ຣັດເຊຍຍັງຕົກຢູ່ໃນສະພາບທາງການທູດ ແລະທາງການທະຫານທີ່ບໍ່ມີຄວາມ ຄືບໜ້າແຕ່ຢ່າງໃດ ໃນປີ 2023 ໂດຍສ່ວນໃຫຍ່ແມ່ນຖືກໂລກ ເຮັດໃຫ້ໂດດດ່ຽວ ແລະບໍ່ສາມາດອ້າງເອົາໄຊຊະນະອັນສຳຄັນໃດໆ ໃນສົງຄາມທີ່ຕົນໄດ້ກໍ່
ຂຶ້ນໃນຢູເຄຣນນັ້ນ.
ສະພາບການດັ່ງກ່າວ ເຮັັດໃຫ້ເພີ້ມຄວາມເສຍຫາຍຂຶ້ນ ຍ້ອນການສູນເສຍກໍາລັງຄົນ, ອຸປະກອນການທະຫານ, ແລະລູກປືນ. ການທີ່ໃຫ້ມີຊັບພະຍາກອນມະນຸດໄປເຕີມໃສ່ ກໍໝາຍຄວາມວ່າວັງເຄຣມລິນຕ້ອງໃຊ້ມາດຕະການທີ່ບໍ່ໄດ້ຮັບຄວາມນິຍົມສູງ ເຊັ່ນການລະດົມກຳລັງທະຫານໃນຂະນະທີ່ການເລັ່ງການຜະລິດດ້ານທະຫານຖືກຂັດຂວາງໂດຍການລົງໂທດຂອງຝ່າຍຕາເວັນຕົກ, ການຈຳກັດການລົງທຶນ ແລະເທັກໂນໂລຈີສູງ ເຂົ້າໄປໃນຣັດເຊຍ.
ໃນສະພາບການດັ່ງກ່າວ ວັງເຄຣມລິນຕ້ອງໄດ້ອອກແບບສົງຄາມປະສົມ ຂອງຕົນຄືນໃຫມ່ ແລະພະຍາຍາມສ້າງອິດທິພົນຕໍ່ຄວາມຄິດເຫັນຂອງປະຊາຊົນຕ່າງ ປະເທດ ເພື່ອໃຫ້ມີການຍຸຕິຊົ່ວຄາວ ແລະຍົກເລີກການລົງໂທດ "ເພື່ອຊື້ເວລາໃນການສ້າງ ການດໍາເນີນການໂຈມຕີຄືນໃໝ່ ໃນອະນາຄົດ."
ໂດຍທີ່ເປັນສ່ວນນຶ່ງຂອງສົງຄາມແບບປະສົມຂອງຕົນ, ການໂຄສະນາຂອງວັງ ເຄຣມລິນ ໄດ້ພະຍາຍາມຊັກຊວນໃຫ້ຜູ້ຟັງ ຢູ່ພາຍໃນແລະຕ່າງປະເທດຄິດວ່າ ຣັດເຊຍ ບໍ່ແມ່ນຜູ້ຮຸກຮານ ໃນການເຮັດສົງຄາມກັບຢູເຄຣນ ແຕ່ເປັນຜູ້ໄດ້ຮັບເຄາະຮ້າຍ ແລະຝ່າຍຕາເວັນຕົກ ໃຊ້ຢູເຄຣນ ເພື່ອໂຈມຕີຣັດເຊຍ.
ຢູ່ຂ້າງລຸ່ມນີ້ ແມ່ນຄຳເວົ້າທີ່ບໍ່ຖືກຕ້ອງ ແລະ ເຮັດໃຫ້ເຂົ້າໃຈຜິດ ທີ່ມັກເວົ້າລື້ມໄປລຶ້ມມາຢູ່ເລື້ອຍໆ ກ່ຽວກັບຫົວຂໍ້ນີ້ ທີ່ Polygraph.info ໄດ້ຕິດຕາມ ແລະໄດ້ພິສູດວ່າ ບໍ່ມີຄວາມຈິງໃນປີ 2023:
ສິ່ງທີ່ເວົ້າອອກມາຈາກປາກຂອງປູຕິນ
ການກ່າວອ້າງວ່າໂຕເອງຕົກເປັນຜູ້ໄດ້ຮັບເຄາະເປັນຈຸດສໍາຄັນທີ່ເວົ້າເປັນປະຈໍາ ຢູ່ໃນການກ່າວປາໄສຂອງປະທານາທິບໍດີຣັດເຊຍ ທ່ານວລາດິເມຍ ປູຕິນ ຕໍ່ສາທາລະນະຊົນ ໃນຕະຫຼອດປີ.
ຕົວຢ່າງເຊັ່ນ, ໃນເດືອນມິຖຸນາ ທ່ານປູຕິນ ໄດ້ກ່າວອ້າງຢ່າງບໍ່ຖືກຕ້ອງວ່າ ນັບຕັ້ງແຕ່ມື້ທີ່ຢູເຄຣນ ໄດ້ຮັບເອກະລາດ ໃນເດືອນທັນວາ 1991 ເປັນຕົ້ນມາ ປະເທດນີ້ບໍ່ເຄີຍມີເອກະລາດເລີຍ ແຕ່ວ່າຖືກຄວບຄຸມໂດຍຕາເວັນຕົກ ທີ່ຫລໍ່ ລ້ຽງທັດສະນະຄະຕິ ທີ່ປອງຮ້າຍ "ຕໍ່ຕ້ານຣັດເຊຍ".
ໃນຄວາມເປັນຈິງແລ້ວ ຢູເຄຣນໄດ້ຕໍ່ສູ້ຕ້ານກັບການຄອບງໍາ ແບບໃຫ້ເປັນຫົວ ເມືອງຂຶ້ນຂອງຣັດເຊຍມາໄດ້ຫຼາຍສັດຕະວັດແລ້ວ ແລະສົງຄາມຄັ້ງຫລ້າສຸດນີ້ ແມ່ນເປັນພຽງການເພີ່ມຄວາມໂສກເສົ້າທີ່ມີມາໃນປະຫວັດສາດຢູ່ແລ້ວເທົ່ານັ້ນ.
ນັບແຕ່ເດືອນກຸມພາປີ 2022, ຕາມການຄາດຄະເນຂອງຢູເຄຣນ ຣັດເຊຍໄດ້ສັງຫານພົນລະເຮືອນຢູເຄຣນຢ່າງໜ້ອຍ 30,000 ຄົນ. ອົງການສະຫະປະຊາຊາດໄດ້ກວດສອບວ່າ ມີການເສຍຊີວິດຂອງພົນລະເຮືອນຫຼາຍກວ່າ 10,000 ຄົນ ໂດຍເວົ້າວ່າຕົວເລກຕົວຈິງມີອາດຈະສູງກວ່ານັ້ນຫຼາຍ. ຫລາຍພັນຄົນຫາຍສາບສູນ ແລະຫລາຍລ້ານຄົນບໍ່ມີບ່ອນຢູ່ອາໄສ. ຣັດເຊຍໄດ້ທຳລາຍຕົວເມືອງໃຫຍ່, ເມືອງນ້ອຍ ແລະໝູ່ບ້ານຂອງຢູເຄຣນຫຼາຍສິບແຫ່ງ, ແລະໄດ້ລັກພາຕົວເດັກນ້ອຍຢູເຄຣນຫຼາຍພັນຄົນໄປ.
ສໍາລັບເລື້ອງຄວບຄຸມຢູເຄຣນນັ້ນ: ປະເທດດັ່ງກ່າວ ມີປະທານາທິບໍດີຫົກຄົນ ນັບຕັ້ງແຕ່ປີ 1991 ມາ. ໃນນັ້ນມີແຕ່ສາມຄົນເທົ່ານັ້ນທີ່ສະຫນັບສະຫນູນຝ່າຍຕາເວັນຕົກ; ສອງຄົນແມ່ນປ່ຽນການສະໜັບສະໜຸນໄປໆມາໆ ລະຫວ່າງມົສກູ ແລະຕາເວັນຕົກ, ແລະນຶ່ງຄົນແມ່ນສະຫນັບສະຫນູນຣັດເຊຍຢ່າງແຂງຂັນເລີຍ.
ອົງການສົນທິສັນຍາແອັດແລນຕິກເໜືອ ຫລື ເນໂຕ້ (NATO) ຍັງເປັນຄົນຮ້າຍອີກຜູ້ນຶ່ງຢູ່ໃນການເລົ່າເລື່ອງຂອງທ່ານປູຕິນ. ຜູ້ນຳຣັດເຊຍໄດ້ຖິ້ມໂທດໃສ່ເນໂຕ້ ຢູ່ເປັນປະຈຳວ່າ ເຮັດໃຫ້ທ່ານຕັດສິນໃຈ ໂຈມຕີຢູເຄຣນ. ທ່ານໄດ້ກ່າວອ້າງຊ້ຳແລ້ວຊ້ຳອີກວ່າ ເຖິງແມ່ນວ່າໄດ້ໃຫ້ຄຳໝັ້ນສັນຍາແກ່ຣັດເຊຍໃນປີ 1990 ແລ້ວກໍຕາມ ເນໂຕ້ໄດ້ຂະຫຍາຍໂຕ ໄປທາງຕາເວັນອອກ ແລະ “ໄປເຖິງຢູເຄຣນ.”
ບໍ່ມີຄໍາສັນຍາແບບນັ້ນເລີຍ. ນັບຕັ້ງແຕ່ການສ້າງຕັ້ງຂຶ້ນໃນປີ 1949 ເນໂຕ້ ບໍ່ເຄີຍປ່ຽນແປງ "ນະໂຍບາຍການເປີດປະຕູ" ຂອງຕົນເລີຍ. ສະຫະລັດ, ຢູໂຣບ ແລະຣັດເຊຍ ບໍ່ເຄີຍໄດ້ລົງນາມໃນສົນທິສັນຍາ ຫຼື ຂໍ້ຕົກລົງໃດໆ ທີ່ມີຂໍ້ກຳນົດທີ່ຈຳກັດການເປັນສະມາຊິກຂອງເນ້ໂຕ້ຂອງບັນດາປະເທດຢູໂຣບຕາເວັນອອກເລີຍ.
ແຕ່ການຖິ້ມໂທດໃສ່ປະເທດຕາເວັນຕົກ ແລະເນໂຕ້ ໃນເລື້ອງການເຮັດສົງຄາມແລ້ວ ຍັງບໍ່ພຽງພໍ. ທ່ານ ປູຕິນ ຍັງໄດ້ກ່າວອ້າງອີກວ່າ ຣັດເຊຍບໍ່ເຄີຍ "ກໍ່" ສົງຄາມຕໍ່ຢູເຄຣນເລີຍ, ແຕ່ມັນແມ່ນ ຢູເຄຣນ ທີ່ເປັນຜູ້ເຮັດແນວນັ້ນ.
ຣັດເຊຍເລີ່ມເຮັດສົງຄາມຕໍ່ຢູເຄຣນໃນປີ 2014 ເມື່ອມົສກູໄດ້ພະໜວກເອົາແຫຼມ ໄຄຣເມຍຂອງຢູເຄຣນ ແລະຈາກນັ້ນໄດ້ສົ່ງໜ່ວຍທະຫານທີ່ລັບລີ້ເຂົ້າໄປຍຶດເອົາຕຶກອາຄານລັດຖະບານໃນເຂດດອນບັສຢ່າງລັບໆ ໂດຍໄດ້ເລີ້ມກໍາອຳນາດໃນເຂດໂດເນັດ ແລະ ລູຮານຂອງຢູເຄຣນຢ່າງມີປະສິດທິຜົນ. ຢູເຄຣນໄດ້ຕອບໂຕ້ຄືນຕໍ່ມາດຕະການເຄື່ອນໄຫວຕ່າງໆຂອງຣັດເຊຍ ໂດຍເລີ້ມໃຊ້ອັນ ທີ່ກີຢິບຮຽກຮ້ອງວ່າ “ການປະຕິບັດງານຕ້ານການກໍ່ການຮ້າຍ.” ໃນເວລາຕໍ່ມາ, ຣັດເຊຍໄດ້ສົ່ງທະຫານທໍາມະດາໄປຍັງເຂດດອນບັສ ແລະໄດ້ພະໜວກເອົາມັນ.
ໃນວັນທີ 24 ກຸມພາປີ 2022, ທ່ານປູຕິນເອງໄດ້ປະກາດການບຸກລຸກທາງທະ ຫານ ຢ່າງເຕັມສ່ວນ ເຂົ້າໄປໃນຢູເຄຣນ. ມັນໄດ້ໄປໄກກວ່າເຂດດອນບັສນັ້ນຫຼາຍ: ການໂຈມຕີດ້ວຍລູກສອນໄຟ ແລະລູກລະເບີດຂອງຣັດເຊຍໄດ້ກະໜໍ່າໃສ່ເມືອງໃຫຍ່ທີ່ສຸດຫຼາຍແຫ່ງຂອງຢູເຄຣນ, ແລະມີລົດຖັງແລ່ນລຽນກັນເປັນຖັນແຖວໄປລ້ອມນະຄອນຫຼວງກີຢິບ ຂອງປະເທດນັ້ນ.
ຣັດເຊຍໄດ້ວາງແຜນເຮັດສົງຄາມນັ້ນ ມາເປັນເວລາຫຼາຍເດືອນ ໃນຂະນະທີ່ໄດ້ດຳເນີນການໂຄສະນາເຜີຍແຜ່ຂໍ້ມູນບໍ່ຈິງ, ປະຕິເສດ ແລະປິດບັງການກະກຽມການບຸກລຸກ.
ການໂຈມຕີທາງດ້ານຄໍາເວົ້າຂອງທ່ານປູຕິນ ຕໍ່ຢູເຄຣນຍັງລວມເຖິງການກ່າວອ້າງວ່າ ຊາວຢູເຄຣນມັກຈະລະເບີດ, ຂົ່ມຂືນ ແລະຂ້າພົນລະເມືອງຢູ່ເປັນປະຈໍາພາຍໃຕ້ຄໍາແນະນໍາຈາກ "ຜູ້ດູແລຕາເວັນຕົກ" ຂອງພວກເຂົາ ເຊັ່ນໃນກໍລະນີຂອງເມືອງບູຈາ, ມາຣີໂອໂປລ, ຫຼື ເຂື່ອນຄາກຄອຟຄາ.
ໃນຕອນທີ່ມັນລະເບີດຂຶ້ນນັ້ນ ເຂື່ອນຄາກຄອຟຄາ ແມ່ນຢູ່ພາຍໃຕ້ການຄວບຄຸມຂອງຣັດເຊຍເປັນເວລາຫຼາຍກວ່າ 15 ເດືອນ. ມີຫຼັກຖານຢ່າງຫຼວງຫຼາຍທີ່ຢັ້ງຢືນວ່າ ການກ່າວອ້າງຂອງຣັດເຊຍທີ່ເວົ້າວ່າ ສະຖານີດັ່ງກ່າວ ຖືກຍິງໂດຍລູກສອນໄຟ ຫລືການຍິງປືນໃຫຍ່ຂອງຢູເຄຣນນັ້ນ ບໍ່ເປັນຄວາມຈິງ. ບັນດາຜູ້ຊ່ຽວຊານໄດ້ສະຫລຸບວ່າ ການລະເບີດຢູ່ໃຕ້ດິນ ແມ່ນສາເຫດທີ່ອາດຈະເຮັດໃຫ້ມີການທໍາ ລາຍທີ່ພາເກີດໄພນ້ຳຖ້ວມຄັ້ງໃຫຍ່ ແລະເຮັດໃຫ້ພົນລະເຮືອນຢູເຄຣນຫຼາຍພັນຄົນ ໄດ້ຮັບຄວາມທຸກທໍລະມານ.
ໂຄສົກຂອງທ່ານປູຕິນໄດ້ເວົ້າຫຍັງແດ່
ໂຄສົກຂອງວັງເຄຣມລິນ ທ່ານດມິດຕຣີ ເພສກອຟ (Dmitry Peskov) ກ່າວອ້າງຢ່າງຜິດໆວ່າ "ພື້ນຖານໂຄງລ່າງດ້ານການທະຫານຂອງຣັດເຊຍ ບໍ່ເຄີຍກ້າວໄປຫາຢູໂຣບຕາເວັນຕົກເລີຍ, ມີແຕ່ການເຄື່ອນໄຫວໄປ ໃນທິດທາງກົງກັນຂ້າມຕະຫລອດ."
ນັບຕັ້ງແຕ່ທ່ານປູຕິນຂຶ້ນກຳອຳນາດໃນປີ 2000, ຣັດເຊຍໄດ້ສ້າງຖານທັບໃໝ່ຫຼາຍສິບແຫ່ງ ແລະໄດ້ສ້ອມແປງການຕິດຕັ້ງທາງທະຫານຂອງໂຊຫວຽດຄືນໃໝ່ ຢູ່ຕາມຊາຍແດນຂອງຕົນທີ່ຕິດກັບຢູໂຣບຕາເວັນຕົກ. ໃນປີ 2014, ຣັດເຊຍໄດ້ຍຶດເອົາ ແລະເລີ່ມໃຊ້ຖານທັບທະຫານຂອງຢູເຄຣນຫຼາຍແຫ່ງ ຢູ່ແຫຼມໄຄຣເມຍ ແລະເຂດດອນບັສ.
ຣັດເຊຍໄດ້ໃຊ້ສົງຄາມຢູເຄຣນ ເພື່ອຜັກດັນກຳລັງການທະຫານຂອງມົສກູໄປຫາທາງຕາເວັນຕົກ. ໃນປີ 2023, ຣັດເຊຍໄດ້ເລີ່ມສົ່ງອາວຸດນິວເຄຼຍສະໜາມໄປໃນເບລາຣຸສ, ເຊິ່ງມີຊາຍແດນຕິດກັບສາມປະເທດຂອງອົງການເນໂຕ້ຄື: ໂປແລນ, ລີທົວເນຍ, ແລະ ລັດເວຍ.
ລັດຖະມົນຕີປ້ອງກັນປະເທດຂອງທ່ານປູຕິນເວົ້າຫຍັງແດ່
ລັດຖະມົນຕີກະຊວງປ້ອງກັນປະເທດຣັດເຊຍ, ທ່ານເຊີເກ ຊອຍກູ ໃນເດືອນກຸມພາຜ່ານມາ ໄດ້ກ່າວອ້າງວ່າ ກຸ່ມຕິດຕໍ່ປ້ອງກັນປະເທດຢູເຄຣນ ທີ່ເອີ້ນກັນວ່າ ກຸ່ມ ແຣມສໄຕນ໌ (Ramstein) ໄດ້ຮຽກຮ້ອງຢ່າງເປີດເຜີຍວ່າ ໃຫ້ຢູເຄຣນຍຶດເອົາດິນແດນຂອງຣັດເຊຍ.
ແນວໂຮມຂອງພັນທະມິດ 54 ປະເທດ ຮ່ວມໃຈກັນເພື່ອຊ່ວຍເຫຼືອຢູເຄຣນຕ້ານການຮຸກຮານຂອງຣັດເຊຍ, ກຸ່ມແຣມສໄຕນ໌ ບໍ່ໄດ້ຮຽກຮ້ອງໃຫ້ຢູເຄຣນຍຶດເອົາດິນແດນຂອງຣັດເຊຍເລີຍ. ທີ່ຈິງແລ້ວ, ກຸ່ມດັ່ງກ່າວໄດ້ນຳສະເໜີຂໍ້ຈຳກັດຕໍ່ການແນເປົ້າໝາຍຢ່າງແໜ້ນແກ່ນຂອງອາວຸດໜັກທີ່ຕົນສະໜອງໃຫ້, ໃນນັ້ນລວມ ທັງການຫ້າມບຸກໂຈມຕີ ຜືນແຜ່ນດິນຂອງຣັດເຊຍ ທີ່ຖືກຮັບຮູ້ຈາກສາກົນ.
ລັດຖະມົນຕີການຕ່າງປະເທດຂອງທ່ານປູຕິນເວົ້າຫຍັງແດ່
ລັດຖະມົນຕີການຕ່າງປະເທດຣັດເຊຍ ທ່ານເຊີເກ ລາວຣອຟ (Sergei Lavrov) ຍິ່ງທຳການໂຈມຕີຕໍ່ກຸ່ມແຣມສະໄຕນ໌ (Ramstein) ເພີ້ມອີກ ໂດຍສົມທຽບມັນໃສ່ກັບ “ນາໂປລຽນ… ແລະຮິດເລີ (Hitler)” ແລະກ່າວອ້າງວ່າເປົ້າໝາຍຂອງກຸ່ມດັ່ງກ່າວແມ່ນກຳຈັດປະຊາຊົນຣັດເຊຍໃຫ້ໝົດໄປ.
ແນວໂຮມພັນທະມິດ ບໍ່ເຄີຍອອກຖະແຫຼງການໃດໆກ່ຽວກັບການທໍາລາຍທັງຫມົດ ຫຼື ບາງສ່ວນຂອງຣັດເຊຍ, ຊົນເຜົ່າຣັດເຊຍ ຫຼືພົນລະເມືອງຣັດເຊຍເລີຍ.
ດມິທຣີ ໂພພອຟ (Dmitry Popov) ນັກຂ່າວຂອງມອສກອຟສກີ ກົມໂຊມອລ ເລດສ໌ (Moskovsky Komsomolets) ຊຶ່ງເປັນນຶ່ງໃນຫນັງສືພິມການເມືອງທີ່ເກົ່າແກ່ທີ່ສຸດໃນຣັດເຊຍ ລາຍງານວ່າ " ທີ່ປຶກສາດ້ານຄວາມປອດໄພແຫ່ງຊາດ ຂອງສະຫະລັດ, ທ່ານເຈກ ຊູລີວານ (Jake Sullivan) ໄດ້ສັ່ງໃຫ້ຢູເຄຣນໂຈມຕີ ແຫຼມໄຄຣເມຍ.”
ທ່ານຊູລີວານ ກ່າວຕໍ່ CNN ວ່າ ໂດຍການສະຫນອງອາວຸດໃຫ້, ສະຫະລັດ "ບໍ່ໄດ້ອະນຸຍາດໃຫ້ຢູເຄຣນທີ່ມີລະບົບຂອງສະຫະລັດ, ລະບົບຂອງຕາເວັນຕົກ ໂຈມຕີຣັດເຊຍ." ແຕ່ ທ່ານກໍເວົ້າວ່າ "ໄຄຣເມຍແມ່ນຂອງຢູເຄຣນ" ສະຫະລັດບໍ່ໄດ້ວາງຂໍ້ຈໍາກັດ ຕໍ່ຢູເຄຣນ ໃນຄວາມສາມາດທີ່ຈະໂຈມຕີດິນແດນ [ຂອງຕົນເອງ] ພາຍໃນເຂດຊາຍແດນທີ່ໄດ້ຮັບຮູ້ຈາກສາກົນຂອງຕົນ."
ປື້ມຕໍາລາຮຽນຂອງທ່ານປູຕິນເວົ້າຫຍັງແດ່
ຄໍາເວົ້າຂອງປະທານາທິບໍດີຣັດເຊຍມັກຈະຖືກພິມອອກຢູ່ໃນປຶ້ມຕໍາລາຮຽນ ທີ່ໃຊ້ເພື່ອສອນການທົບທວນປະຫວັດສາດ ໃຫ້ແກ່ນັກຮຽນໃນໂຮງຮຽນ ແລະມະຫາ ວິທະຍາໄລຕ່າງໆ, ລວມທັງຢູ່ໃນຢູເຄຣນທີ່ຖືກຍຶດຄອງ.
ປຶ້ມຕໍາລາຮຽນຫຼ້າສຸດຂອງຣັດເຊຍສອງສະບັບ ສໍາລັບປະຫວັດສາດຣັດເຊຍໃນ ປັດຈຸບັນ ແລະປະຫວັດສາດໂລກ ໄດ້ສະທ້ອນໃຫ້ເຫັນເຖິງການໂຄສະນາຊວນເຊື່ອຂອງວັງເຄຣມລິນ ແລະຂໍ້ມູນທີ່ບໍ່ຖືກຕ້ອງ.
ຕົວຢ່າງ, ປື້ມປະຫວັດສາດຫົວນຶ່ງ ບອກວ່າສະຫະລັດແມ່ນຜູ້ໄດ້ຮັບຜົນປະໂຫຍດຕົ້ນຕໍຈາກສົງຄາມລະຫວ່າງຣັດເຊຍກັບຢູເຄຣນ ເພາະວ່າອາເມຣິກາ "ສາມາດ ເອົາອາຍແກັສໃນລາຄາແພງ ແລະຊັບພະຍາກອນອື່ນໆຂອງຕົນໄປໃຫ້ຢູໂຣບໄດ້."
ໃນຄວາມເປັນຈິງແລ້ວ, ນັບຕັ້ງແຕ່ຣັດເຊຍບຸກລຸກຢູເຄຣນ ໃນເດືອນກຸມພາ 2022 ມາ ສ່ວນແບ່ງຂອງອາຍແກັສທໍາມະຊາດແຫຼວຂອງອາເມຣິກັນ ຢູ່ໃນການນໍາເຂົ້າອາຍແກັສຂອງຢູໂຣບໄດ້ຫຼຸດລົງ, ອີງຕາມອົງການຢູໂຣສແທດ (Eurostat), ຫ້ອງການສະຖິຕິຂອງສະຫະພາບຢູໂຣບ.
“ໃນໄຕມາດທຳອິດຂອງປີ 2022, ຣັດເຊຍທີ່ກວມເອົາ (18.1 ເປີເຊັນ) ແມ່ນປະເທດສະໜອງອາຍແກັສລາຍໃຫຍ່ອັນດັບສອງ ແກ່ອີຢູ (EU), ຮອງລົງມາຈາກສະຫະລັດທີ່ກວມເອົາ (48.6 ເປີເຊັນ) ໃນໄຕມາດທຳອິດຂອງປີ 2022. ເມື່ອມາຮອດໄຕມາດທຳອິດຂອງປີ 2023, ສ່ວນແບ່ງຂອງຣັດເຊຍຫຼຸດລົງ 4.9 pp. ໃນຂະນະດຽວກັນ, ສ່ວນແບ່ງຂອງນໍເວເພີ້ມຂຶ້ນ (+6.5 pp), ຂອງກາຕາ, ແລະອາລຈີເຣຍ (ທັງສອງປະເທດເພີ້ມຂຶ້ນ +2.4 pp) ທັງຫມົດ ລ້ວນແຕ່ເພີ່ມຂຶ້ນ ໃນຂະນະທີ່ສ່ວນແບ່ງຂອງສະຫະລັດຫຼຸດລົງ 8.4 pp."
ໃນພາກອື່ນອີກ ສອນວ່າ ສະຫະລັດກໍາລັງບັງຄັບໃຫ້ຢູເຄຣນ ຕໍ່ສູ້ກັບການບຸກລຸກຂອງຣັດເຊຍ ແລະສອນວ່າ ອາເມຣິກາ "ຕັ້ງໃຈທີ່ຈະຕໍ່ສູ້ຈົນໃຫ້ຍັງແຕ່ຄົນຢູເຄຣນ ຜູ້ສຸດທ້າຍ."
ແຕ່ຢ່າງໃດກໍ່ຕາມ, ການສຳຫຼວດຄວາມຄິດເຫັນຂອງສາທາລະນະຊົນ ສະແດງໃຫ້ເຫັນວ່າ ຊາວຢູເຄຣນສ່ວນໃຫຍ່ເຊື່ອວ່າ “ໄຊຊະນະ” ສຳລັບປະເທດ ໝາຍຄວາມວ່າ “ການປົດປ່ອຍດິນແດນທັງໝົດຂອງຕົນ, ລວມທັງແຫຼມໄຄຣເມຍ ແລະເຂດດອນບັສ ທີ່ຖືກຍຶດຄອງ.” ການສໍາຫຼວດຄັ້ງນຶ່ງ ໄດ້ສະແດງໃຫ້ເຫັນຄວາມເຊື່ອຫມັ້ນຂອງຜູ້ຕອບ ໃນການທີ່ຈະຮັບໄຊຊະນະ ຊຶ່ງອະທິບາຍໂດຍ "ຄວາມຮັບຮູ້ຂອງພົນລະເມືອງກ່ຽວກັບໄພຂົ່ມຂູ່ຢ່າງສູງວ່າ ຈະມີການທໍາລາຍທັງໝົດປະເທດໄປ ເມື່ອໃດຫາກມີການເສຍໄຊຂອງທະຫານ."
