ປະຊາຊົນບຣາຊີລຫຼາຍແສນຄົນພາກັນເດີນຂະບວນຢູ່ໃນ
ຫົວເມືອງຕ່າງໆ ໃນທົ່ວປະເທດໃນວັນອາທິດວານນີ້ ທວງ
ໃຫ້ໂຄ່ນລົ້ມປະທາ ນາທິບໍດີ Dilma Rousseff ອອກຈາກ
ຕຳແໜ່ງ ຍ້ອນການສໍ້ລາດ ບັງຫຼວງຂອງລັດຖະບານ.
ຄວາມໂກດແຄ້ນສ່ວນໃຫຍ່ຂອງປະຊາຊົນ ຕໍ່ທ່ານນາງ
Rousseff ແມ່ນສືບເນື່ອງມາຈາກ ຂ່າວທີ່ຖືກເປີດເຜີຍອອກ
ມາກ່ຽວກັບການໃຫ້ເງິນສິນບົນ ແກ່ບໍລິສັດລັດວິສາຫະກິດນ້ຳ
ມັນ Petrobras ຊຶ່ງພວກ ໄອຍະການເອີ້ນວ່າ ເປັນແຜນການ
ສໍ້ລາດບັງຫຼວງຄັ້ງໃຫຍ່ທີ່ສຸດທີ່ພົບເຫັນໃນບຣາຊີລ.
ຢ່າງໜ້ອຍມີການຈ່າຍເງິນໄປແລ້ວ 800 ລ້ານດອນລາ ໃນຮູບຂອງສິນບົນແລະເງິນອື່ນໆ ໂດຍພວກບໍລິສັດກໍ່ສ້າງແລະວິສະວະກຳໃຫຍ່ທີ່ສຸດຂອງປະເທດ ເພື່ອແລກປ່ຽນກັບສັນ
ຍາຈ້າງຕ່າງໆ ທີ່ໂກງລາຄາຂອງບໍລິສັດ Petrobras ນັ້ນ.
ພວກນັກການເມືອງທີ່ສຳຄັນຫຼາຍສິບຄົນ ຮວມທັງພວກພັນທະມິດໃກ້ຊິດຂອງປະທານາທິ
ບໍດີ ແລະພວກອະດີດຫົວໜ້າບໍລິຫານບໍລິສັດ Petrobras ກຳລັງຢູ່ພາຍໃຕ້ການສືບສວນ
ສອບສວນ. ຍັງບໍ່ທັນມີຜູ້ໃດຖືກຕັດສິນວ່າມີຄວາມຜິດເທື່ອ ແຕ່ມີຜູ້ແທນ 22 ຄົນ ພ້ອມທັງ
ສະມາຊິກສະພາສູງ 13 ຄົນ ແລະຜູ້ວ່າການລັດ 2 ຄົນ ໄດ້ຖືກກ່າວຫາວ່າ ຮັບເອົາສິນບົນ.
ຄວາມຜິດທີ່ຖືກກ່າວຫາບາງຢ່າງ ມີຂຶ້ນໃນຂະນະທີ່ທ່ານນາງ Rousseff ເປັນປະທານ
ສະພາອຳນວຍການຂອງບໍລິສັດ Petrobras. ແຕ່ທ່ານນາງບໍ່ໄດ້ຖືກສອບສວນ.
ນອກຈາກຂ່າວນອງນັນເລື້ອງການສໍ້ລາດບັງຫຼວງທີ່ບໍລິສັດ Petrobras ນີ້ແລ້ວ ທ່ານນາງ
Rousseff ກຳລັງປະເຊີນໜ້າກັບບັນຫາເງິນເຟີ້ທີ່ສູງຂຶ້ນເລື້ອຍໆ ແລະເສດຖະກິດຂອງ
ບຣາຊີລ ກຳລັງຈະຕົກຕ່ຳຖອຍຫຼັງ.
ການໂຮມຊຸມນຸມປະທ້ວງໃນວັນອາທິດວານນີ້ ສ່ວນໃຫຍ່ແມ່ນດຳເນີນໄປຢ່າງສັນຕິແລະຄຶກຄື້ນ ບໍ່ມີຄວາມຮຸນແຮງຫຍັງຫຼາຍຄືກັນກັບ ຄື້ນຟອງແຫ່ງການເດີນຂະບວນປະທ້ວງ
ຄັ້ງໃຫຍ່ໃນປີ 2013 ເວລາປະຊາຊົນບຣາຊີລ ທຳການປະທ້ວງ ຄ່າໃຊ້ຈ່າຍໃນການເປັນ
ເຈົ້າພາບຈັດການແຂ່ງຂັບເຕະບານໂລກໃນປີ 2014 ນັ້ນ.
