ອຸນຫະພູມສູງເປັນປະຫວັດການ ໄດ້ເຮັດໃຫ້ມີຜູ້ເສຍຊີວິດຫລາຍ
ຮ້ອຍ ຄົນ ໃນເມືອງທ່າ Karachi. ເຈົ້າໜ້າທີ່ ປາກິສຖານ ກ່າວວ່າ
ມີປະຊາຊົນຫຼາຍກວ່າ 800 ຄົນໃນເມືອງ Karachi ໄດ້ເສຍຊີວິດ
ໃນຄື້ນຄວາມຮ້ອນຈັດທີ່ກຳລັງຄຸກຄາມ ຂົງເຂດດັ່ງກ່າວ. ໃນຂະນະ
ທີ່ມີການພະຍາກອນວ່າ ຈະມີອາກາດທີ່ເຢັນກວ່າເຄື່ອນເຂົ້າມາເຊິ່ງ
ມັນກໍຊ້າໂພດແລ້ວສຳລັບບາງຄົນທີ່ບໍ່ໝັ້ນຄົງທີ່ສຸດຢູ່ໃນເມືອງ
ດັ່ງກ່າວ.
ຊາວປາກິສຖານ ປົກກະຕິຈະລຶ້ງເຄີຍກັບອຸນຫະພູມທີ່ຂ່ອນຂ້າງຈະສູງຢູ່ແລ້ວ. ແຕ່ຈັ່ງໃດກໍຕາມ ຄວາມຮ້ອນນີ້ແມ່ນແຕກຕ່າງຈາກສິ່ງທີ່ພວກເຂົາຄຸ້ນເຄີຍ.
ທ່ານ Saeed Qureshi, ຜູ້ດູແລການແພດ ໃນໂຮງໝໍໃຫຍ່ເມືອງ Karachi ໄດ້ກ່າວວ່າ “ເມືອງ Karachi ເຄີຍມີອຸນຫະພູມທີ່ສູງ ມາ ກ່ອນ, ຈັ່ງໃດກໍ່ຕາມປົກກະຕິມັນຈະມີຄວາມຮ້ອນທີ່ຊຸ່ມ ພ້ອມ. ເທື່ອນີ້, ມັນເປັນອຸນຫະພູມສູງ ມີຄວາມຮ້ອນທີ່ແຫ້ງ. ແລະ ຍ້ອນແນວນີ້ ຂ້າພະເຈົ້າຄິດວ່າ ເປັນສາເຫດເຮັດໃຫ້ເປັນໄຂ້ລົມຮ້ອນສູງ.”
ສຳລັບປະຊາຊົນຂອງເມືອງ Karachi ສະຖານະການແມ່ນໄດ້ຊ້ຳເຕີມໂດຍການຂາດໄຟຟ້າ ຮຸນແຮງ. ເນື່ອງຈາກຈຳນວນຜູ້ເສຍຊີວິດ ເພິ່ມຂຶ້ນເກືອບຮອດ 900 ຄົນ, ນາຍົກລັດຖະມົນຕີ ປາກິສຖານ ໄດ້ອອກຄຳສັ່ງໃຫ້ ອົງການຄຸ້ມຄອງໄພພິບັດແຫ່ງຊາດ ເອົາມາດຕະການສຸກເສີນ ເພື່ອຄວບຄຸມສະຖານະການ.
