ລິ້ງ ສຳຫລັບເຂົ້າຫາ

ກຸ່ມ Boko Haram ເພີ້ມການໂຈມຕີ ໃນພາກຕາເວັນອອກ ສຽງເໜືອ ຂອງ ໄນເຈີເຣຍ


ແຜນທີ່ ເມືອງ Gwoza ຂອງໄນຈີເຣຍ
ເບິ່ງ​ຄື​ວ່າ ກຸ່ມ Boko Haram ​ພວມທຳການ​ໂຈມ​ຕີ​ເພີ້ມຂຶ້ນ ໃນ
ພາກ​ຕາ​ເວັນ​ອອກສຽງ​ເໜືອ​ຂອງ​ໄນຈີເຣຍແລະ​ໃນ​ບາງ​ເຂດ​ນັ້ນ
​ເຖິງ​ກັບ​ເອົາ​ທຸງຂອງພວກ​ເຂົາ​ປັກ​ໄວ້ ​ໃນ​ໝູ່ບ້ານ​ທີ່​ພວກ​ເຂົາ​ບຸກ
​ເຂົ້າ​ໂຈມ​ຕີ.

ພວກ​ທີ່​ເຫັນ​ເຫດການ​ແລະ​ເຈົ້າ​ໜ້າ​ທີ່​ກ່າວ​ວ່າ ພວກ​ທີ່​ສົງໄສວ່າ ເປັນສະມາຊິກຂອງກຸ່ມຫົວຮຸນແຮງ Boko Haram ​ໄດ້​ສັງຫານ
​ພົນລະ​ເຮືອ​ນຫຼາຍ​ສິບ​ຄົນ ​ໃນ​ການ​ບຸກ​ໂຈມຕີໝູ່ບ້ານຕ່າງ​ໆ​ໃນ
ພາກ​ຕາ​ເວັນ​ອອກສຽງ​ເໜືອ​ຂອງປະ​ເທດນັ້ນ.

ການ​ບຸກໂຈມ​ຕີເຫຼົ່າ​ນີ້ ​ແມ່ນ​ຮວມທັງ​ການ​ໂຈມ​ຕີເມືອງ Gwoza ໃນລັດ Borno. ພວກທີີ່ເຫັນ ເຫດການ​ຫຼາຍ​ຄົນ​ກ່າວ​ວ່າ ມີ​ປືນທີ່ໃສ່ເຄື່ອງ​ແບບ​ທະຫານ ​ໄດ້​ລະດົມຍິງ​ເຂົ້າໃສ່​ພວກ​ຊາວບ້ານ ​ແລະ​ຈູດເຜົາ​ບ້ານເຮືອນເຂົາ​ເຈົ້າ. ພວກ​ເຂົາ​ເຈົ້າ​ກ່າວ​ວ່າ ​ໄດ້​ມີ​ຜູ້​ຄົນ​ຈຳນ​ວນຫຼວງ​ຫຼາຍ​ ຖືກສັງ ຫານ.

ກຸ່ມ​ຫົວ​ຮຸນ​ແຮງ​ອິສລາມ ຍັງ​ຈັບພວກ​ເດັກນ້ອຍ​ນັກຮຽນ​ຍິງ​ຫຼາຍ​ກວ່າ 200 ຄົນໄວ້ເປັນຕົວ
ປະກັນ ທີ່ຖືກລັກພາໂຕໄປ​ຈາກ​ໂຮງຮຽນ​ໃນລັດ Borno ເມື່ອກາງ​ເດືອນ​ເມສາ​ຜ່ານ​ມາ​ນີ້.

​ເຈົ້າ​ໜ້າ​ທີ່​ໄນ​ເຈີ​ເຣຍ​ເຊື່ອ​ວ່າ ພວກຫົວຮຸນແຮງຈຸນີ້ ​ແມ່ນ​ເປັນ​ຜູ້​ຮັບຜິດຊອບ​ຕໍ່​ການວາງລະ​ເບີດ​ສອງ​ຄັ້ງຊ້ອນໃນ​ເມືອງ​ Jos ທາງພາກກາງຂອງ​ປະ​ເທດ ​ເມື່ອ​ເດືອນພຶດສະພາຜ່ານ
ມາ ທີ່​ເຮັດ ​ໃຫ້​ມີ​ຜູ້​ເສຍ​ຊີວິດຢ່າງ​ນ້ອຍ 118 ຄົນ.

ລັດຖະບານ​ໄນ​ເຈີ​ເຣຍ ໄດ້​ດີ້ນຮົນຕໍ່ສູ້ເພື່ອຫາທາງຄວບຄຸມ​ກຸ່ມ​ດັ່ງກ່າວ ​ເຖິງ​ແມ່ນ​ໄດ້​ມີ​ການ​ປະກາດພາ​ວະສຸ​ກ​ເສີນ ​ໃນ​ພາກ​ຕາ​ເວັນ​ອອກສຽງ​ເໜືອ​ຂອງປະ​ເທດ ພ້ອມ​ທັງ​ການສົ່ງທະຫານຫຼາຍ​ພັນ​ຄົນ ​ໄປ​ຍັງເຂດດັ່ງກ່າວກໍ​ຕາມ.

​ໃນ​ວັນ​ພຸດ​ວານ​ນີ້ ​ເຈົ້າ​ໜ້າ​ທີ່​ໄນ​ເຈີ​ເຣຍ ໄດ້ປະຕິ​ເສດ​ຕໍ່​ລາຍ​ງານ​ສະບັບ​ນຶ່ງ​ທີ່​ກ່າວວ່າ ບັນດາ​ເຈົ້າ​ໜ້າ​ທີ່ 15 ຄົນ ຮວມທັງບັນດານາຍ​ພົນ 10 ທ່ານ ໄດ້​ຖືກດຳເນີນຄະດີ
ໂດຍສານທະຫານຍ້ອນ ​ໃຫ້ການຮ່ວມມືກັບ​ກຸ່ມຫົວຮຸນແຮງ Boko Haram.
XS
SM
MD
LG