາກາດທຳນາຍວ່າ ຈະມີຝົນຕົກເຖິງ 25 ຫາ 38 ຊັງຕີແມັດ ແລະໃນບາງເຂດຈະສູງກວ່າ 63 ຊັງຕີແມັດ ຢູ່ Jamaica ແລະພາກຕາເວັນຕົກສຽງໃຕ້ຂອງ Haiti. ສູນກາງເຮີຣິເຄນແຫ່ງຊາດສະຫະລັດ ກ່າວວ່າ ບັນດາຝົນຕົກໜັກດັ່ງກ່າວນີ້ ອາດຈະພາໃຫ້ເກີດ "ນ້ຳຖ້ວມຊຸ ແລະດິນເຈື່ອນທີ່ ເປັນໄພຂົ່ມຂູ່ແກ່ຊີວິດໄດ້."
ເຮີຣິເຄນຫົວນີ້ ໄດ້ເອົາຊີວິດຜູ້ເຄາະຮ້າຍໄປແລ້ວນຶ່ງຄົນ. ຜູ້ປົກຄອງເຂດ La Guajira ຂອງ Columbia ກ່າວວ່າ ຜູ້ຊາຍພື້ນເມືອງອາຍຸ 67 ປີ ຄົນນຶ່ງໄດ້ ເສຍຊີວິດ ຍ້ອນລົມພາຍຸເຂດຮ້ອນຢູ່ໃນເຂດຊົນນະບົດຂອງປະເທດດັ່ງກ່າວ.