ທ່ານ Tom Porteous ຊຶ່ງເປັນຜູ້ອຳນວຍການຂອງກຸ່ມ
ປົກປ້ອງສິດທິມະນຸດ Human Rights Watch ປະຈຳ
ກຸງລອນດອນກ່າວວ່າບັນດາລັດຖະບານປະຊາທິປະໄຕຊຶ່ງ
ໂດຍທົ່ວໄປແລ້ວໃຫ້ການຊຸກຍູ້ສົ່ງເສີມການນັບຖືສິດທິມະ
ນຸດນັ້ນບໍ່ໄດ້ທຳການກົດດັນຢ່າງພຽງພໍຕໍ່ລັດຖະບານຂອງ
ປະເທດຕ່າງໆ ບ່ອນທີ່ໄດ້ມີການລ່ວງລະເມີດສິດທິມະນຸດ
ຢ່າງຮ້າຍແຮງເກີດຂຶ້ນ.
ລາຍງານຂອງກຸ່ມດັ່ງກ່າວ ໄດ້ລະບຸຊື່ບຸກຄົນສຳຄັນໆຂອງ
ນາໆຊາດທີ່ລາຍງານເວົ້າວ່າ ໄດ້ປະສົບກັບຄວາມລົ້ມແຫຼວ
ໃນການປົກປ້ອງປະຊາທິປະໄຕເຊ່ນ ເລຂາທິການໃຫຍ່ອົງ
ການສະຫະປະຊາຊາດ ທ່ານ Ban Ki-moon, ຫົວໜ້າ
ນະໂຍການຕ່າງປະເທດຂອງສະຫະພາບຢູໂຣບ ທ່ານນາງ
Catherine Ashton ແລະປະທານາທິບໍດີສະຫະລັດ
ທ່ານ ບາຣັກໂອບາມາ.
ທ່ານ Porteous ກ່າວວ່າ ພວກທີ່ເຄີຍປົກປ້ອງການເຄົາລົບນັບຖືສິດທິມະນຸດມາແຕ່ໃດໆ
ນັ້ນ ກຳລັງຜ່ອນຜັນທ່າທີຂອງຕົນ ແລະສ່ວນນຶ່ງນັ້ນແມ່ນເປັນຍ້ອນລະບົບແບບແຜນຂອງ
ໂລກທີ່ກໍາລັງມີການປ່ຽນແປງໄປ ຊຶ່ງທ່ານຊີ້ແຈງວ່າ:
// ສຽງ //
ທ່ານ Porteous ເວົ້າວ່າ ເວລານີ້ພວກເຮົາກຳລັງອາໄສຢູ່ໃນໂລກທີ່ມີຫຼາຍຂົ້ວບ່ອນທີ່
ບັນດາປະເທດປະຊາທິປະໄຕຕາເວັນຕົກພວມແລເຫັນວ່າ ອິດທິພົນຂອງຕົນກຳລັງເສື່ອມ
ຖອຍລົງຍ້ອນເຫດຜົນທາງດ້ານເສດຖະກິດແລະການເມືອງທໍ່ນັ້ນແຕ່ນອກນັ້ນແລ້ວພວກ
ເຮົາກໍຍັງໄດ້ເຫັນວ່າ ບັນດາປະເທດປະຊາທິປະໄຕຕາເວັນຕົກເອງນັ້ນ ກໍມີການພົວພັນ
ກັບການລ່ວງລະເມີດສິດທິມະນຸດ ທີ່ຮ້າຍແຮງຈຳນວນນຶ່ງໃນໄລຍະຮອບ 10 ປີຜ່ານມາ
ແລະເພາະສະນັ້ນຄວາມຖືກຕ້ອງຊອບທຳຕະຫຼອດທັງຄວາມເຊື່ອໝັ້ນຂອງບັນດາປະເທດ
ເຫຼົ່ານີ້ໃນຖານະຜູ້ຊຸກຍູ້ສະໜັບສະໜຸນສິດທິມະນຸດນັ້ນກໍເສື່ອມຖອຍລົງເຊັ່ນດຽວກັນ.
ທ່ານກ່າວວ່າ ໂຕຢ່າງ ມາດຕະການຕໍ່ຕ້ານພວກກໍ່ການຮ້າຍຢູ່ໃນສະຫະລັດແລະໃນທົ່ວ
ທະວີບຢູໂຣບ ໄດ້ນຳໄປສູ່ການລ່ວງລະເມີດສິດທິມະນຸດ.
ໃນຢູໂຣບນັ້ນ ທ່ານເວົ້າວ່າ ການຈຳແນກກີດກັນຕໍ່ພວກຊົນກຸ່ມນ້ອຍ ພວມກາຍເປັນບັນ
ຫາທີ່ເພີ່ມທະວີຂຶ້ນນັບມື້.ໃນຮອບປີຜ່ານມານີ້ບັນດາປະເທດໃນຢູໂຣບຈຳນວນນຶ່ງໄດ້ປາບ
ປາມພວກຊົນເຜົ່າ Roma ຫຼືພວກ Gypsy ທີ່ບໍ່ມີ ຢູ່ເປັນຫຼັກແຫຼ່ງ ອັນເປັນການເຄື່ອນ
ໄຫວ ທີ່ໄດ້ຮັບການຕຳໜິຕິຕຽນຢ່າງແຜ່ຫລາຍ ຈາກບັນດາກຸ່ມປົກປ້ອງສິດທິມະນຸດ.
ກຸ່ມປົກປ້ອງສິດທິມະນຸດ Human Rights Watch ໄດ້ຈັດເອົາອີຣ່ານ ມຽນມາ ເກົາຫຼີ
ເໜືອ ເຢເມນແລະຊິມບັບເວ ເປັນລັດຖະບານທີ່ລ່ວງລະເມີດສິດທິມະນຸດຮ້າຍແຮງທີ່ສຸດ.
ທ່ານ Porteous ກ່າວຕໍ່ໄປວ່າ ຢູ່ທີ່ປະເທດຈີນ ກໍພວມມີການລ່ວງລະເມີດສິດທິມະນຸດ
ທີ່ສຳຄັນໆເກີດຂຶ້ນແຕ່ບັນດາປະເທດປະຊາທິປະໄຕຕາເວັນຕົກກໍບໍ່ໄດ້ດໍາເນີນການຢ່າງ
ແຂງຂັນແຕ່ຢ່າງໃດໃນການຊຸກຍູ້ໃຫ້ມີການປ່ຽນແປງ.
// ສຽງ //
ທ່ານ Porteous ກ່າວວ່າ ສ່ວນນຶ່ງນັ້ນກໍເປັນຍ້ອນວ່າ ຈີນໄດ້ກາຍເປັນປະເທດທີ່ມີບົດ
ບາດສຳຄັນທາງດ້ານການເມືອງ ແລະເສດຖະກິດຂອງໂລກ ແລະສໍາຄັນຫລາຍຈົນກາຍ
ເປັນເລື່ອງຂີ້ຂາດຕາຂາວຢ່າງແທ້ຈິງໄປແລ້ວ ສຳລັບປະເທດຕາເວັນຕົກທີ່ຈະປະເຊີນໜ້າ
ກັບວິກິດການດ້ານສິດທິມະນຸດໃນຈີນນັ້ນ.
ຢູ່ອາຟຣິການັ້ນ ທ່ານ Porteous ເວົ້າວ່າ ໃນໄລຍະສອງສາມປີຜ່ານມານີ້ປະເທດຣວັນ
ດາແລະເອທິໂອເປຍ ແມ່ນໄດ້ມຸ່ງໜ້າໄປສູ່ການກົດຂີ່ທາງດ້ານສິດທິມະນຸດຫຼາຍຂຶ້ນ.
ແຕ່ຍ້ອນວ່າ ບັນດາປະເທດຕາເວັນຕົກ ມີຄວາມສຳພັນຢ່າງໃກ້ຊິດກັບປະເທດທັງສອງ
ດັ່ງນັ້ນພວກເຂົາເຈົ້າຈຶ່ງເຮັດບໍ່ຮູ້ບໍ່ເຫັນກ່ຽວກັບເລື່ອງນີ້ ຊຶ່ງທ່ານເວົ້າ ວ່າ ອາດເປັນຍ້ອນ
ການລົງທຶນຈຳນວນມະຫາສານໃນການໃຫ້ຄວາມຊ່ອຍເຫຼືອດ້ານການພັດທະນາແກ່ປະ
ເທດທັງສອງ ບັນດາປະເທດຕາເວັນຕົກຈຶ່ງມີຄວາມລັງເລໃຈໃນການທີ່ຈະປະເຊີນໜ້າກັບ
ຄວາມຈິງທີ່ວ່າ ສະຖານະການດ້ານສິດທິມະນຸດ ພວມຊຸມໂຊມລົງຢູ່ໃນປະເທດເຫຼົ່ານີ້.
ລາຍງານປະຈຳປີ 2011 ນີ້ ແມ່ນສະບັບທີ 21 ຂອງກຸ່ມປົກປ້ອງສິດທິມະນຸດ Human
Rights Watch ກ່ຽວກັບສະຖານະການດ້ານສິດທິມະນຸດຂອງໂລກໃນປີ 2010 ຜ່ານມາ.
