ກຸ່ມປົກປ້ອງສິດທິມະນຸດ Human Rights Watch ໄດ້ເປີດເຜີຍລາຍງານປະຈໍາປີວ່າດ້ວຍສິດທິມະນຸດໃນທົ່ວໂລກຂອງຕົນໃນວັນອາທິດມື້ນີ້ ຊຶ່ງສະແດງພາບທີ່ມືດມົນກ່ຽວກັບສະພາບການນັບຖືສິດທິມະນຸດຢູ່ໃນຂົງເຂດສ່ວນໃຫຍ່ຂອງເອເຊຍ.
ກຸ່ມປົກປ້ອງສິດທິມະນຸດ HRW ກ່າວວ່າ ສະຖານະການດ້ານສິດທິມະນຸດໃນມຽນມ້າຍັງຄົງຢູ່ໃນສະພາບຮ້າຍແຮງຢູ່ໃນຊ່ວງປີຜ່ານມາ ເຖິງແມ່ນມີການໂອນອໍານາດໃຫ້ລັດຖະບານພົນລະເຮືອນທີ່ໄດ້ຮັບການໜຸນຫລັງຈາກພວກທະຫານນັ້ນກໍຕາມ. ລາຍງານກ່າວຫາພວກທະຫານວ່າ ທໍາການຂົ່ມຂືນຊໍາເລົາ ທາລຸນນະກໍາ ແລະສັງຫານພວກພົນລະເຮືອນໃນເຂດຊົນເຜົ່າກຸ່ມນ້ອຍຕ່າງໆ ສ້າງຄວາມເສື່ອມເສຍໃຫ້ແກ່ການປະຕິຮູບດ້ານການເມືອງຂອງລັດຖະບານຫວ່າງໄວໆຜ່ານມານີ້.
ກຸ່ມປົກປ້ອງສິດທິມະນຸດດັ່ງກ່າວ ຍັງກ່າວຫາລັດຖະບານທີ່ມີພັກການເມືອງພັກດຽວຂອງຈີນວ່າ ວາງຂໍ້ຈໍກັດຢ່າງເຂັ້ມງວດຕໍ່ເສລິພາບໃນການອອກຄວາມຄິດຄວາມເຫັນ ການຄົບຄ້າສະມາຄົມ ແລະການນັບຖືສາສະໜາ ແລະປະຕິເສດຢ່າງເປີດແປນຕໍ່ການເປັນອິດສະລະໃນລະບົບຕຸລາການ ແລະອິດສະລະພາບໃນວົງການຂ່າວ. ໃນຂະນະດຽວກັນ ລາຍງານກ່າວວ່າ ພວກພົນລະເມືອງຈີນພາກັນຮູ້ສຶກກ່ຽວກັບສິດທິຂອງເຂົາເຈົ້າຫລາຍຂຶ້ນ ແລະພາກັນທ້າທາຍຕໍ່ທາງການຈີນກ່ຽວກັບການໃຊ້ສິດອໍານາດເກີນຂອບເຂດແລະການສໍ້ລາດບັງຫລວງນັ້ນ.
ເກົາຫລີເໜືອຖືກກ່າວຫາວ່າ ທໍາການລະເມີດສິດທິພື້ນຖານຂອງພົນລະເມືອງຂອງຕົນຢ່າງເປັນລະບົບ ໂດຍການການຈັບກຸມປະຊາຊົນຕາມອໍາເພີໃຈ ຂາດການດໍາເນີນຄະດີຕາມກົດໝາຍ ທໍາການທາລຸນນະກໍາແລະປະຕິບັດຢ່າງໂຫດຮ້າຍຕໍ່ພວກທີ່ຖືກຈັບກຸມ. ກຸ່ມປົກປ້ອງສິດທິມະນຸດດັ່ງກ່າວເວົ້າຕື່ມວ່າ ກຸງພຽງຢ້າງທໍາການລົງໂທດແບບກວມລວມ ຕໍ່ພວກທີ່ກະທໍາຄວາມຜິດຫລາຍຢ່າງຕ່າງກັນ ໂດຍການຈັບກຸມພົນລະເມືອງຂອງຕົນຫລາຍພັນຄົນ ໄປເຮັດວຽກສັບພະທຸກແບບຂ້າທາດໃນຄ້າຍກັກຂັງແຫ່ງຕ່າງໆ ແລະປະຫານຊີວິດຜູ້ຄົນເປັນໄລຍະໆ ຍ້ອນຄວາມຜິດເລັກໆນ້ອຍໆ ເຊ່ນການສະສົມອາຫານ ລັກຂະໂມຍແລະຄວາມຜິດອື່ນໆທີ່ເອີ້ນວ່າ ອາຊະຍາກໍາຕໍ່ຕ້ານສັງຄົມນັ້ນ.
ກຸ່ມປົກປ້ອງສິດທິມະນຸດ HRW ຍັງໄດ້ບັນທຶກໄວ້ຢ່າງລະອຽດເຊ່ນກັນກ່ຽວກັບອັນທີ່ເຂົາເຈົ້າເອີ້ນວ່າ ການລະເມີດສິດທິມະນຸດຢ່າງຮ້າຍແຮງໃນອີກຫລາຍປະເທດ ທີ່ຮວມທັງໃນກໍາປູເຈຍ ອິນໂດເນເຊຍ ມາເລເຊຍ ແລະຫວຽດນາມນັ້ນນໍາ.