ໃນຂະນະທີ່ກຸ່ມລັດອິສລາມ ພວມຈະຮັບການປະລາໄຊ ຢູ່ໃນດິນແດນຊຶ່ງເມືອກ່ອນ ເປັນເຂດຄວບຄຸມທີ່ສຳຄັນຢູ່ໃນຊີເຣຍ ແລະອີຣັກນັ້ນ ຄວາມພະຍາຍາມຂອງກຸ່ມດັ່ງ
ກ່າວ ທີ່ຈະເອົາຊະນະສົງຄາມຂໍ້ມູນ ກໍປະສົບກັບຄວາມລົ້ມແຫລວເຊັ່ນກັນ. ບັນດາ
ນັກວິເຄາະກ່າວວ່າ ການໂຄສະນາຊວຍເຊື່ອຂອງກຸ່ມລັດອິສລາມ ຫຼືໄອຊິສ ເຫັນວ່າ
ໄດ້ ຫລຸດລົງຢ່າງໃຫຍ່ ໃນໄລຍະຫລາຍເດືອນຜ່ານມານີ້. ໃນຂະນະທີ່ພວກໂຄສະນາ
ຊວນເຊື່ອຂອງກຸ່ມດັ່ງກ່າວ ບໍ່ສາມາດທີ່ຈະທຳທ່າໄດ້ຕໍ່ໄປວ່າ ຕົນເປັນຜູ້ຊະນະທາງ
ທະຫານນັ້ນ ເຂົາເຈົ້າກໍກຳລັງປ່ຽນຄວາມສົນໃຈໄປໃສ່ການຊັກຊວນໃຫ້ມີການໂຈມຕີຢູ່ໃນຕ່າງປະເທດ. ນັກຂ່າວ ວີໂອເອ ເຮັນຣີ ຣິຈແວລ ໄດ້ໂອ້ລົມກັບຜູ້ຊ່ຽວຊານດ້ານ
ກໍ່ການຮ້າຍ ທີ່ໄດ້ຕິດຕາມເບິ່ງການປ່ຽນແປງ ຢູ່ໃນສົງຄາມສື່ມວນຊົນຂອງກຸ່ມລັດອິສ
ລາມ ຊຶ່ງກິ່ງສະຫວັນ ຈະນຳເອົາລາຍລະອຽດ ມາສະເໜີທ່ານ ໃນອັນດັບຕໍ່ໄປ.
ວີດີໂອ ທີ່ຫາກໍຜະລິດຫວ່າງມໍ່ໆມານີ້ ໂດຍອົງການສື່ມວນຊົນຂອງກຸ່ມລັດອິສລາມ.
ທ່ານຊາລີ ວິນເຕີ ຈາກສູນກາງການສຶກສານາໆຊາດກ່ຽວກັບຫົວຮຸນແຮງ ກ່າວວ່າ
“ເບິ່ງຄືວ່າ ນີ້ແມ່ນເມືອງ ຣັກກາ. ເຂົາເຈົ້າພະຍາຍາມວາດພາບ ໃຫ້ເຫັນວ່າ ທະ
ຫານຂອງກຸ່ມລັດອິສລາມ ຍັງເປັນມືອາຊີບ ມີຄວາມສາມາດ ເປັນອົງກອນທີ່ໄດ້ຮັບ
ການຄ້ຳຈຸນເປັນຢ່າງດີ. ແຕ່ຂ້າພະເຈົ້າໝາຍຄວາມວ່າ ນີ້ແມ່ນສາມຄົນ ຢູ່ໃນລົດ
ບັນທຸກຄັນນຶ່ງໃນເມືອງຮ້າງ.ມັນແມ່ນຫຼາຍໆໄມລ໌ຫ່າງຈາກບ່ອນທີ່ເຂົາເຈົ້າເຄີຍຢູ່.”
ທ່ານຊາລີ ວິນເຕີ ໄດ້ສຶກສາກ່ຽວກັບການໂຄສະນາຊວນເຊື່ອຂອງກຸ່ມລັດອິສລາມ ນັບ
ແຕ່ກຸ່ມດັ່ງກ່າວໄດ້ເລີ້ມຕົ້ນມາ.
ທ່ານວິນເຕີ ກ່າວວ່າ “ກຸ່ມລັດອິສລາມ ໄດ້ມີປະສິດທິຜົນ ໜ້ອຍກວ່າທີ່ເຄີຍເປັນມາ
ກ່ອນ. ຂ້າພະເຈົ້າໝາຍຄວາມວ່າ ມັນເກືອບເປັນຄືກັນກັບວ່າ ມີຜູ້ໃດຜູ້ນຶ່ງໄດ້ກົດໃຫ້
ມີການມິດງຽບ ຕໍ່ການໂຄສະນາຊວນເຊື່ອ. ແຕ່ວ່າໃນເດືອນຕຸລາຊຶ່ງເປັນເວລາທີ່ກຸ່ມ
ດັ່ງກ່າວໄດ້ມິດງຽບລົງຢ່າງກະທັນຫັນແຫ້ໆ ແລະຂ້າພະເຈົ້າຄິດວ່າ ມັນເປັນຍ້ອນສູນ
ກາງສື່ມວນຊົນ ຫລືສູນກາງຂ່າວສອງສາມແຫ່ງ ທີ່ຢູ່ອ້ອມແອ້ມເມືອງຣັກກ່ ແລະມາ
ຍາດິນ ໃນຊີເຣຍໄດ້ຖືກທຳລາຍເປັນການ ສະເພາະ.”
ດິນແດນທີ່ຍຶດຄອງໂດຍກຸ່ມລັດອິສລາມ ໄດ້ຫລຸດລົງເຫລືອຢູ່ເປັນເຂດເລັກເຂດນ້ອຍ
ທີ່ຕົນເຄີຍໄດ້ຄວບຄຸມເມື່ອນຶ່ງປີກ່ອນ. ເພາະສະນັ້ນ ມັນຈຶ່ງມີແຫຼ່ງວັດຖຸທີ່ໜ້ອຍລົງຈາກ
ອັນທີ່ສາມາດສ້າງສື່ມວນຊົນຂອງຕົນໄດ້.
ກຳລັງແນວໂຮມທີ່ສູ້ລົບກັບກຸ່ມໄອຊິສ ກໍໄດ້ຮຽນຮູ້ເຖິງຄວາມສຳຄັນຂອງການໂຄສະນາ
ຊວນເຊື່ອຂອງເຂົາເຈົ້າ. ທັງທາງພາກພື້ນດິນ ແລະທາງອອນໄລນ໌ການປະຕິບັດງານ
ດ້ານສື່ມວນຊົນ ຂອງກຸ່ມດັ່ງກ່າວ ໄດ້ຕົກເປັນເປົ້າໃນການໂຈມຕີ. ທ່ານວິນເຕີກ່າວວ່າ
ພວກຫົວຮຸນແຮງກຳລັງຊັ່ງຊາເບິ່ງຄວາມຄາດຫວັງ ໃນການໄດ້ຮັບໄຊຊະນະຂອງຜູ້ຕິດ
ຕາມເຂົາເຈົ້າ ຈາກຄວາມຝັນໃນການເປັນລັດອິສລາມ ກັບພຽງແຕ່ຢູ່ລອດມາໄດ້.
ທ່ານວິນເຕີ ກ່າວວ່າ “ເຖິງແມ່ນກຸ່ມດັ່ງກ່າວບໍ່ມີດິນແດນ ແຕ່ກໍຍັງມີແນວຄິດ ຍັງມີຜູ້
ໃຫ້ການສະໜັບສະໜູນ ຍັງມີຜູ້ທີ່ມີຄວາມເຊື່ອຢ່າງແທ້ຈິງ ສະຫຼະຊີວິດຂອງເຂົາເຈົ້າ
ໃນຊື່ຂອງກຸ່ມດັ່ງກ່າວ.
ໃນປີກ່ອນໆ ການໂຄສະນາຊວນເຊື່ອຂອງກຸ່ມໄອຊິສ ໄດ້ແນໃສ່ການຫລອກລໍ້ເອົາຊາວ
ຕ່າງປະເທດຜູ້ທີ່ມີຄວາມເຊື່ອ ໃຫ້ຢູ່ໃນໂລກແຫ່ງຄວາມຝັນຂອງກຸ່ມລັດອິສລາມ.
ທ່ານວິນເຕີ ກ່າວວ່າ “ກຸ່ມດັ່ງກ່າວບໍ່ໄດ້ຮຽກຮ້ອງໃຫ້ຜູ້ຄົນເດີນທາງໄປອີຣັກ ແລະ
ຊີເຣຍອີກແລ້ວ. ແຕ່ເຂົາເຈົ້າກຳລັງພະຍາຍາມເພີ້ມຂຶ້ນ ຢາກໃຫ້ຜູ້ຄົນປະຕິບັດງານ
ໂຈມຕີ ຢູ່ໃນປະເທດທີ່ເປັນບ້ານເກີດ ຂອງເຂົາເຈົ້າແທນ.”
ນັ້ນແມ່ນສິ່ງທີ່ການໂຄສະນາຊວນເຊື່ອ ທີ່ກຸ່ມລັດອິສລາມ ພະຍາຍາມອ້າງເອົາຜົນສຳ
ເລັດ. ເຖິງແມ່ນວ່່າບໍ່ມີຫລັກຖານພົວພັນໂດຍກົງຫຍັງຫລາຍ ແຕ່ກຸ່ມດັ່ງຮ້ອງໂຮວ່າ
ຕົນມີີຄວາມສາມາດໃນການຊັກຊວນໃຫ້ມີການໂຈມຕີກໍ່ການຮ້າຍຢູ່ທຸກຫົນແຫ່ງໃນ
ໂລກ ເຊັ່ນວ່າການໃຊ້ລົດໂຈມຕີຫລາຍໆຄັ້ງຢູ່ໃນນະຄອນ ຫລວງລອນດອນ ແລະເມືອງ
ຕ່າງໆໃນຢູໂຣບ ແລະຢູ່ໃນນະຄອນນິວຢອກເມື່ອເດືອນຕຸລາທີ່ຜ່ານມາ.
ນັ້ນໄດ້ເຮັດໃຫ້ສື່ມວນຊົນໂລກ ມີຄວາມຮັບຜິດຊອບຢ່າງໃຫຍ່ ທີ່ທ່ານ Winter ກ່າວ
ວ່າ ຕ້ານຢັນຢ່າງມີປະສິດທີຜົນຕໍ່ກຸ່ມລັດອິສລາມ ເຖິງແມ່ນວ່າກຸ່ມດັ່ງກ່າວໄດ້ປະລາ
ໄຊຢູ່ໃນສະໜາມລົບ.
ທ່ານວິນເຕີ ກ່າວວ່າ “ເພາະສະນັ້ນສື່ມວນຊົນຢູ່ໃນທົ່ວໂລກຈະຕອບໂຕ້ແບບໃດຕໍ່
ການປະຕິບັດງານເຫລົ່ານີ້. ເພາະວ່າ ພວກເຂົາຈະເປັນເສັ້ນຊີວິດຂອງລັດອິສລາມ
ຫຼາຍຂຶ້ນນັບມື້. ພວກເຂົາຈະກາຍເປັນສິ່ງ ທີ່ເຮັດໃຫ້ກຸ່ມດັ່ງກ່າວສາມາດ ຮັກສາໄວ້
ໃນຖານະອຸດົມການ ໃນຖານະຂະບວນການເຄື່ອນໄຫວ ໃນຖານະອົງການຈັດຕັ້ງ.”
ວີດີໂອຫລ້າສຸດທີ່ຫາກໍນຳອອກເຜີຍແຜ່ຂອງໄອຊິສ ອ້າງວ່າ ແຫຼມໄຊນາຍຂອງອີຈິບ
ຈະກາຍເປັນດິນແດນສ່ວນນຶ່ງຂອງຕົນ. ພວກນັກລົບກຸ່ມລັດອິສລາມ ໄດ້ໂຈມຕີວັດ
ມຸສລິມແຫ່ງນຶ່ງຢູ່ໃນຂົງເຂດເມື່ອອາທິດແລ້ວນີ້ ໂດຍໄດ້ສັງຫານຫຼາຍກວ່າ 300 ຄົນ.