ບັນດາເຈົ້າໜ້າທີ່ ຮັງກາຣີ ໄດ້ປິດສະຖານີລົດໄຟຫຼັກ ໃນນະຄອນ
ຫຼວງ Budapest ເຮັດໃຫ້ພວກອົບພະຍົບຫຼາຍຮ້ອຍຄົນ ຕິດຄ້າງ
ຢູ່ທີ່ນັ້ນ ຊຶ່ງສ່ວນໃຫຍ່ມາຈາກບັນດາປະເທດທີ່ ເກີດຄວາມຮຸນ
ແຮງໃນພາກຕາເວັນອອກກາງ ທີ່ພວມພະຍາຍາມເດີນທາງໄປ
ຍັງ Austria ແລະເຢຍຣະມັນ.
ການປະກາດທາງທໍລະໂຄ່ງທີ່ດັງໆ ໃນສະຖານີລົດໄຟສາຍຕາເວັນອອກໃນວັນອັງຄານມື້ນີ້ເວົ້າວ່າ ຈະບໍ່ມີລົດໄຟເຂົ້າອອກແຕ່ຢ່າງໃດ ຈົນກວ່າວ່າ ໄດ້ຮັບຄຳສັ່ງແລະຮຽກຮ້ອງໃຫ້ພວກຜູ້ໂດຍ ສານທັງໝົດຕ້ອງອອກຈາກສະຖານທີ່.
ຕຳຫຼວດຈຳນວນຫຼາຍຮ້ອຍຄົນ ໄດ້ຄຸ້ມກັນພວກອົບພະຍົບເຫຼົ່ານີ້ ອອກໄປຈາກສະຖານນີດັ່ງກ່າວແລະສະກັດກັ້ນບໍ່ໃຫ້ເຂົາເຈົ້າກັບຄືນເຂົ້າປະເທດນຳ. ຍັງບໍ່ທັນມີລາຍງານເຖິງການປະທະກັນ ແຕ່ຢ່າງໃດເທື່ອ ຊຶ່ງຕ່າງໄປຈາກເຊົ້າຂອງມື້ນີ້ ບ່ອນທີ່ມີຜູ້ຄົນຫຼາຍຮ້ອຍຄົນພະຍາຍາມເດີນທາງໄປຍັງນະຄອນວຽນນາ ແຕ່ວ່າ ຖືກກີດກັນໂດຍຕຳຫຼວດ.
ເຈົ້າໜ້າທີ່ Austria ກ່າວວ່າ ມີອົບພະຍົບຈຳນວນ 3 ພັນ 650 ຄົນ ຊຶ່ງເປັນຈຳນວນຫຼາຍທີ່ສຸດພາຍໃນມື້ນຶ່ງຂອງປີນີ້ ໄດ້ໄປຮອດນະຄອນວຽນນາໃນວັນຈັນວານນີ້.
ນີ້ແມ່ນຄື້ນຟອງຫຼ້າສຸດຂອງພວກຜູ້ຄົນ ທີ່ພວມຫາທາງຢ່າງຮີບຮ້ອນເພື່ອຊອກຫາຊ່ອງທາງ ເຂົ້າໄປລີ້ໄພໃນບັນດາປະເທດສະພາບຢູໂຣບ.