ປະທານສະພາຕ່ຳສະຫະລັດ ທ່ານເຄວິນ ແມັກຄາທີ ໄດ້ພົບປະກັບປະທານາທິບໍດີໄຕ້ຫວັນ ທ່ານນາງໄຊ ອິງ ເຫວິນ ໃນວັນພຸດຜ່ານມານີ້ ທີ່ລັດຄາລີຟໍເນຍ ໂດຍເອີ້ນທ່ານນາງວ່າ ເປັນ “ເພື່ອນມິດທີ່ຍິ່ງໃຫຍ່ຂອງອາເມຣິກາ.”
ໃນການປາກົດໂຕຮ່ວມກັນນັ້ນ ພວກທ່ານທັງສອງໄດ້ຫາລືກັນກ່ຽວກັບຄວາມສຳຄັນ ໃນສາຍພົວພັນລະຫວ່າງສະຫະລັດກັບໄຕ້ຫວັນ ແລະຄວາມສຳຄັນໃນການປ້ອງກັນການປົກຄອງແບບປະຊາທິປະໄຕ.
ທ່ານນາງໄຊກ່າວວ່າ “ພວກເຮົາ ອີກເທື່ອນຶ່ງ ພົບເຫັນພວກເຮົາເອງ ຢູ່ໃນໂລກ ບ່ອນທີ່ປະຊາທິປະໄຕພວມໄດ້ຮັບການຂົ່ມຂູ່ແລະຄວາມຮີບດ່ວນໃນການປົກປັກຮັກສາແສງໄຟແຫ່ງອິດສະຫຼະພາບ ໃຫ້ສືບຕໍ່ເຍືອງທາງແບບທີ່ບໍ່ສາມາດບັນລະຍາຍໄດ້.
ທ່ານແມັກຄາທີກ່າວວ່າ ມິດຕະພາບລະຫວ່າງສອງປະເທດ “ແມ່ນມີຄວາມສຳຄັນເພື່ອປົກປັກຮັກສາອິດສະຫຼະພາບທາງດ້ານເສດຖະກິດ ສັນຕິພາບ ແລະສະຖຽນລະພາບຢູ່ໃນຂົງເຂດ.”
ນອກນັ້ນ ທ່ານນາງໄຊຍັງໄດ້ເຕືອນເຖິງໄພຂົ່ມຂູ່ທາງດ້ານທະຫານຈາກຈີນ ຊຶ່ງໄດ້ກ່າວອ້າງວ່າ ໄຕ້ຫວັນເປັນດິນແດນສ່ວນນຶ່ງ ຂອງຕົນນັ້ນ “ແມ່ນບໍ່ສາມາດທີ່ຈະບໍ່ຖືວ່າສຳຄັນໄດ້.” ທ່ານນາງໄຊກ່າວວ່າ ໄຕ້ຫວັນຊອກຫາຊ່ອງທາງຢາກໃຫ້ “ມີສັນຕິພາບຢ່າງທີ່ເປັນຢູ່ໃນປັດຈຸບັນ” ແລະຈະ “ດິ້ນຮົນ ໃຫ້ເປັນພາຄີທີ່ເຊື່ອຖືໄດ້ຂອງໂລກ.”
