ລິ້ງ ສຳຫລັບເຂົ້າຫາ

ເຮີຣິເຄນ Matthew ຫຼຸດຄວາມແຮງລົງ ເປັນພາຍຸປະເພດ 3 ນອກຝັ່ງ Florida


ສອງຄົນພາກັນຍ່າງຢູ່ຕາມຖະໜົນ ໃນຂະນະເຮີຣິເຄນ Matthewເຮັດໃຫ້ຝົນຕົກໜັກ ທີ່ເມືອງ Daytona Beach ລັດ Florida.

ເຮີຣິ​ເຄນ Matthew ​ກຳລັງຖືກຮ້ອງ​ຊື່ວ່າ “ສັດ​ປະຫລາດ” ​ໃນ​ຂະນະ​ທີລົມ​ພາຍຸ ດັ່ງກ່າວ ພັດ​ເຂົ້າຖະຫລົ່ມ​ຊາຍ​ຝັ່ງກ້ຳ​ຕາ​ເວັນ​ອອກ​ຂອງລັດ Florida.

ເຮີຣິ​ເຄນ Matthew ​ໄດ້​ເຮັດ​ໃຫ້​ຫລາຍ​ຮ້ອຍ​ຄົນ​ເສຍ​ຊີວິດ ​ໃນ​ເຂດ​ທະ​ເລ Caribbean ຮວມທັງ​ຢ່າງໜ້ອຍ 300 ຄົນ​ໃນ Haiti ​ເຖິງ​ແມ່ນ​ວ່າລົມພາຍຸ​ຫົວນີ້​ໄດ້​ຫລຸດຄວາມ​ແຮງ​ລົງ​ມາເປັນ​ລະດັບ​ສາມ ຊຶ່ງ​ມີ​ລົມ​ແຮງ 100 ກິ​ໂລ​ແມັດ​ຕໍ່​ຊົ່ວ​ໂມງ ​ແລະ​ບາງ​ຄັ້ງມີ​ແຮງສູງ​ກວ່າ​ນັ້ນ ​ຫລັງ​ຈາກ​ໄດ້​ມາ​ຮອດ​ບໍລິ​ເວນ​ນອກ​ຝັ່ງ​ທະ​ເລ​ລັດ Florida ​ໃນ​ຕອນ​ເຊົ້າ​ວັນ​ສຸກ​ມື້​ນີ້.

​ເລາະ​ລຽບຝັ່ງ​ທະ​ເລ​ທາ​ງພາກ​ຕາ​ເວັນ​ອອກຂອງ​ສະຫະລັດ ຫຼາຍ​ກວ່າສອງລ້ານ​ຄົນ​ໄດ້​ຖືກ​ສັ່ງ​ໃຫ້​ຍົກຍ້າຍ​ອອກ​ຈາກ​ບ້ານ​ເຮືອນ ​ແລະ​ເຂົ້າ​ໄປ​ຢູ່ໃນເຂດ​ທີ່​ປອດ​ໄພ​ກວ່່າ. ຫລາຍ​ກວ່າ 240,000 ຄົນ​ບໍ່​ມີ​ໄຟຟ້າໃຊ້​ໃນ​ຂະນະ​ທີ່​ລົມພາຍຸຫົວນີ້​ພັດ​ເຂົ້າ​ໄປໃກ້ຝັ່ງ​ລັດ Florida ​ແລະ​ຈຳນວນ​ດັ່ງກ່າວ​ຄາດ​ວ່າ​ຈະ​ເພີ້​ມຂຶ້ນ​ໃນ​ແຕ່​ລະ​ຊົວ​ໂມງ ຂະນະ​ທີ່ພາຍຸມຸ້ງໜ້າ​ສູ່​ພາກ​ເໜືອ.

ບັນດາ​ເຈົ້າ​ໜ້າ​ທີ່​ລັດ Florida ກຳລັງ​ຮ້ອງ​ຜູ້ໃດກໍ​ຕາມ​ທີ່​ໄດ້​ຕັດສິນ​ໃຈບໍ່ຍົກຍ້າຍ​ ອອກ​ໄປ​ນັ້ນວ່າ “ບ້າ” ​ແລະ “​ໂງ່​ງ່າ​ວ” ​ແລະ​ບໍ່​ສາມາດ ​ທີ່​ຈະ​ເນັ້ນ​ໜັກ​ໄດ້​ຢ່າງ​ພຽງພໍທີ່​ວ່າ​ ​ລົມ​ພາຍຸ​ຫົວນີ້ເປັນອັນຕະລາຍ​ສຸດ ທີ່​ຈະ​ສ້າງ​ຄວາມ​ເສຍ​ຫາຍຢ່າງ​ໜັກ​ໃຫ້​ແກ່​ລັດ.

ບັນດາ​ນັກ​ພະຍາກອນ​ອາກາດ​ທຳນາຍ​ວ່າ ພາຍຸດັ່ງກ່າວ​ຈະ​ມຸ້ງ​ໜ້າໄປ​ທາງທິດ​ເໜືອ​ເລາະ​ລຽບ​ຝັ່ງ​ທະ​ເລ​ທາງ​ພາກ​ຕາ​ເວັນ​ອອກ ຂອງ​ລັດ Georgia ​ແລະ South Carolina ກ່ອນ​ມຸ້ງໜ້າ​ອອກ​ສູ່​ທະ​ເລ ຫລື​ອາດ​ຈະ​ກ້ຽວ​ກັບ​ຄືນ​ມາ​ຖະຫລົ່ມລັດ Florida ອີກ.

ຮູບພາບທາງອາກາດ ທີຫລຽວເຫັນ ເຮີຣິເຄນ Matthew ຜັດຜ່ານເມືອງ Petit Goave ເກາະ Haiti.
ຮູບພາບທາງອາກາດ ທີຫລຽວເຫັນ ເຮີຣິເຄນ Matthew ຜັດຜ່ານເມືອງ Petit Goave ເກາະ Haiti.

ສູນ​ກາງເຮີຣິ​ເຄນ​ແຫ່ງ​ຊາດຮ້ອງລົມພາຍຸ Matthew ວ່າ​ເປັນ​ເຮີຣິ​ເຄນແຮງ​ສຸດ ​ຢູ່​ໃນ​ຂົງ​ເຂດ​ໃນຮອບ​ຫລາຍ​ທົດ​ສະ​ວັດ​ຜ່ານ​ມາ. ອີງ​ຕາມສູນ​ກາງເຮີຣິ​ເຄນ​ແລ້ວ ລົມພາຍຸ​ຫົວນີ້ ອາດ​ເຮັດ​ໃຫ້​ມີ​ຄື້ນຟອງ​ທະ​ເລສູງເຖິງ​ເກືອ​ບ 5 ​ແມັດ.

ຄົນພາກັນຢືນຢູ່ບ້ານເຮືອນທີ່ຖືກເພພັງຈາກເຮີຣິເຄນ Matthew ທີ່ຜ່ານ ເມືອງ Jeremie ເກາະ Haiti.
ຄົນພາກັນຢືນຢູ່ບ້ານເຮືອນທີ່ຖືກເພພັງຈາກເຮີຣິເຄນ Matthew ທີ່ຜ່ານ ເມືອງ Jeremie ເກາະ Haiti.

ປະທານາທິບໍດີ​ບາຣັກ ​ໂອ​ບາ​ມາ ​ໄດ້​ປະກາດ​ພາວະ​ສຸກ​ເສີນ ຢູ່​ໃນ​ລັດ​ຟລໍຣິດາ Georgia ​ແລະ South Corolina.

ຜູ້​ປົກຄອງ​ລັດ Florida ທ່ານ Rick Scott ​ໄດ້​ລະດົມ​ກຳລັງ​ຮັກສາດິນ​ແດນ ຈຳນວນ ​3,500 ຄົນ. ບັນດາ​ຜູ້​ຊ່ຽວຊານ​ກ່າວ​ວ່າ ບາງສ່ວນ​ຂອງ​ລັດ ອາດ​ຈະ​ຢູ່​ອາ​ໄສ​ບໍ່​ໄດ້ ​ເປັນ​ເວລາ​ຫລາຍ​ອາທິດ​ ຫລັງ​ຈາກ​ພາຍຸຫົວ​ນີ້.

ສິ່ງຂອງບັນເທົາທຸກ ບໍລິຈາກແກ່ຜູ້ເຄາະຮ້າຍຈາກພາຍຸ ຢູ່ເດີ່ນບິນ Port-au-Prince, Haiti.
ສິ່ງຂອງບັນເທົາທຸກ ບໍລິຈາກແກ່ຜູ້ເຄາະຮ້າຍຈາກພາຍຸ ຢູ່ເດີ່ນບິນ Port-au-Prince, Haiti.

ອ່ານຂ່າວນີ້ເພີ້ມເປັນພາສາອັງກິດ

XS
SM
MD
LG