ປະທານສະພາຕ່ຳຂອງສະຫະລັດ ທ່ານ ເຄວິນ ແມັກຄາຣ໌ທີ (Kevin McCarthy) ມີກຳນົດທີ່ຈະເປັນເຈົ້າພາບກອງປະຊຸມ ກັບປະທານາທິບໍດີໄຕ້ຫວັນ ທ່ານນາງໄຊ ອິງ-ເຫວິນ (Tsai Ing-wen) ທີ່ລັດຄາລີຟໍເນຍ ໃນວັນພຸດມື້ນີ້.
ການໂອ້ລົມທີ່ໄດ້ວາງແຜນໄວ້ນັ້ນ, ໄດ້ພາໃຫ້ເກີດການຕໍ່ຕ້ານຈາກຈີນ ແລະການຂົ່ມຂູ່ວ່າຈະໃຊ້ມາດຕະການຕອບໂຕ້.
ໃນປີທີ່ຜ່ານມາ, ທ່ານນາງໄຊ ໄດ້ຕ້ອນຮັບປະທານສະພາຕ່ຳ ໃນເວລານັ້ນ ທ່ານນາງແນນຊີ ເປໂລຊີ ໃນໄຕ້ຫວັນ, ແລະຈີນໄດ້ໂຕ້ຕອບໂດຍການຈັດການຊ້ອມລົບທາງທະຫານຄັ້ງໃຫຍ່ສຸດ ໃນຮອບທົດສະວັດ ອ້ອມເກາະໄຕ້ຫວັນ.
ຈີນອ້າງວ່າໄຕ້ຫວັນເປັນດິນແດນຂອງຕົນ, ແລະສະຖານກົງສຸນຂອງຈີນໃນນະຄອນ ລັອສແອນເຈີລິສ ກ່າວກ່ອນກອງປະຊຸມໃນວັນພຸດມື້ນີ້ວ່າ ທ່ານນາງໄຊ ໄດ້ເຂົ້າຮ່ວມການເຈລະຈາດັ່ງກ່າວ ເພື່ອ "ເຮັດການສະແດງທາງການເມືອງ."
ການຢ້ຽມຢາມລັດຄາລີຟໍເນຍ ຂອງທ່ານນາງໄຊ ມີຂື້ນພາຍຫຼັງການຢຸດແວ່ໃນອາເມຣິກາລາຕິນ ບ່ອນທີ່ທ່ານນາງໄດ້ໄປຢ້ຽມຢາມ ບັນດາພັນທະມິດທີ່ຍັງເຫຼືອຢູ່ຂອງໄຕ້ຫວັນຈຳນວນນຶ່ງ ຄື ເບລິສ (Belize) ແລະ ກົວເຕມາລາ (Guatemala). ເຊິ່ງບໍ່ດົນມານີ້, ຮອນດູຣັສໄດ້ປະກາດຕັດສາຍພົວພັນກັບໄຕ້ຫວັນເພື່ອສະໜັບສະໜູນຈີນ.
ທ່ານເຈີໂຣມ ໂຄເຮນ (Jerome Cohen), ສາດສະດາຈານບໍານານຂອງຄະນະກົດໝາຍຂອງມະຫາວິທະຍາໄລນິວຢອກ, ກ່າວຕໍ່ວີໂອເອວ່າ ການພົບປະກັບທ່ານ ແມັກຄາຣ໌ທີ (McCarthy) ທີ່ລັດຄາລີຟໍເນຍ, ທ່ານນາງ ໄຊໄດ້ໃຊ້ເສັ້ນທາງການທູດ ແທນທີ່ຈະຕ້ອນຮັບທ່ານ ແມັກຄາຣ໌ທີ (McCarthy) ໃນໄຕ້ຫວັນ ແລະມີຄວາມເປັນໄປໄດ້ທີ່ຈະສາມາດຄວບຄຸມການຕອບໂຕ້ແບບທີ່ຈີນມີຕໍ່ການຢ້ຽມຢາມຂອງທ່ານນາງ ເປໂລຊີ ໄດ້.