ລົມພາຍຸ ເຮີຣີເຄນໄອຣີນ ສືບຕໍ່ກະໜໍ່າລົງໃນເຂດເລາະຝັ່ງທະເລພາກຕາເວັນອອກຂອງສະຫະລັດ ດ້ວຍຝົນຕົກໜັກແລະລົມພົດແຮງ ໃນວັນອາທິດມື້ນີ້ ເຮັດໃຫ້ປະຊາຊົນເສຍຊີວິດໄປແລ້ວຢ່າງນ້ອຍ 8 ຄົນ ແລະເຮັດໃຫ້ການຈັນຈອນໄປມາທາງບົກແລະທາງອາກາດເປັນເປ້ຍລ່ອຍໄປ.
ສູນກາງລົມພາຍຸ ເຮີຣີເຄນ ແຫ່ງຊາດ ກ່າວວ່າ ຂະນະນີ້ ລົມພາຍຸ ໄອຣີນກໍາລັງເຄື່ອນເຂົ້າສູ່ນະຄອນນີວຢອກດ້ວຍລົມພັດແຮງເຖິງ 120 ຫລັກກິໂລແມັດຕໍ່ຊົ່ວໂມງ.
ພວກທໍານາຍອາກາດກ່າວຕື່ມວ່າ ລົມພາຍຸ ໄອຣີນຈະເຄື່ອນໄປສູ່ພາກໃຕ້ຂອງພວກລັດທີ່ຕັ້ງຢູ່ແຄມທະເລພາກຕາເວັນອອກສຽງເໜືອຂອງສະຫະລັດໃນຕອນບ່າຍມື້ນີ້ ກ່ອນຈະເຄື່ອນໄປຮອດປະເທດການາດາ ໃນແລງວັນອາທິດມື້ນີ້.
ຜົນກະທົບຈາກລົມພາຍຸລູກນີ້ໄດ້ເຮັດໃຫ້ໂຮງໄຟຟ້ານີວເຄລຍ 2 ແຫ່ງຕ້ອງຢຸດແລ່ນ ຊຶ່ງໂຮງໄຟຟ້າແຫ່ງນຶ່ງແມ່ນຕັ້ງຢູ່ໃນລັດ Maryland ແລະອີກແຫ່ງນຶ່ງຕັ້ງຢູ່ໃນລັດ New jersey. ບັນດາເຈົ້າໜ້າທີ່ກ່າວວ່າ ໂຮງໄຟຟ້າເຫລົ່ານີ້ປອດໄພ ແລະຍັງບໍ່ມີຜູ້ຄົນໃດໄດ້ຮັບອັນຕະລາຍໃດໆ.
ລົມພາຍຸ Irene ໄດ້ເລີ້ມພັດເຂົ້າຝັ່ງລັດ North Carolina ໃນເຊົ້າວັນເສົາວານນີ້ ໂດຍໄດ້ເຮັດໃຫ້ນໍ້າຖ້ວມຖະໜົນຫົນທາງ ແລະເຮັດໃຫ້ຕົ້ນໄມ້ຫັກລົງດ້ວຍລົມແຮງ 140 ຫລັກກິໂລແມັດຕໍ່ຊົ່ວໂມງ. ຕໍ່ມາລົມລູກນີ້ໄດ້ເຄື່ອນຂຶ້ນມາສູ່ເຂດອ້ອມແອ້ມນະຄອນຫລວງວໍຊິງຕັນ ທີ່ຖືກລົມແຮງ ແລະຝົນຕົກໜັກພັດກະໜໍ່າ ເຮັດໃຫ້ບາງບ່ອນຖືກນໍ້າຖ້ວມແລະຕົ້ນໄມ້ລົ້ມລົງ.
ພວກບ້ານເຮືອນແລະຮ້ານຄ້າຮ້ານຂາຍປະມານ 2 ລ້ານແຫ່ງ ບໍ່ມີໄຟຟ້າໃຊ້ໃນພາກຕາເວັນອອກຂອງສະຫະລັດ ແລະຢ່າງນ້ອຍມີປະຊາ ຊົນເສຍຊີວິດໄປແລ້ວ 8 ຄົນ. ຫລາຍສິບລ້ານຄົນແມ່ນດໍາລົງຊີວິດຢູ່ຕາມເສ້ນທາງຂອງພາຍຸລູກນີ້ ຊຶ່ງກໍາລັງພັດຜ່ານຂົງເຂດທີ່ມີຜູ້ຄົນອາໄສຢູ່ຢ່າງໜາແໜ້ນທີ່ສຸດເຂດນຶ່ງຂອງປະເທດ. ນອກນັ້ນແລ້ວ ເຮີຣີເຄນໄອຣີນ ຍັງກໍ່ໃຫ້ເກີດລົມພາຍຸຫົວກຸດຫລື tornado ທີ່ໄດ້ທໍາລາຍບ້ານເຮືອນຫລາຍຫລັງໃນລັດ Delaware ແລະ Virginia. ເວລານີ້ ມີການຕັກເຕືອນປະຊາຊົນກ່ຽວກັບລົມ tornado ໃນລັດນີວຢອກແລະໃນເຂດອື່ນໆອີກ.
