ໃນຂະນະທີ່ພາຍຸເຮີຣິເຄນ ມີລຕັນ ທີ່ມີຄວາມແຮງລະດັບ 4 ຢູ່ນອກອ່າວຂອງລັດຟລໍຣິດາ ກຳລັງເຄື່ອນຕົວໄປໃນທິດຕາເວັນອອກສຽງໃຕ້ສູ່ແຄມຝັ່ງກ້ຳຕາເວັນຕົກຂອງລັດດັ່ງກ່າວຢູ່ນີ້ ທ່ານຣອບເບີຕ໌ ຣັດໂຊລ ແລະແມ່ຂອງລາວ ຍານາງ ປາທຣິເຊຍ ກໍພາກັນຂັບລົດປະມານ 1.6 ກິໂລແມັດຈາກບ້ານຂອງລາວ ທີ່ຕັ້ງຢູ່ໃນເມືອງແທມປາ ລັດດຽວກັນນີ້ ເພື່ອໄປເບິ່ງຄື້ນທະເລຊັດຂຶ້ນຝັ່ງຈາກພາຍຸເຮີຣິເຄນ ມີລຕັນ ທີ່ກຳລັງກະທົບຕໍ່ອ່າວ ຮີລສໂບໂລ ໃນວັນພຸດ ທີ 9 ວານນີ້ ອີງຕາມລາຍງານຂອງອົງການຂ່າວຣອຍເຕີສ໌.
ໂດຍຜ່ານຜ່າລົມແລະຝົນທີ່ກຳລັງຕົກໜັກ, ທ່ານຣອບເບີດ ອາຍຸ 46 ປີ ເປັນຜູ້ຈັດການບໍລິສັດຂາຍປ່ອງຢ້ຽມ ແລະປະຕູ ໄດ້ກ່າວວ່າ ພາຍຸຫົວນີ້ ໄດ້ສ້າງແຮງບັນດານໃຈໃຫ້ເຄົາລົບນັບຖືທຳມະຊາດ.
“ເຈົ້າກໍຮູ້, ແນ່ນອນຂ້ອຍຈະບໍ່ເອົາຊີວິດຂອງຂ້ອຍມາສ່ຽງດອກ” ທ່ານຣອບເບີ ກ່າວ ແລະກ່າວຕໍ່ໄປວ່າ “ແຕ່ເຈົ້າກໍຮູ້, ໃນລະດັບໃດນຶ່ງ, ມັນມະຫັດສະຈັນ ທີ່ຈະເຫັນ ແມ່ຂອງທຳມະຊາດ....ດ້ວຍກຳແຮງແບບນີ້.”
ແມ່ຂອງທ່ານຣອບເບີດ, ຍານາງປາທຣິສເຊຍ ໄດ້ເດີນທາງມາຈາກລັດເວີຈີເນຍ ເພື່ອຢ້ຽມຢາມລູກຊາຍບໍ່ດົນຫຼັງຈາກທີ່ພາຍຸເຮີຣິເຄນ ເຮລີນ ໄດ້ກະທົບຕໍ່ລັດຟລໍຣິດາ ປະມານສອງອາທິດກ່ອນ.
“ຂ້ອຍຮູ້ສຶກຕື່ນເຕັ້ນຫຼາຍຕະຫຼອດຄືນກ່ຽວກັບພາຍຸ ເພາະວ່າ ມັນເປັນເທື່ອທຳອິດທີ່ເຫັນເຮີຣິເຄນ” ຍານາງປາທຣິເຊຍ ໄດ້ກ່າວ ແລະກ່າວຕໍ່ໄປວ່າ “ແຕ່ຂ້ອງພຽງຢາກເຫັນນ້ຳ ແລະເຈົ້າກໍຮູ້, ໄດ້ຮັບປະສົບການແບບຟລໍຣິດາທັງໝົດ.”
ເຮີຣິເຄນ ມີລຕັນທີ່ຂະຫຍາຍຕົວອອກເລື້ອຍ ກຳລັງໃກ້ເຂົ້າແຄມຝັ່ງກ້ຳຕາເວັນຕົກຂອງລັດຟລໍຣິດາ ໃນວັນພຸດວານນີ້, ກໍ່ໃຫ້ເກີດພາຍຸລົມໝູນ ທໍນາໂດຫຼາຍຫົວ ແລະພັດກະທົບຕໍ່ຂົງເຂດພ້ອມກັບຝົນ ແລະລົມເປັນເວລາຫຼາຍຊົ່ວໂມງ ກ່ອນທີ່ຄາດໝາຍວ່າ ມັນຈະເຄື່ອນຂຶ້ນຝັ່ງໃກ້ກັບເມືອງແທມປາເບ, ບ່ອນທີ່ມັນອາດນຳເອົາຄືນຟອງທະເລທີ່ເປັນໄພອັນຕະລາຍຕໍ່ຊີວິດ ມາຍັງຊຸມຊົນທີ່ອາໃສຢູ່ຕາມແຄມນ້ຳ ທີ່ຫາກໍໄດ້ຮັບຜົນກະທົບມາແລ້ວໂດຍພາຍຸເຮີຣິເຄນເຮລີນ.
ປະຊາຊົນຫຼາຍເຖິງສອງລ້ານຄົນທົ່ວລັດຟລໍຣິດາ ໄດ້ຖືກສັ່ງໃຫ້ຍົກຍ້າຍອອກ ແລະອີກຫຼາຍລ້ານຄົນແມ່ນຢູ່ໃນເສັ້ນທາງໂດຍກົງຂອງພາຍຸມີລຕັນ, ເຊິ່ງໄດ້ຖືກກະທົບເມື່ອສອງອາທິດມໍ່ໆມານີ້ ຫຼັງຈາກພາຍຸເຮລີນ ໄດ້ຕັດຜ່ານພື້ນທີ່ຂະໜາດໃຫຍ່ສ້າງຄວາມເສຍຫາຍຢ່າງໃຫຍ່ໃນລັດຟລໍຣິດາ ແລະລັດອື່ນໆອີກຈຳນວນນຶ່ງ.
ບັນດາເຈົ້າໜ້າທີ່ໄດ້ອອກຄຳເຕືອນເພີ້ມຕື່ມອີກຫຼາຍຄັ້ງໃນວັນພຸດວານນີ້ ຂະນະທີ່ພາຍຸຈະພັດຂຶ້ນຝັ່ງ ຕາມການຄາດໝາຍ ໃນຕອນແລງວັນພຸດວານນີ້ ເຊິ່ງຫຍັບໃກ້ເຂົ້າມາແລ້ວ.
ຟໍຣັມສະແດງຄວາມຄິດເຫັນ